Եվրո-2020, ընտրական փուլ, J խումբ, 8-րդ տուր. ժամը՝ 20:00 (Երևանի ժամանակով). Ք. Տուրկու, «Վերիտաս» մարզադաշտ. Ֆինլանդիա — Հայաստան
Տուրկու քաղաքը և «Վերիտաս» մարզադաշտը կարող են էական նշանակություն ունենալ Հայաստանի հավաքականի և առհասարակ հայկական ֆուտբոլի համար…
Նախորդ խաղից հիասթափված են բոլորը, և դա բնական է:
Ասում են, որքան էլ ծանր և երկար է տևում գիշերը, միևնույն է՝ հաջորդում է լուսաբացը: Այսօր նոր օր է, նոր ճակատամարտ, իսկ կռվից առաջ սովորաբար մոռանում են ամեն ինչ:
Մրցակիցը. որտե՞ղ «բռնել» ֆիններին
Միանգամից պետք է ասել, որ Ֆինլանդիայի հավաքականին բարդ է լինելու կոտրել: Տիմու Պուկին և ընկերները երկու անընդմեջ պարտությունից հետո «գազազած» են և սեփական հարկի տակ ամեն ինչ անելու են վերականգնել սասանված հեղինակությունը:
Իզուր չառանձնացրինք Պուկիին. ֆուտբոլիստ, ով միայնակ կարող է հարցեր լուծել: Հատկապես նրա հանդեպ պետք է ուշադիր լինել սեփական տուգանային հրապարակում և դրա մատույցներում: Հասկանալի է, որ ֆինների գլխավոր մարզիչ Մարկու Կաներվան մեզ համար բազում անակնկալներ է պատրաստել: Հնարավոր է՝ մրցակցի մեկնարկային կազմում տեսնենք 2 հարձակվող:
Պետք է պարզապես բացառել անհատական սխալները… բացառե՛լ, պարոն Գյուլբուդաղյանց: Մարտին Երևանում կայացած հանդիպումը ցույց տվեց, որ ֆինները վարպետ են սխալներից օգտվելու և առավելագույնը քաղելու հարցում:
Այո, մրցակցի կազմում շատ են բարձրահասակ ֆուտբոլիստները և մենք պետք է «ներքևից» գործենք: Բայց հարկ է ընդգծել, որ այս հանգամանքը մեր հաղթաթուղթը չէ. այնպես չէ, որ ներքևից կարճ և միջին տարածության վրա փոխանցումներ կատարելու դեպքում ամեն ինչ հեշտ է լինելու և 3 միավորը մեր գրպանում է լինելու: Ո՛չ: Ֆինների դեմ հատկապես այս հատվածում, հատկապե՛ս այս խաղում հաղթաթուղթը լինելու է անսխալ ֆուտբոլի, համագործակցության բարձր մակարդակի և դիրքային համաչափության շնորհիվ:
- Դիրքային համաչափություն
Կարող ենք ասել, որ մարտին ցուրտ երկրից ժամանած մեր հյուրերը չհաղթեցին մեզ, այլ մենք պարտվեցինք: Ֆուտբոլում մշտապես թիմը խաղում է այնքան, որքան մրցակիցը թույլ է տալիս: Մենք այդ խաղում շատ բան թույլ տվեցինք ֆիններին…:
Նման մակարդակի խաղերում պաշտպանությունը սկսվում է առջևի գծից: Կանխատեսելի է, որ տանտերերը վերահսկելու են գնդակի տեղաշարժը և րոպեներով այնքան են խաղարկելու, մինչև գտնեն ճեղքեր և ազատ գոտիներ: Պետք է հենց սա բացառել: Կարևոր է ընթեռնելի չլինել մրցակցի համար: Հնարավորություն, նույնիսկ հնարավորություններ միանշանակ լինելու են՝ լինի արագ հակագրոհի կամ անհատական անցումների տեսքով: Եթե թիմակիցները «փակ» լինեն, դարձյալ Բարսեղյանը կարող է «կրակել», Կարապետյանը կարող է ճիշտ պահին ճիշտ դիրքում հայտնվել և անակնկալի բերել մրցակիցներին…:
Կազմի ընտրություն
Ըստ ամենայնի՝ Գյուլբուդաղյանցը ունի պատասխան, թե ի՞նչ ենք առաջարկելու Ֆինլանդիային: Հարց է առաջանում՝ փակվե՞լ, թե՞ «տրվել» մրցակցի ֆուտբոլին: Ամեն դեպքում, ավելի համարձակ պետք էր խաղայինք Լիխտենշտեյնի դեմ, բայց ոչ այս անգամ և ոչ Ֆինլանդիայի դեմ: Այստեղ առաջին պլանում պետք է լինի խորամանկությունը.
Դարպասում Արամ Հայրապետյանին այլընտրանք չկա. նախ, նա ապահովել է այդ տեղը և այսպիսի խաղում «վիրահատական միջամտության» անհրաժեշտություն չկա:
Պաշտպանության կենտրոնում կարելի է անփոփոխ թողնել Հարոյան-Իշխանյան զույգը: Աջ եզրում Հովհաննես Համբարձումյանին նույնպես այլընտրանք չկա: Ինչ վերաբերում է ձախ եզրին, Արման Հովհաննիսյանից բացի դիտարկելու ենթակա է նաև Ժոաո Մոնրո Արարատը, ով հայտնել էր, որ ձախ եզրում նույնպես իրեն լավ է զգում:
Վերջին տարիներին ազգային հավաքականի կազմի ընտրության գլխավոր հարցերից մեկը հենակետայինի գոտին է: Հենակետային կիապաշտպանների հարցը շատ է տրվել Գյուլբուդաղյանցին, ով վերջին խաղերին որոշակիորեն կայունացրել էր դրությունը՝ հիմնականում ցույց տալով, որ կողմ է երկու հենակետայիններով խաղին: Կառլեն Մկրտչյանի բացակայության պայմաններում մեկնարկային կազմի ընտրության հարցում նորից ամեն ինչ միանշանակ չէ: Լիխերի դեմ սկսեցինք Ռումյան Հովսեփյանով, ըստ ամենայնի՝ ֆինների դեմ կլինեն 2 հենակետայիններ: Այստեղ հավանական է Գոռ Մալաքյանի ներկայությունը կազմում: Նախախաղային ասուլիսում Գյուլբուդաղյանցը նշեց, որ Արտակ Գրիգորյանը հնարավոր է բացակայի հայտացուցակից մարզմանը ստացած վնասվածքի պատճառով:
Մեծ է հավանականությունը, որ նախորդ խաղում ընտրված հարձակվողական առաջնագիծը էական փոփոխությունների կենթարկվի: Երկու հենակետայինի դեպքում առջևում հավանական է Մարկոսի ներկայությունը: Եզրերում Ղազարյանից, Բարսեղյանից, Ադամյանից, ովքեր թերևս ամենամոտն են մեկնարկային կազմում հայտնվելուն, պետք է ընտրել երկուսին: Այստեղ շատ-շատ կարևոր է ճիշտ հաշվարկել այն հանգամանքը, թե փոխարինման մտնելու դեպքում ո՞ր մեկը կարող է առավել օգտակար լինել: Հարձակման կրակագծում Ալեքսանդր Կարապետյանը նույնպես այս պահին անփոխարինելի է, և դժվար թե Գյուլբուդաղյանցի նախատեսած անակնկալը այդ դիրքի վրա ազդի:
Վերջաբանի փոխարեն
Ինչքան մոտենա հանդիպման մեկնարկը, այնքան սպասումը հաղթահարելու է օբյեկտիվ գիտակցմանը: Ոչ մեկ չի ցանկանում պարտվել: Այո, հավաքականը ազգի պատիվն է, որը միայն խոսելով չի ապացուցվում: Կարելի է պատերազմի մասին լավ գրել, բայց այլ բան է մարտի դաշտում կռվել: Ֆուտբոլում միշտ կան արդարացումներ, յուրաքանչյուր պարտություն կարելի է տանել, բայց առանց վերլուծությունների և ճիշտ գնահատականի հաղթանակները կմնան սարերի հետևում: Հուսով ենք, որ հավաքականի մարզչական շտաբը ճիշտ հետևություններ է արել նախորդ հանդիպումից և ներքին վստահության է հասել, որ առաջիկա հաղթանակը սկսվում է այդտեղից: Հայաստանի հիմնը հնչելու պահից 90 րոպե մենք՝ երկրպագուներս, մոռանում ենք քննադատությունները: Տղե՛րք, դուք խաղում եք ամբողջ հայ ժողովրդի համար, ձեզ համար մարդիկ ցավում են, ձեզնով ուրախանում են: Մտածեք միայն խաղի մասին, մտածեք մրցակցին տխրեցնելու մասին, դուք գլխիկոր եք թողել նախորդ հանդիպումից հետո: Ապացուցեք, բոլորին՝ մեզ, ձեզ, հավատացողներին ու չհավատացողներին, մրցակիցներին…: «Պատերազմում փլավ չեն բաժանում», ու դուք ամենալավը գիտեք դա: Ուշադիր եղեք յուրաքանչյուր րոպե, պատմությունն այդպես է գրվում…
Արման Առաքելյան
