Չեմպիոնների լիգայի որակավորման երրորդ փուլում Հայաստանի չեմպիոն «Փյունիկը» կմրցի Սերբիայի չեմպիոն «Ցրվենա Զվեզդայի» հետ, որը գլխավորում է նախկինում հայտնի ֆուտբոլիստ Դեյան Ստանկովիչը։
«Ցրվենա Զվեզդայի» մարզավիճակի, ընթացիկ մրցաշրջանի հավանականությունների և «Փյունիկի» դեմ սպասվող դիմակայության մասին Armsport-ը զրուցել է սերբական Sportske.net կայքի լրագրող Դարկո Միտրովիչի հետ։
— Դարկո, ի՞նչ կարող եք ասել «Ցրվենա Զվեզդայի» մասին։ Ովքե՞ր են թիմի առաջատարները։
— «Ցրվենա Զվեզդան» նախորդ մրցաշրջանում հիանալի արդյունք է գրանցել։ 37 խաղից 100 միավոր վաստակելով՝ թիմը դարձել է Սերբիայի չեմպիոն և դուրս եկել Եվրոպա լիգայի 1/8 եզրափակիչ, որտեղ հիանալի խաղեր է անցկացրել շոտլանդական «Գլազգո Ռեյնջերսի» դեմ։ Դա նրանց լավագույն մրցաշրջանն էր 1991 թվականից ի վեր, երբ թիմը հաղթել էր Եվրոպական չեմպիոնների գավաթը։ Ամենակարևոր խաղացողները դեռ թիմում են։ Առաջին հերթին Ալեքսանդր Կատայը և Միրկո Իվանիչը։ Մարզիչ Դեյան Ստանկովիչն ունի որակյալ խաղացողների մեծ ընտրություն բոլոր դիրքերում, հատկապես որ Օսման Բուկարին և Քինգս Կանգվան միացել են ակումբին այս ամառ և նրանք լավ համապատասխանում են թիմին: «Ցրվենա Զվեզդան» շատ բան է ակնկալում այս մրցաշրջանից՝ ոչ միայն Չեմպիոնների լիգայի խմբային փուլ մտնելու, այլ է՛լ ավելի հեռուն հասնելու համար։ Հարձակման գծի հիմնական ֆուտբոլիստները Կատայն ու Իվանիչն են, որոնց շնորհիվ թիմը բազմաթիվ գոլային պահեր է ստեղծում։ Նախորդ մրցաշրջանում Կատայը թիմի լավագույն ռմբարկուն էր՝ 32 գոլ և 14 արդյունավետ փոխանցում բոլոր մրցաշարերում: Վերջին 3 խաղերում նա խփել է 3 գոլ և 2 գոլային փոխանցում կատարել։ «Ցրվենա Զվեզդան» նաև հուսալի է պաշտպանության գծում, որտեղ Ալեքսանդր Դրագովիչը և Ստրահինյա Էրակովիչը փայլուն են աշխատում, դարպասապահ և ավագ Միլան Բորյանը շատ որակյալ և փորձառու է, ինչպես նաև ձախ պաշտպան Միլան Ռոդիչը:
Պոտենցիալ թույլ կողմն աջ պաշտպանի դիրքում է, քանի որ այս ամառ թիմից հեռացել են Միլան Գայիչը և Կրիշտիանու Պիչինին, որոնց փոխարինող դեռ չի գտնվել։ Այդ դիրքն այժմ փակում է Մարկո Գոբելյիչը, որը մեծ փորձ ունի, սակայն նախորդ մրցաշրջանում քիչ է խաղացել։
— Ի՞նչ կարող ենք սպասել Բելգրադում կայանալիք առաջին խաղից։
— Երբ «Ցրվենա Զվեզդան» խաղում է տանը, հատկապես եվրոպական հանդիպումներում, երկրպագուների շատ բուռն աջակցություն ունի, և դա կլինի սերբական թիմի ևս մեկ լրացուցիչ առավելություն առաջին խաղում։ Եթե «Փյունիկի» խաղացողները կարողանան չեզոքացնել Կատային ու Իվանիչին, ապա ռևանշից առաջ կարող են համեմատաբար բարենպաստ արդյունքի հասնել։ Այնուամենայնիվ, «Ցրվենա Զվեզդան» ֆավորիտ է՝ հատկապես առաջին խաղում։ Երկու տարի առաջ «Զվեզդան» Նիկոսիայում խաղացել է «Արարատ-Արմենիայի» հետ՝ Եվրոպա լիգայի փլեյ-օֆֆում և հաղթել 2:1 հաշվով։ Այդ թիմի մեծ թվով խաղացողներ դեռևս հանդես են գալիս սերբական ակումբում։
— Ի՞նչ եք կարծում՝ «Փյունիկը» կարո՞ղ է անակնկալ մատուցել Ստանկովիչի թիմին։
— Ֆուտբոլում ամեն ինչ հնարավոր է, բայց շատ բան կախված կլինի առաջին հանդիպումից։ Եթե «Փյունիկին» հաջողվի պաշտպանվել և դիմակայել ուժեղ ճնշմանը, որն սպասվում է առաջին խաղում, ապա այս դիմակայությունը կարող է հետաքրքիր ընթացք ստանալ պատասխան խաղում։ «Ցրվենա Զվեզդան» այս մրցաշրջանի տնային 2 խաղերում հաղթել է 4:0 և 5:0 հաշվով։ Նրանք շատ լավ են խաղում։ Բացի այդ, պետք է ուշադրություն դարձնել հարձակման գծի 2 նոր խաղացողների՝ երիտասարդ Ստեֆան Միտրովիչին և փորձառու հարձակվող Ալեքսանդր Պեշիչին:
Այնուամենայնիվ, ես ակնկալում եմ, որ Միլան Պավկովը խաղը կսկսի մեկնարկային րոպեներից։ Նախորդ 3 խաղերում նա 4 գոլ է խփել։
Հիշեցնենք, որ թիմերի միջև առաջին հանդիպումը կկայանա օգոստոսի 3-ին՝ Բելգրադում, իսկ պատասխան խաղը՝ օգոստոսի 9-ին, Երևանում։
Միհրան Ալեքսանյան