Մխիթարյանը՝ Միլանում, Յուվենտուսի դարի գործարքը․ Տրանսֆերային ամառն Ա Սերիայում

Տրանսֆերային պատուհանն արդեն հատել է հասարակածը, իսկ եվրոպական թոփ ակումբները դեռ ամբողջովին չեն լուծել իրենց կադրային խնդիրները։

Դեռ մեկ ամսից մի փոքր ավել է մնացել տրանսֆերային պատուհանի փակվելուն, բայց մենք արդեն ականատես ենք եղել մի շարք հետաքրքիր, որոշ դեպքերում էլ՝ անսպասելի տեղափոխությունների։ Այսօր մեր դիտակետում իտալական Ա Սերիան է։ Առաջարկում ենք միասին վերհիշել այս ամառ կայացած կարևորագույն տրանսֆերներն այս լիգայում։

⚽ Միլան

Իտալիայի չեմպիոններն այս պահին ամենապասիվն են տրանսֆերային շուկայում Ա Սերիայի թոփ ակումբների շրջանում։ Բացի ազատ գործակալի կարգավիճակով Միլան տեղափոխված Օրիգիից թիմն այս պահին այլ համալրումներ չունի։ Ձեռք են բերվել նաև Մեսիասի և Ֆլորենցիի տրանսֆերային իրավունքները, որոնք նախորդ մրցաշրջանում վարձավճարով էին խաղում «Միլանում»։ Թիմից հեռացել են Ռոմանյոլին, Կեսիեն, Սամուն, Հաուգը, Դուարտեն և մի շարք այլ ֆուտբոլիստներ։ Երկարաձգվել է նաև պայմանագիրը Զլատանի հետ։ Պիոլիի թիմը միանշանակ համալրումների և ուժեղացման կարիք ունի, առաջիկա մրցաշրջանում չեմպիոնի տիտղոսը պահպանելու և Չեմպիոնների լիգայում հաջող հանդես գալու համար միլանցիներին անհրաժեշտ են ոչ միայն երկու-երեք որակյալ նորեկներ, այլ նաև պահեստայինների երկար նստարան։ Այնպես որ, կարծում ենք, օգոստոսին «Միլանն» ավելի ակտիվ կլինի տրանսֆերային շուկայում։

⚽ Ինտեր

Իսկ ահա Միլանի մյուս թիմը՝ «Ինտերը», այս ամառ բավականին ակտիվ է տրանսֆերային շուկայում։ Նախ թիմին ազատ գործակալի կարգավիճակով միացան կիսապաշտպան Հենրիխ Մխիթարյանն ու դարպասապահ Անդրե Օնանան։

«Մխիթարյանի շնորհիվ «Ինտերը» ձեռք է բերել խաղացողի, որն անհրաժեշտ էր կիսապաշտպանության գծում և հասանելի էր տրանսֆերային շուկայում անվճար։ Նա փորձառու ֆուտբոլիստ է, որը խաղացել է տարբեր թիմերում։ Բացի այդ, Սիմոնե Ինձագիին պետք էր այդ 4-րդ կիսապաշտպանը մեկնարկային կազմի համար։ Նկատի ունեմ՝ մի խաղացողի, որը կլինի նույն մակարդակի վրա, ինչ Բրոզովիչը, Բարելան և Չալհանողլուն»,- Armsport-ին ասել էր իտալական La Gazzetta dello Sport-ի լրագրող Մատեո Նավան, ով կենտրոնացած է «Ինտերի» խաղերը լուսաբանելու վրա։ Նավայի հետ ամբողջական հարցազրույն ՝ այստեղ։

Մխիթարյանի տեղափոխվելն «Ինտեր» ճի՞շտ որոշում էր, թե սխալ, դա ցույց կտա միայն ժամանակը։ Մի կողմից, նա դարձել էր հռոմեական ակումբի առաջատարներից մեկը, կայուն տեղն ուներ հիմնական կազմում, մյուս կողմից էլ՝ միլանյան թիմի հետ նա հնարավորություն ունի մասնակցելու Չեմպիոնների լիգային, ինչպես նաև Սկուդետոն նվաճելն «Ինտերի» հետ ավելի հավանական է թվում, քան նույնն անել «Ռոմայի» հետ։ Մխիթարյանի դիրքում Ինձագիի թիմում մրցակցությունն առկա է և ոչ միայն հայ կիսապաշտպանից, այլ նաև որոշ հանգամանքներից է կախված՝ կլինի նա թիմի առանքային խաղացող, թե․․․ Համենայն դեպս, «Ինտերը» պայքարելու է երկու ճակատով՝ Ա Սերիա և ՉԼ (չմոռանանք նաև Իտալիայի գավաթի մասին), այնպես որ, Ինձագիին անհրաժեշտ է իր տրամադրության տակ ունենալ որակյալ ֆուտբոլիտներ միևնույն դիրքում՝ ռոտացիան է՛լ ավելի արդյունավետ կատարելու համար։ Բացի այդ, Մխիթարյանի՝ մեկնարկային կազմում ամրապնդվելը կախված կլինի նաև մարզչական շտաբի ընտրած խաղային սխեմաներից և նրանից՝ որ դիրքում կխաղացնեն մարզիչները Հենրիխին։ Ինչպես նաև, բացի հայ ֆուտոբլսիտի ցուցադրած խաղից, կախված է նաև, թե ինչ մարզավիճակում կլինեն նույն գոտում հանդես եկող նրա խաղընկերները. մրցաշրջանը երկար է, վնասվածքներից, խաղային անկումից, վատ մարզավիճակից ոչ ոք ապահովագրված չէ։ Այնպես որ, երկար-բարակ քննարկելու, գուշակություններ անելու փոխարեն, եկեք սպասենք մրցաշրջանի մեկնարկին և աշնանն արդեն ավելի պարզ կլինի Մխիթարյանի դերն իտալական գրանդում։ Համենայն դեպս, շատ հաճելի է նման պատմություն ունեցող թիմի կազմում տեսնել հայ ֆուտբոլիստի։

Մխթիարյանն ու Օնանան «Ինտերի» միակ ձեռքբերումները չեն։ Հենրիխի նախկին թիմակից Ռոմելու Լուկակուն «Չելսիից» վերադարձավ միլանյան ակումբ, սակայն՝ վարձավճարով։ Թիմին է միացել նաև ձախ պաշտպան Բելանովան, իսկ Խոակին Կորեան, ով նախորդ մրցաշրջանում վարձավճարով էր խաղում միլանյան ակումբում, արդեն դարձել է թիմի լիարժեք ֆուտբոլիստ․ «Ինտերը» գնել է նրա ամբողջական տրանսֆերը մոտ 24 մլն եվրոյով։ Կորուստներ ևս կան․ թիմից հեռացել են Անդրեա Ռանոկիան, Արտուրո Վիդալն ու Իվան Պերիշիչը, սակայն նրանց հեռանալը դժվար թե մեծ ազդեցություն ունենա թիմի վրա։ Բայց այս ցուցակը կարող են համալրել արդեն ավելի նշանակալի անուններ, օրինակ՝ Դումֆրիսն ու Շկրինյարը, որոնց ծառայություններով հետաքրքրված են մի շարք թոփ ակումբներ։ Այնպես որ, չի բացառվում, որ Ինձագիի սելեկցիան դեռ չի ավարտվել, և առաջիկա մեկ ամսվա ընթացքում «Ինտերը» կարող է ձեռք բերել ևս մեկ-երկու նորեկի։

⚽ Նապոլի

«Նապոլին» այս ամառ կորցրեց միանգամից մի շարք առանցքային ֆուտբոլիստների։ Նախ, թիմը լքեց պաշտպանության հենասյունը համարվող Կալիդու Կուլիբալին, ով տեղափոխվեց «Չելսի»։ Որպես նրան փոխարինող նեապոլիտանացիները ձեռք բերեցին հարավկորեացի պաշտպան Կիմ Մին Ջեին։ Սպալետիի թիմից հեռացավ նաև «Նապոլիի» բոլոր ժամանակների լավագույն ռմբարկուն՝ Դրիս Մերտենսը։ Ավելի վաղ ակումբ լքել էր նաև Լորենցո Ինսինյեն։

Իսկ ահա թիմի մյուս համալրումները դեռ այնքան էլ չեն տպավորում․ վրացի կիսապաշտպան Խվիչա Կվարացխելիայի, ուրուգվայցի Մաթիաս Օլիվեյրայի և նորվեգացի Լեո Էստիգարի տրանսֆերները դժվար է թոփ անվանելը, չնայած՝ Նեապոլում մեծ հույսեր են կապում հենց վրացի տաղանդավոր ֆուտբոլիստի հետ։ Միգուցե նա կդառնա Ա Սերիայի այս մրցաշրջանի գլխավոր բացահայտումներից մեկը, ոչինչ չենք բացառում։ Եթե թիմը չուժեղացնի կազմը այս տրանսֆերային պատուհանի ընթացքում, ապա դժվար թե կարողանա պայքարել նույնիսկ ոչ թե չեմպիոնոթյան, այլ, ընդհանրապես, լավագույն քառյակում հայտնվելու համար։

⚽ Յուվենտուս

«Յուվենտուսն» ինչպես միշտ իր ռեպերտուարում է․ թուրինյան գրանդը, ինչպես գրեթե ամեն տարի, կարողանում է շարքերը համալրել որակյալ ազատ գործակալներով։ Դե ինչ, այս տարին ևս բացառություն չէ, և թուրինցիներն արդեն ունեն նմանատիպ երկու ձեռքբերում։ Առաջինը, դա արգենտինացի կիսապաշտպան Անխել Դի Մարիայի տրանսֆերն է, և չնայած նա արդեն 34 տարեկան է, բայց, միևնույն է, այս տրանսֆերը կարելի ավելացնել «պոզիտիվի» զաբյուղում։ Բազմիցս ականատես ենք եղել, թե ինչպես են վետերան ֆուտբոլիստները երկրորդ երիտասարդությունը վերապրում Ա Սերիայում․ կարծում ենք՝ այս տրանսֆերն այդ շարքից է։ Մյուս նորեկը Պոլ Պոգբան է․ ինչ վերաբերում է այս տրանսֆերին, ապա կարելի է այս գործարքը համարել 21-րդ դարի առաջին քսանամյակի ամենահաջողվածներից մեկը․․․ ինչո՞ւ։ Բացատրեմ․ նրան ժամանակին թուրինցիները ձեռք բերեցին ՄՅՈՒ-ից անվճար։ Մի քանի տարվա ընթացքում Պոլը դարձավ թիմի առաջատարն ու լավագույններից մեկն աշխարհում իր դիրքում։ Նրան հետ են վաճառում մանչեսթերյան ակումբին և վաստակում ավելի քան 100 մլն եվրո, իսկ հիմա նորից հետ վերադաձնում․․․ կրկին անվճար։ Փառահեղ է․․․ դե, համենայն դեպս թղթի վրա։ Իսկ թե ինչպիսի Պոգբա կտեսնենք նոր մրցաշրջանում, կհասկանանք առաջիկա մի քանի ամիսների ընթացքում։

«Յուվենտուսն» այս ամառ ունեցավ նաև կորուստներ․ նախ թիմից հեռացան պաշտպաններ Ջորջիո Կյելինին և Մաթիյս դե Լիխտը։ Սակայն թուրինցիները շատ արագ կարողացան ձևակերպել Բրեմերի տրանսֆերը «Տորինոյից» (Ա Սերիայի նախորդ մրցաշրջանի լավագույն պաշտպանը)։ Այս տրանսֆերով «Յուվեն» երկու «նապաստակ որսաց»։ Նախ, ձեռք բերեցին որակյալ ֆուտբոլիստի անհրաժեշտ դիրքում, երկրորդ՝ Բրեմերին շատ էր ուզում իր կազմում տեսնել նաև «Ինտերը»․ այսպես ասած՝ «փախցրեցին» անմիջական մրցակցի գլխավոր տրանսֆերային նպատակներից մեկը։

Այժմ Ալեգրիի խնդիրը հարձակման գծի ուժեղացնում է․ Դիբալան որոշեց չերկարաձգել պայմանագիրը և տեղափվեց ավելի տաք քաղաք՝ Հռոմ, Մորատան վերադարձավ Մադրիդ, Կիեզան դեռ ապաքինվում է վնասվածքից և դեռ հայտնի չէ՝ երբ ձեռք կբերի իր նախկին խաղամակարդակը, Բերնարդեսկին ուղևորվեց օվկիանոսից այն կողմ (տեղափոխվեց MLS)․․․ Այնպես որ այս գծում համալրումները ոչ միայն ցանկալի են, այլ նաև պարտադիր։ Այժմ ակումբը հետաքրքրություն է ցուցաբերում «Ռոմայից» Նիկոլո Զանիոլոյի և «Բարսելոնայից» Մեմֆիս Դեպայի նկատմամբ, մամուլում շրջանառվում են ևս մի քանի տարբերակներ, օրինակ՝ Ֆիրմինոն «Լիվերպուլից»։

Բայց «ծեր սենյիորան» դեռ չի ավարտել նաև «բալաստից» ազատվելու մեսիան։ Կիսապաշտպանությունն այժմ գերհագեցած է, ու չնայած դրան խոսվում է նաև ՊՍԺ-ից Պարեդեսին ձեռք բերելու տարբերակի մասին, այնպես որ՝ մի շարք ֆուտբոլիտներից Ալեգրին պետք է որ ազատվի։ Եվ ակումբը լքելու առաջնային թեկնածուներն են Աարոն Ռեմսին և Արտուրը, հավանաբար՝ նաև Ռաբյոն։

Այնպես որ՝ ինչպես և նախորդ երկու ամիսները, այնպես էլ օգոստոսը խոստանում է հագեցած լինել թուրինյան ակումբի համար և դեռ մի քանի պաշտոնական տրանսֆերների մենք ականատես կլինենք։

⚽ Ռոմա

«Ռոմայում» նոր մրցաշրջանում հետաքրքիր նախագիծ է ակնկալվում։ Թիմի նոր սեփականատերերը, կարծես թե, պատրաստ են բավարարել Մոուրինյուի տրանսֆերային «ախորժակը», և հռոմեական ակումբը նախատեսում է մի շարք թոփ (կամ էլ՝ մոտավորապես թոփ) ձեռքբերումներ կատարել։ Բայց մինչ այդ՝ կորուստների մասին։

Ամենանշանակալի կորուստը, բնականաբար, դա Հենրիխ Մխիթարյանի հեռանալն էր հռոմեական ակումբից։ Մոուրինյուն և ակումբը շատ էին ցանկանում թիմում պահել հայ կիսապաշտպանին, ով դարձել էր թիմի առաջատարներից մեկը։ Այժմ չենք պատմի ամբողջ պատմությունը սկզբից, միայն կարճ կասենք՝ թիմի համար այսպիսի ֆուտբոլիստի կորուստը նշակալի էր։ Մյուս հեռացած ֆուտբոլիստներից գրեթե ոչ ոքի անհրաժեշտություն չկա ներկայացնելու, քանի որ նրանցից ոչ մեկն առանձնակի մեծ դեր չէր խաղում Ժոզեի թիմում։

Ձեռքբերումների մասին․․․ հիշո՞ւմ եք, վերևում նշեցի անսպասելի տեղափոխությունների մասին։ Եվ եթե Նեմանյա Մատիչի տեղափոխությունը Հռոմ այդ շարքից չէ, ապա Դիբալայի տրանսֆերը, եկեք անկեղծ լինենք, շատերիս զարմացրեց։ Ի դեմս Պաուլոյի՝ Մոուրինյուն ստացավ հիանալի համալրում և այս պահի դրությամբ Դիբալա-Աբրահամ հարձակվողական դուետը բավականին ուժեղ է թվում։

Երեկ «Ռոման» թիմի երկրպագուներին Հռոմում ներկայացրել է աստղային նորեկին: Խաղացողի շնորհանդեսը ներառել է գեղեցիկ լուսային շոու: Արգենտինացուն ողջունելու էին եկել «Ռոմայի» հազարավոր երկրպագուներ։

Չի բացառվում, որ «Ռոման» ևս մեկ ֆուտբոլիստի ձեռք կբերի հարձակման գծում․ դա ավելի շատ կախված կլինի Զանոլոյի հետագա ճակատագրից (վերևում արդեն նշել էինք, որ նրա ծառայություններով հետաքրքրված է «Յուվենտուսը»)։ Բացի այդ, թիմից կարող է հեռանալ նաև Շոմուրոդովը, որի խաղից Մոուրինյուն այդքան էլ գոհ չէ։ Թիմը պատրաստվում է ուժեղացնել նաև կիսապաշտպանությունը և այդ դիրքում առաջնային թեկնածուն Ջորջինիո Վեյնալդումն է ՊՍԺ-ից, ով դեմ չէ միանալ հռոմեական ակումբին։ Տարբերակնեից մյուսը «Տոտենհեմի» կիսապաշտպան Տանգի Նդոմբելեն է, ում խաղային որակներին Ժոզեն քաջ ծանոթ է։

⚽ Այլ տրանսֆերներ

Ինչ վերաբերում է այլ ակումբների տրանսֆերային ակտիվությանը, ապա ուշադրություն է գրավում առաջնության նորեկ «Մոնցան»։ Սիլվիո Բեռլուսկոնիի թիմն ընդհանրապես ամենաակտիվներից է տրանսֆերային շուկայում թոփ-5 լիգաների ներկայացուցիչների շրջանում։ Ակումբի մարզական տնօրեն Գալիանին ավելի վաղ նշել էր, որ թիմը պայքարելու է լավագույն տասնյակում հայտնվելու համար։ Կարծես թե, այդ խոսքերը պարզապես ասված չէին ուշադրություն գրավելու համար, այլ իսկապես ակումբը լրջորեն նախապատրաստվում է առաջիկա մրցաշրջանին։ Թիմի տրանսֆերներից կարելի է առանձնացնել Անդրեա Ռանոչիայի («Ինտեր»), Անդրեա Կարբոնիի («Կալյարի») տրանսֆերները, ինչպես նաև «Մոնցան» վարձակալել է Մատեո Պեսինային («Ատալանտա»), Ստեֆանո Սենսիին («Ինտեր») և Ջանլուկա Կապրարիին («Վերոնա»)։

Շարունակում է ուժեղացնել կազմը նաև «Ֆիորենտինան»։ «Մանուշակները» Վլահովիչի հեռանալուց հետո նոր ռմբարկուի կարիք ունեին և այժմ թիմը համալրել է «Ռեալի» արդեն նախկին հարձակվող Լուկա Յովիչը։ Նշանակալի են նաև կիսապաշտպան Ռոլանդո Մանդրագորայի («Յուվենտուս») և բրազիլացի պաշտպան Դոդոյի («Շախտյոր») տրանսֆերները։ Ինչ-որ բան հուշում է, որ միայն այս տրանսֆերներով Ֆլորենիցան ներկայացնող ակումբը չի բավարարվի։

«Լացիոն» ևս ակտիվ է տրանսֆերային շուկայում։ Թիմը մի շարք նոր ֆուտբոլիստներ ձեռք բերեց այս ամառ, որոնցից կառանձնացնենք պաշտպան Ալեսոի Ռոմանյոլիի («Միլան»), դարպասապահ Լուիշ Մաշիմիանոյի («Գրանադա»), կիսապաշտպան Մարկոս Անտոնիոյի («Շախտյոր»), Ձագանիի և Կասալեի (երկուսն էլ՝ «Վերոնա») տրանսֆերները։ Կորուստներ ևս կան՝ Լուիս Ֆելիպե (տեղափոխվեց «Բետիս»), Թոմաս Ստրակոշա («Բրենտֆորտ»)։ Բավականին պասիվ է «Ատալանտան», որը դեռ աչքի չի ընկնում նոր ֆուտբոլիստներով կազմը համալրելով։ Միակ լուրջ ձեռքբերումը դա բրազիլացի կիսապաշտպան Էդերսոնն է, որի համար Բերգամոյի ակումբը «Սալերնիտանային» վճարել է 21 մլն եվրո։

Տրանսֆերային պատուհանը դեռ բաց կլինի մեկ ամսից մի փոքր ավել, այնպես որ, մեզ դեռ սպասվում են մի շարք հետաքրքիր տեղափոխություններ, միգուցե՝ կրկին որոշ անակնկալներ։