Կոնֆերենցիաների լիգայի որակավորման երկրորդ փուլում Հայաստանի փոխչեմպիոն «Արարատ-Արմենիան» կմրցի էստոնական «Պայդեի» հետ:
4-ամյա պատմություն ունեցող հայկական թիմի համար սա կլինի եվրագավաթային 3-րդ փորձը: Եվրագավաթներում «Արարատ-Արմենիայի» առաջին ելույթը 2019 թվականին էր՝ Բարձրագույն խմբի առաջնությանն իր մասնակցության առաջին տարում, երբ թիմը նվաճեց Հայաստանի չեմպիոնի կոչումը: Այդ տարի «Արարատ-Արմենիան» կարող էր պատմական արդյունք գրանցել, սակայն Լյուքսեմբուրգը ներկայացնող «Դյուդելանժին» Եվրոպա լիգայի փլեյ-օֆֆում զիջեց միայն 11-մետրանոց հարվածաշարով:
Հաջորդ մրցաշրջանում նույնպես Հայաստանի չեմպիոնի կարգավիճակով թիմը հանդես եկավ եվրագավաթներում և կրկնեց իր նախորդ տարվա նվաճումը, բայց այս անգամ «Արարատ-Արմենիայի» ճանապարհին կանգնեց սերբական «Ցրվենա Զվեզդան»: Այս տարի Հայաստանի փոխչեմպիոնը պայքարը սկսում է միանգամից երկրորդ փուլից: Առաջնության ավարիտից հետո թիմում մի շարք փոփոխություններ են եղել, կան մեծ թվով նորեկներ: Անվանի մասնագետ Վարդան Բիչախչյանի գլխավորությամբ «Պայդեյի» դեմ խաղը կլինի «Արարատ-Արմենիայի» առաջին պաշտոնական հանդիպումը:
«Պայդե», Էստոնիա
«Պայդեն» հիմնադրվել է 1990 թվականին: 2009 թվականից թիմը հանդես է գալիս Էստոնիայի Բարձրագույն լիգայում, որտեղ լավագույն արդյունքը գրանցել է 2020 թվականին՝ նվաճելով երկրի փոխչեմպիոնի կոչումը: Երկրի առաջնության վերջին մրցաշրջանում թիմը զբաղեցրել է 4-րդ տեղը: 2021 թվականի դեկտեմբերից թիմը գլխավորում է Կարել Վուլեյդը, որի գլխավորությամբ 2022 թվականին «Պայդեն» դարձավ Էստոնիայի Գավաթի խաղարկության հաղթող։
«Պայդեն» եվրագավաթներում
Էստոնական թիմի համար սա կլինի եվրագավաթային երկրորդ փորձը: Նախորդ տարի թիմը պայքարը սկսել էր Կոնֆերենցիաների լիգայի որակավորման առաջին փուլից, որտեղ երկու խաղերի արդյունքում զիջել էր լեհական «Շլյոնսկին» (2:1, 2:0): Կոնֆերենցիաների լիգայի ընթացիկ մրցաշրջանում էստոնական թիմն իսկական սենսացիայի հեղինակ դարձավ: Որակավորման առաջին փուլում թիմը կարողացավ պայքարից դուրս թողնել Թբիլիսիի «Դինամոյին»: Վրաստանում կայացած առաջին խաղում հյուրերը հաղթեցին 3:2 հաշվով, իսկ Էստոնիայում կայացած պատասխան խաղի հիմնական ժամանակն ավարտվեց վրացական թիմի՝ 2:1 հաշվով հաղթանակով: 11-մետրանոց հարվածաշարի արդյունքում էստոնական թիմը նվաճեց 2-րդ փուլի ուղեգիր:
Կազմը
Ըստ Transfermarkt-ի՝ «Պայդեի» ընդհանուր կազմի արժեքը 3 մլն 53 հազար եվրո է: Հայկական թիմի կազմի արժեքը գրեթե կրկնակի է՝ 5 մլն 690 հազար եվրո: «Պայդեի» կազմում հիմնական հանդես են գալիս տեղացի ֆուտբոլիստներ: Կան նաև ֆուտբոլիստներ Գանայից, Գամբիայից, Ուգանդայից:
Բուքմեյքերների կանխատեսումները
Բուքմեյքերական ընկերությունները հավատում են Հայաստանի փոխչեմպիոնի հաղթանակին: Վարդան Բիչախչյանի գլխավորած թիմի հաղթանակի համար սահմանված միջին գործակիցը 1.60 է, հյուրերի հաղթանակի համար սահմանված միջին գործակիցը 5.40 է, իսկ ոչ-ոքին՝ 4.00:
