Կոնֆերենցիաների լիգայի խմբային փուլում վաղը՝ հոկտեմբերի 21-ին, «Ալաշկերտը» կընդունի ավստրիական ԼԱՍԿ-ին:
Խաղից առաջ կայացած ասուլիսին մեր թիմի գլխավոր մարզիչ Միլան Միլանովիչը պատասխանել է լրագրողների հարցերին․
-Արտակ Գրիգորյանը կարմիր քարտի պատճառով բաց կթողնի խաղը, ինչպե՞ս եք լրացնելու նրա բացը։
-Նրա բացակայության պայմաններում կխաղա Ռումյան Հովսեփյանը։ Կարծում եմ՝ նա բոլոր անհրաժեշտ որակներն ունի, որ եվրագավաթային խաղերում օգնի թիմին։
-«Ալաշկերտը» անբարենպաստ դիրքում է առաջնությունում, ինչպե՞ս եք դուրս գալու այս վիճակից։
-Դժվարանում եմ պատասխանել՝ ինչու է թիմն այս դիրքը գրավում, քանի որ վերջերս եմ գլխավորել թիմը։ Իմ գլխավոր նպատակը թիմին այս վիճակից դուրս բերելն է։ Մարզումների ու խաղերի ընթացքում տեսնում եմ, թե թիմն ինչ ներուժ ունի, ինչ որակյալ խաղացողներ։ Պիտի ջանասիրաբար աշխատանքով ձգտենք շտկել առաջնությունում իրավիճակն ու միավորներ վաստակել եվրագավաթներում։
-Ի՞նչ կասեք ԼԱՍԿ-ի մասին։
Թիմը բավականին մեծ ներուժ ունի։ Լավ եզրային խաղացողներ։ Բավականին ուժեղ մրցակից է։
-Մեր թիմը հոգեբանական և ֆիզիկական ի՞նչ վիճակում է։
-Հոգեբանական առումով աշխատանքներ ունենք անելու, ֆիզիկականում առաջընթաց կա։ Հոգաբանական տեսանկյունից հաղթանակ է պետք, ինչը մթնոլորտը կլավացնի թիմում։ Կփորձենք վաղը հաղթել։