Մոտ երկշաբաթյա դադարից հետո այսօր կմեկնարկի Ֆուտբոլի VBET Հայաստանի Պրեմիեր լիգայի 9-րդ տուրը: Այս տուրով կավարտվի առաջնության առաջին շրջանը:
9-րդ տուրը կմեկնարկի «Նոա»-«Սևան» խաղով:
«Նոա»-«Սևան». 15.10.21 (Ավանի ակադեմիայի մարզադաշտ)
Գործող փոխչեմպիոնը անհաջող սկսեց առաջնությունը՝ առաջին տուրում 1-7 հաշվով պարտվեց «Արարատին»: Այնուհետև Արամ Հակոբյանի գլխավորած թիմը 2-1 հաշվով հաղթեց ԲԿՄԱ-ին, իսկ հաջորդիվ պարտվեց «Փյունիկին» (1-2) ու «Արարատ-Արմենիային» (5-2): Վերջին 3 խաղերում «Նոան» հաղթանակ է տարել «Վանի» (2-1) և «Ուրարտուի» նկատմամբ, ու անցկացրած 7 խաղից հետո 10 միավորով 5-րդ տեղում է:
Առաջնության նորեկ «Սևանը» շարունակում է վերելքը: Անցկացրած 8 խաղից հետո թիմը 15 միավորով 3-րդն է: Հատկանշական է, որ «Սևանը» դարձավ ընթացիկ առաջնությունում առաջին թիմը, որը միավորներ խլեց առաջատար «Արարատ-Արմենիայից»: Անցկացրած խաղերից հետո թիմը տարել է 4 հաղթանակ, կրել 1 պարտություն և 3 խաղ ավարտել ոչ-ոքի:
«Փյունիկ»-«Ալաշկերտ». 15.10.21 (Հանրապետական մարզադաշտ)
Գործող չեմպիոն «Ալաշկերտը» ընթացիկ առաջնությունում անցկացրած 6 խաղից հետո մրցաշարային աղյուսակի նախավերջին տեղում է՝ 5 միավորով: Ուշագրավ է, որ «դեղիններն» ընթացիկ առաջնությունում իրենց առաջին հաղթանակը տարան միայն նախորդ տուրում՝ այն էլ հետնապահ «ԲԿՄԱ»-ի հետ խաղում: Գործող չեմպիոնը շարունակում է ելույթները նաև Կոնֆերենցիաների լիգայում: Միլան Միլանովիչի գլխավորությամբ երևանյան թիմը Հայաստանի առաջնությունում դեռ խաղ չի անցկացրել: Նոր մարզչի գլխավորությամբ «Ալաշկերտն» անկասկած նոր մոտիվացիայով կմոտենա «Փյունիկի» հետ խաղին:
«Փյունիկն» անպարտելի է արդեն 5 խաղ: Առաջնության երկրորդ տուրում «Նորավանքին» 2:1 հաշվով պարտվելուց հետո Մելիքյանի թիմը հետզհետե բարելավեց դիրքերը մրցաշարային աղյուսակում: Անցկացրած 8 խաղերում երևանյան թիմը 4 հաղթանակ է տարել, 2 խաղում պարտություն է կրել, ևս երկուսն ավարտել ոչ-ոքի: Այդ խաղերում թիմը խփել է 11, բաց թողել 7 գոլ:
«Վան»-«Ուրարտու». 16.10.21 (Չարենցավանի քաղաքային մարզադաշտ)
9-րդ տուրից առաջ «Ուրարտուն» անցկացրել է 7 խաղ: Թիմը վստահ մեկնարկեց՝ խոշոր հաշվով հաղթանակների հասնելով «Սևանի» և «Նորավանքի» նկատմամբ: Վերջին 3 խաղերում Ռոբերտ Արզումանյանի թիմը պարտություն է կրել, ինչի արդյունքում նահանջեց մրցաշարային աղյուսակում, և այժմ 9 միավորով 6-րդ տեղում է:
«Վանն» այս մրցաշրջանում աչքի է ընկնում անկայունությամբ: Մեկնարկային երկու պարտություններից հետո թիմը հաղթեց Ալաշկերտին, ոչ-ոքի խաղաց Փյունիկի հետ, պարտվեց «Նոային» ու «Արարատ-Արմենիային»: Ի դեպ, առաջատարները չարենցավանյան թիմի դեմ խաղում միայն ավելացված ժամանակում կարողացան հաղթական գոլ խփել: Անցկացրած 8 խաղից հետո թիմը 7 միավորով 8-րդ տեղում է:
«Արարատ-Արմենիա»-«Արարատ». 17.10.21 (Ֆուտբոլի ակադեմիայի մարզադաշտ)
Տուրի կենտրոնական խաղը կկայանա հոկտեմբերի 17-ին՝ Ավանի ակադեմիայի մարզադաշտում: Առաջատար «Արարատ-Արմենիան» կմրցի հետապնդող «Արարատի» հետ: «Արարատ-Արմենիան» անցկացրած 8 խաղից հետո 22 միավորով առաջատար է: Գունկոյի թիմը միավորներ կորցրեց միայն վերջին տուրում՝ ոչ-ոքի խաղալով «Սևանի» հետ: Անցկացրած 8 խաղում առաջատարը խփել է 21 գոլ, բաց թողնելով 5-ը:
«Արարատը» առաջատարից հետ է մնում 4 միավորով և հաղթանակի դեպքում ընդհուպ կմոտենա նրան: Բիչախչյանի գլխավորած թիմն անցկացրած 8 խաղերից 6-ում հաղթել է, երկուսում պարտություն կրել: Մեկնարկային 3 անընդմեջ հաղթանակներից հետո արարատցիների հաղթարշավն ընդհատեց «Սևանը»: Եվս մեկ պարտություն թիմը կրել է 8-րդ տուրում՝ «Փյունիկից»:
ԲԿՄԱ-«Նորավանք». 17.10.21 («Հանրապետական» մարզադաշտ)
Տուրը կեզրափակվի առաջնության նորեկների դիմակայությամբ: Աղյուսակը եզրափակող ԲԿՄԱ-ն «Հանրապետական» մարզադաշտում կընդունի «Նորավանքին»: Անցկացրած 8 խաղից հետո բանակայինները միավոր չեն վաստակել, և 5 խփած, ու 18 բաց թողած գոլով եզրափակում են մրցաշարային աղյուսակը:
Վայոց Ձորը ներկայացնող թիմը 4 պարտություն է կրել ընթացիկ առաջնությունում, երկու խաղ ավարտել է ոչ-ոքի, ևս երկուսում հաղթանակ է տարել: Երիտասարդ մարզիչ Վահե Գևորգյանի գլխավորությամբ 2-րդ տուրի խաղում թիմը հաղթել է «Փյունիկին», իսկ վերջին խաղում առավելության է հասել «Վանի» նկատմամբ:
9-րդ տուրից առաջ մրցաշարային աղյուսակն ունի հետևյալ տեսքը.
N | Թիմեր | Խ | Հ | Ո | Պ | ԽԳ | ԲԳ | Մ |
---|---|---|---|---|---|---|---|---|
1. | Արարատ-Արմենիա | 8 | 7 | 1 | 0 | 21 | 5 | 22 |
2. | Արարատ | 8 | 6 | 0 | 2 | 18 | 8 | 18 |
3. | Սևան | 8 | 4 | 3 | 1 | 11 | 6 | 15 |
4. | Փյունիկ | 8 | 4 | 2 | 2 | 11 | 7 | 14 |
5. | Նոա | 7 | 3 | 1 | 3 | 10 | 17 | 10 |
6. | ՈՒրարտու | 7 | 3 | 0 | 4 | 9 | 10 | 9 |
7. | Նորավանք | 8 | 2 | 2 | 4 | 6 | 11 | 8 |
8. | Վան | 8 | 2 | 1 | 5 | 8 | 12 | 7 |
9. | Ալաշկերտ | 6 | 1 | 2 | 3 | 4 | 9 | 5 |
10. | ԲԿՄԱ | 8 | 0 | 0 | 8 | 5 | 18 | 0 |