Այս շաբաթ մեկնարկում է Չեմպիոնների Լիգայի 1/4 եզրափակիչը։ Ակումբային գլխավոր մրցաշարի այս փուլ է հասել 8 ակումբ՝ երեքական անգլիական և իսպանական, մեկական գերմանական և պորտուգալական։
Զույգերի միջև առաջին հանդիպումները կկայանան այս շաբաթ․
Ապրիլի 5
«Մանչեսթեր Սիթի»-«Ատլետիկո»
«Բենֆիկա»-«Լիվերպուլ»
Ապրիլի 6
«Չելսի»-«Ռեալ»
«Վիլյառեալ»-«Բավարիա»
Բոլոր հանդիպումները կմեկնարկեն Երևանի ժամանակով 23։00-ին։
«Բենֆիկա»-«Լիվերպուլ» և «Վիլյառեալ»-«Բավարիա» խաղերի մասին շատ բան ասելու կարիք չկա։ Այս զույգերում ֆավորիտներն ակնհայտ են։ Գերմանացի մարզիչների՝ Կլոպի և Նագելսմանի թիմերը պետք է որ առանձնապես դժվարություններ չունենան այս խաղերում, չնայած, ինչպես հաճախ եմ նշում՝ անակնկալներ կարող են լինել ցանկացած մրցաշարում, սա ֆուտբոլ է․․․ «Բենֆիկայի» համար արդեն իսկ մեծ հաջողություն է այս փուլում հայտնվելը, «Վիլյառեալին» էլ շատերը չէին սպասում 1/4-ում, այնպես որ, հարգանքներս այս ակումբներին և նրանց երկրպագուներին, բայց, հավանաբար, անգլիական և գերմանական գրանդների համար այս հանդիպումները կարող են «նախավարժանք» լինել կիսաեզրափակչից առաջ։ Չնայած, եթե անկեղծ, զգացողություն կա, որ դիմակայության երկու հանդիպումներից մեկում թե «արծիվները», թե «դեղին սուզանավը» կարող են և մեզ զարմացնել․․․
Փորձագետների և երկրպագուների գնահատականներով՝ «Մանչեսթեր Սիթին» ևս ակնհայտ ֆավորիտ է «Ատլետիկոյի» հետ խաղում։ Նույնիսկ Սիմեոնեն է նշել․ «Վստահ եմ, որ նրանք մեզնից լավ խաղացողներ ունեն։ «Մանչեսթեր Սիթին» և «Բավարիան» մրցաշարի ֆավորիտներ են՝ իրենց խաղացողների առանձնահատկությունների պատճառով»։ Եվ գիտե՞ք ինչ․․․ դե․․․ հենց այդպես էլ կա․․․ Համեմատելով ներկայիս «Ման․ Սիթին» և Սիմեոնեի թիմը, կարելի է ասել, որ նրանք գտնվում են տարբեր քաշային կարգերում։
«Բայց նախորդ մրցաշրջանում հաղթեց «Չելսին», և դա շատերը չէին սպասում»,- ավելացրել է Սիմեոնեն։ Եվ այստեղ ևս համաձայն եմ Դիոգոյի հետ։ Եթե երեք զույգերից առանձնանցնենք այն աութսայդերին, որը կարող է «Չելսի» անել, դա հենց «Ատլետիկոն» է։ Համենայն դեպս, երկու հանճարեղ մարզիչների դիմակայությանը հետաքրքիր կլինի հետևել։
«Չելսի»-«Ռեալ»… ահա այն զույգը, որը, միանշանակ, այս փուլում կենտրոնականն է։ Մրցաշարի գործող չեմպիոնը ներկայումս ոչ այնքան «բարենպաստ» իրավիճակում է գտնվում։ Եվ այստեղ բոլորվին խաղային ասպեկտների մասին չէ խոսքը, այլ ակումբի շուրջ ստեղծված իրավիճակի, որն անշուշտ անդրադառնում է նաև խաղացողների տրամադրության և հոգեվիճակի վրա։ Սակայն, մյուս կողմից էլ, նույն խնդիրները կարող են լրացուցիչ լիցքեր հաղորդել թիմին, որն արդեն դուրս է մնացել ԱՊԼ-ում չեմպիոնական մրցավազքից և կարող է կենտրոնանալ ՉԼ-ում հաջող հանդես գալու վրա։ Հիշեցնում է նախորդ մրցաշրջանը, չէ՞․․․
«Ռեալում» այս պահին առանձնապես կադրային խնդիրներ չկան, եթե չհաշվենք Ազարի բացակայությունը, ինչպես նաև Անչելոտիի քովիդով հիվանդ լինելը։ Հաշվի առնելով լոնդոնցիների՝ վերը նշված խնդիրները, այս դիմակայությունում, երկու խաղերի հանրագումարով, հնարավոր է մադրիդյան գրանդը մի փոքր առավելություն ունի, բայց, կրկնվեմ, մի փոքր․․․ Իսկ ահա վաղվա խաղում, սեփական հարկի տակ, «Չելսին» կարող է ուրախացնել սեփական երկրպագուներին։ Համենայն դեպս, ամենայն հավանականությամբ, այս դիմակայության ելքը կվճռվի պատասխան խաղում․․․
Չենք մոռանում, խաղերը մեկնարկում են 23։00-ին․․․ Բոլորիս ցանկանում եմ դիտարժան ֆուտբոլ, առողջ եղեք, կհանդիպենք կիսաեզրափակչից առաջ․․․
