VBET Հայաստանի Պրեմիեր լիգայի ավարտված առաջնությունը մարտաֆիլմ էր հիշեցնում․ մինչև վերջ «Փյունիկն» ու «Արարատ-Արմենիան» կռիվ էին տալիս չեմպիոնի կոչմանն արժանանալու համար։ Արդյունքում «Փյունիկը», որը մրցաշրջանում հիացնում էր ցույց տված բնավորությամբ, իրավունք ստացավ Չեմպիոնների լիգայում ներկայացնել Հայաստանը։ Շատ չանցած՝ իրար հետևից հայտարարվեց ֆուտբոլիստների՝ ակումբից հեռանալու մասին, որն անհանգստության ու թերահավատության ալիք բարձրացրեց երկրպագուների շրջանում․ նոր կազմով թիմը չի կարողանա պայքարել եվրագավաթներում։
ՉԼ առաջին որակավորման փուլի «Կլուժի» դեմ խաղից առաջ Հայաստանի չեմպիոնի գլխավոր մարզիչ Եղիշե Մելիքյանը ArmSport-ի հետ զրույցում ևս փաստեց, որ տրանսֆերներն ուշացած էին, բայց իրենք հաղթելու հնարավորություն, ամեն դեպքում, ունեն։ Երկար չխոսելով նախորդ տուրի մասին՝ պետք է միայն փաստել, որ «Փյունիկն» ապացուցեց՝ առաջնությունում ցույց տված բնավորությունն առանձին ֆուտբոլիստներինը չէր, այլ թիմինը։
Եվ արդեն վաղը Հայաստանի չեմպիոնը մրցաշարի երկրորդ որակավորման փուլում Երևանում կընդունի Լյուքսեմբուրգի չեմպիոն «Դյուդելանժին»։
Այս թիմի դեմ խաղալու փորձ ունենք․ 2019-ին Եվրոպա լիգայի որակավորման փլեյ-օֆֆում «Արարատ-Արմենիան» մրցում էր լյուքսեմբուրգյան թիմի դեմ։ Այդ դիմակայությունը ոչ ոք, երևի թե, չի մոռացել, երբ հետխաղյա 11-մետրանոցների արդյունքում երևանյան թիմը խմբային փուլի ուղեգիրը զիջեց «Փյունիկի» վաղվա մրցակցին (ի դեպ, «Դյուդելանժն» այդ ուղեգիրը նվաճում էր երկրորդ տարին անընդմեջ )։
Ինչպես մեր թիմի մարզիչ Ռոման Մոնարյովն է նշել նախախաղային ասուլիսի ժամանակ՝ «Դյուդելանժը» լուրջ, կազմակերպված մրցակից է, որին թերագնահատել պետք չէ։
«Դյուդելանժ»
«Ֆ91 Դյուդելանժը», որի կազմում հանդես է եկել նաև Հայաստանի ազգային հավաքականի հարձակվող Ալեքսանդր Կարապետյանը, հիմնադրվել է 1991 թվականին։
Թիմը տնային խաղերն անցկացնում է «Ստադ Յոս Նոսբաում» մարզադաշտում, որը տեղավորում է 2558 հանդիսական։
«Դյուդելանժի» կազմի 57,7%-ն օտարերկրացի է, թիմում կան ինչպես երիտասարդ, այնպես էլ փորձառու խաղացողներ։ Օրինակ՝ թիմի դարպասապահ և ավագ Ջոնաթան Ջուբերը 42 տարեկան է։
2018/19 մրցաշրջանում «Դյուդելանժը» դուրս եկավ Եվրոպա լիգա՝ դառնալով լյուքսեմբուրգյան առաջին թիմը, որը հասավ եվրագավաթների խմբային փուլ։ Արդեն հաջորդ տարի՝ 2019/20 մրցաշրջանում «Դյուդելանժը» 4-3 հաշվով հաղթեց Կիպրոսի ԱՊՈԵԼ-ին՝ դառնալով լյուքսեմբուրգյան առաջին թիմը, որ հաղթանակ է տանում եվրագավաթների խմբային փուլում։ Սակայն պետք է նշել, որ այս հաջողությունները գրանցած կազմը բավականին փոփոխվել է։
Հաջորդ հավանական մրցակիցները
Երևանյան ակումբը, եթե հաղթահարի երկրորդ փուլը, երրորդ փուլում կհանդիպի սերբական «Ցրվենա Զվեզդայի» հետ։ Դեռ վաղ է խոսել Սերբիայի չեմպիոնից, քանի որ այս պահին պետք է մտածել «Դյուդելանժի» արգելքը հաղթահարելու մասին։ Սակայն եթե «Փյունիկը», ոգեշնչված «Կլուժի» նկատմամբ տարած հաղթանակից, խաղադաշտում կարողանա նորից ի ցույց դնել իր բնավորությունը, «Դյուդելանժին» պայքարից դուրս թողնելն իրատեսական կլինի։
Հարկ է նշել նաև, որ այս զույգի պարտվողը Եվրոպա լիգայի երրորդ փուլում կհանդիպի ՉԼ-ում «Ժալգիրս»/«Մալմո» զույգի պարտվողի հետ։
Հիշեցնենք՝ «Փյունիկ»-«Դյուդելանժ» խաղը կկայանա այսօր՝ հուլիսի 19-ին, Վազգեն Սարգսյանի անվան «Հանրապետական» մարզադաշտում և կմեկնարկի ժամը 20:00-ին։ Հանդիպումը կսպասարկի անգլիական մրցավարական անձնակազմը։
Որպես վերջաբան
Սիրելի՛ երկրպագուներ, ձեր ներկայությունը շատ կարևոր է։ Մարզադաշտից աջակցենք Հայաստանի չեմպիոնին այս կարևոր խաղում։ Մուտքն ազատ է։
Ստելլա Բաբլոյան