Այն ակումբները, որոնք շեշտը դնում են մանկապատանեկան ֆուտբոլի վրա, մեծ ապագա ունեն. Կարեն Ավոյան

Տարեսկզբին ՀՖՖ-ն հայտնեց ֆուտբոլի Հայաստանի տարբեր տարիքային հավաքականներում մարզչական նշանակումների մասին: 

Հայաստանի մինչև 14 տարեկանների հավաքականի գլխավոր մարզչի պաշտոնում նշանակվեց Կարեն Ավոյանը: Երիտասարդ մարզիչը մրցաշրջանի սկզբից «Նոայի» մարզչական շտաբում էր, նախկինում մարզել է հունական մի շարք թիմեր:   

ArmSpоrt-ի հետ զրույցում Ավոյանը խոսել է հավաքականը գլխավորելու և այլ թեմաների մասին:

-Ինչպե՞ս ստացվեց, որ գլխավորեցիք մինչև 14 տարեկանների հավաքականը:

-Ֆեդերացիայի կողմից ստացա հրավեր գլխավորելու հավաքականը: Մենք այս տարիքի հավաքական չենք ունեցել: Սա առաջին փորձն է:

-Հասցրե՞լ եք ծանոթանալ ֆուտբոլիստների հետ:

-Ֆուտբոլիստների հետ՝ դեռ ոչ: Դեռ գտնվում ենք ֆուտբոլիստների ընտրության փուլում: Բոլոր տարիքային հավաքականների մարզիչների հետ կանցկացնենք սելեկցիա: Մոտ օրերս մեծ թվով ֆուտբոլիստներ կհրավիրվեն հավաքական:

-Ինչպե՞ս կգնահատեք հայ պատանի ֆուտբոլիստների մակարդակը: Շատ է խոսվում, որ մենք ունենք տաղանավոր պատանիներ, բայց ինչ-որ տարիքից սկսած նրանք կամ հեռանում են ֆուտբոլից կամ չեն կարողանում օգտագործել ամբողջ պոտենցիալը:

-Ասեմ, որ շատ բարդ հարց է, և չեմ կարող միանաշանակ պատասխան տալ, բայց կարող եմ հստակ ասել, որ անհրաժեշտ է նոր մեթոդիկաներ կիրառել: Ինչու չէ՝ օգտվել այն մեթոդիկաներից, որոնք կիրառում են արտասահմանում, իսկ դրա համար ակումբները պետք է ունենան բարձրակարգ մասնագետներ, ֆիզիկական պատրաստության մարզիչներ, վերլուծաբաններ և այլն:  Ցավոք սրտի, ֆուտբոլը դարձել է պրոֆեսիոնալ բինզես և իմ նշած կարևորագույն դետալներին շատ քիչ են ուշադրություն դարձնում: Այն ակումբները, որոնք շեշտը դնում եմ մանկապատանեկան ֆուտբոլի վրա, նրանք մեծ ապագա են ստեղծում իրենց համար:

-Դուք հաճախ եք սեմինարների մասնակցում արտերկրում: Որտե՞ղ եք եղել վերջին անգամ:

-Վերջին շրջանում երկու շաբաթ Բարսելոնայում ներկա եմ եղել «Էսպանյոլի» մարզումներին, որից հետո վերապատրաստում եմ անցել Դոնեցկի «Շախտյորի» մարզչական շտաբում: Դա ինձ համար շատ մեծ պրակտիկա էր: Երկու շաբաթ հնարավորություն ունեցա մանրամասն ծանոթանալ ուկրաինական ակումբի մարզումային գործընթացին , ներկա եղա ընկերական խաղերին: Մի քանի անգամ հանդիպում ունեցա թիմի գլխավոր մարզիչ Ռոբերտո դե Զերբիի հետ:

-Ի՞նչ զրույց եք ունեցել դե Զերբիի հետ

-Հիմնականում ներկայացրել է իր աշխատանքի մեթոդիկան, խոսել ենք մարզչական փիլիսոփայությունից: Ծանոթացել եմ նաև նաև ֆիթնես մարզչի հետ, ունեցել ենք տարբեր քննարկումներ:

-Ի՞նչ տվեց ձեզ այս վերապատրաստումը:

-Շատ յուրահատուկ էր դե Զերբիի աշխատանքը: Նա ունի յուրահատուկ տակտիկական մտահաղացումներ: Միասին վերլուծեցինք «Մանչեսթեսր Սիթիի» խաղերից մեկը և կիսվեց ինձ հետ իր տեսակետով: Ցանկանում եմ շնորհակալություն հայտնել Խավիեր Մինյանոյին, Անտոլի Գոնսալեսին և իսպանացի մյուս մարզիչներին, որոնց տված գիտելիքի շնորհիվ այսօր հեշտությամբ կարողանում եմ հասկանալ այլ մարզիչների փիլիսոփայությունը:

— Ինչպիսի՞ն կլինի մեր 14 տարեկանների հավաքականը։ 

–Հայաստանում այս կարճ ժամանակահատվածում մարզիչների կրթությունը մեծ աճ է գրանցել, շնորհիվ իսպանացի մասնագետների: Հուսով եմ՝ կկարողանանք օգնել մեր ֆուտբոլիստներին աճ գրանցել, բայց դրա համար ժամանակ է անհրաժեշտ: Առաջին հերթինաԱկումբները պետք է ունենան անհատական փիլիսոփայություն, մոտեցում: Օրինակ՝ «Էսպանյոլում» 14 տարեկանների թիմից սկսած բոլոր ունեն gps համակարգ: Տարբեր տարիքային թիմերում ֆիզիկական պատրաստության մարզիչները տարբեր են: Ֆուտբոլում մանրուքներ չկան և շատ կարևոր է ունենալ կրթված մարզիչներ: Առիթից օգտվելով ցանկանում եմ շնորհակալություն հայտնել ՀՖՖ–ին՝ վստահության համար։ Հուսով եմ, կկարողանամ արդարացնել սպասելիքները։