Հայաստանի Պրեմիեր-լիգայի 31-րդ մրցաշրջանը կմեկնարկի այսօր Վայքում կայանալիք «Լեռնային Արցախ»-«Վան» խաղով: Առաջնությանը 10 թիմ կմասնակցի:
«Լեռնային Արցախն» Առաջին խմբի նախորդ առաջնության չեմպիոնն է: Թիմը «դժվարին» ճանապարհ անցավ մինչև ՀՊԼ-ի մասնակցության իրավունք/արտոնագիր ստանալը, և հիմա հետաքրքիր կլինի հետևել՝ ինչ ներուժ ունի առաջնության նորեկն ու ինչ է ներկայացնում իրենից, ինչի համար, սակայն, որոշակի ժամանակ կպահանջվի: «Լեռնային Արցախն» այս պահին գլխավորում է նախկին ֆուտբոլիստ Արտաշես Ադամյանը, բայց մարզչական նոր փոփոխությունները բացառված չեն:
Բարձրագույն խումբ է վերադարձել Գյումրիի «Շիրակը»: Գյումրիի թիմը մեծ ավանդույթներ, պատմություն ունի, և անկասկած նոր ու հետաքրքիր գույն կհաղորդի Հայաստանի առաջնությանը: ՀՊԼ-ում մրցունակ լինելու համար, սակայն, Տիգրան Դավթյանի թիմը դեռ իր խոսքը պետք է ասի նաև տրանսֆերային շուկայում:
Ի դեպ, Գյումրիի մարզադաշտը ևս պատրաստ է նոր մրցաշրջանին: Այնտեղ արդեն ավարտվել են լուսավորության համակարգի տեղադրման աշխատանքները:
Հայկական թիմերը նախապատրաստական բավական ակտիվ փուլ անցան՝ անցկացնելով ուսումնամարզական հավաքներ, ընկերական խաղեր: Այդուհանդերձ, առաջնությունը, գոնե այս փուլում, չի խոստանում լուրջ անակնկալներ: «Փյունիկն» ու «Արարատ-Արմենիան» մեկ գլուխ բարձր են մրցակիցներից, և ենթադրվում է՝ հիմնական պայքարն ընթանալու է հենց այս երկու թիմերի միջև:
Հայկական թիմերից եվրագավաթային պայքարը շարունակում է «Փյունիկը» և առնվազն դեռ 10 հանդիպում կանցկացնի Եվրոպայում: Եղիշե Մելիքյանը բավականին մրցունակ և բնավորություն ունեցող թիմ է ստեղծել, չնայած միջմրցաշրջանային հատվածում ունեցած լուրջ կորուստներին, և պետք է կռիվ տա երկու ճակատով: Այստեղ արդեն Մելիքյանի թիմին օգնության պետք է հասնի պահեստային երկար նստարանը:
Ինչ վերաբերում է «Արարատ-Արմենիային», ապա թիմն ունենալով բավականին մեծ ներուժ, լավ ձեռքբերումներ և մաքսիմալիստ գլխավոր մարզիչ՝ ի դեմս Վարդան Բիչախչյանի, առավելագույնի է ձգտելու Հայաստանի առաջնությունում: Պետք է պարզապես ճիշտ հետևություններ անել եվրագավաթային անհաջող փորձից հետո, հասկանալ սխալներն ու աշխատել դրանք վերացնելու ուղղությամբ:
Հետաքրքիր է լինելու նաև «Նոայի», «Արարատի», «Ալաշկերտի»,«Ուրարտուի», «Վանի» և ԲԿՄԱ-ի ելույթներին հետևելը: Այս թիմերը ևս մեծ աշխատանք են տարել նախապատրաստական փուլում:
Այդուհանդերձ, տրանսֆերային պատուհանը դեռ բաց է, թիմերի կազմերը դեռ վերջնական տեսք չեն ստացել, այնպես որ կանխատեսումներ անելը դժվար է: Մեկ բան հստակ է. Հայաստանի առաջնությունն անակնկալների, հետաքրքիր և երբեմն նաև հավասար հնարավորությունների առաջնություն է:
ՀՊԼ-ի մեկնարկային տուրի ևս 4 հանդիպումը կկայանան հուլիսի 30-ին և 31-ին:
Առաջին տուրի խաղացանկը՝
| Դաշտի տերը | Հյուրը | Քաղաքը | Մարզադաշտը | Օրը | Ժամը |
| Մրցափուլ 1 | |||||
| «Լեռնային Արցախ» | «Վան» | Վայք | «Քաղաքային» | 29/07/2022 | 17:45 |
| «Նոա» | «Ալաշկերտ» | Արմավիր | «Հոբելյանական» | 30/07/2022 | 17:45 |
| «Փյունիկ» | «Արարատ» | Երևան | «Հանրապետական» | 30/07/2022 | 20:00 |
| ԲԿՄԱ | «Շիրակ» | Երևան | Ֆուտբոլի ակադեմիա | 31/07/2022 | 19:00 |
| «Ուրարտու» | «Արարատ-Արմենիա» | Երևան | «Ուրարտու-1» | 31/07/2022 | 20:30 |
