Ցանկալի կլիներ, որ մենք լիարժեք կազմով մասնակցեինք, բայց վնասվածքների պատճառով չենք կարող լիարժեք կազմով ներկայանալ աշխարհի առաջնությանը: Այս մասին ArmSport-ի հետ զրույցում ասաց հունահռոմեական ոճի ըմբշամարտի Հայաստանի հավաքականի գլխավոր մարզիչ Էդուարդ Սահակյանը:
Այս անգամ աշխարհի առաջնությանը չեն մասնակցելու Կարապետ Չալյանն ու Օլիմպիական չեմպիոն, աշխարհի եռակի չեմպիոն Արթուր Ալեքսանյանը:
«Արթուր Ալեքսանյանը նոր է ամբողջովին վերականգնվել վնասվածքից: Արթուրը դեռ իր խոսքը կասի, նա դեռ պայքարի մեջ է: Կարապետ Չալյանը մեջքի բուժումներ է անցնում և այս շաբաթ կվերջացնի ու տարեվերջին կմասնակցի Հայաստանի առաջնությանը: Նրանց քաշային կարգերում մասնակից չենք ունենալու: Մնում է երիտասարդները աճեն նրանց կողքին: Իհարկե, դա մի փոքր երկար գործընթաց է: Քաշեր կան, որ արդեն մեծ պայքար կա, այդ պատճառով կարող եմ ասել, որ այս տարի Հայաստանի առաջնությունը շատ հետաքրքիր է լինելու: Ալեքսանյանն ու Չալյանը լիարժեք պատրաստ կլինեն հաջորդ տարվա մրցումներին»,-ասաց Էդուարդ Սահակյանը:
Հոկտեմբերի 2-ին մեկնարկած ըմբշամարտի աշխարհի առաջնությունում հունահռոմեայան ոճի ըմբշամարտի Հայաստանի հավաքականը կմասնակցի 8 ըմբիշով՝ նրանցից մի քանիսն առաջին անգամ կմասնակցեն Աշխարհի առաջնությանը: Տարվա կարևորագույն ստուգատեսերից մեկին կմասնակցեն 55 կգ քաշային Նորայր Հախոյանը, 60 կգ քաշային Գևորգ Ղարիբյան, 63 կգ քաշային Հրաչյա Պողոսյանը, 67 կգ քաշային Սլավիկ Գալստյանը, 72 կգ քաշային Մալխաս Ամոյանը, 82 կգ քաշային Գեղամ Թորգոմյանը, 87 կգ քաշային Արթուր Շահինյանն ու 130 կգ քաշային Դավիթ Օվասապյանը:
Կազմն ընտրվել է ըմբիշների ցույց տված արդյունքների հիման վրա:
«Հույս ունենք, որ երիտասարդները լավ են մասնակցելու ու բոլորից էլ մեդալներ սպասում ենք: Եթե ինչ-որ մեկից մեդալի հույս չունենանք, չենք գործուղի»,-ասաց Սահակյանը:
Խոսելով սպասելիքների մասին մարզիչը նշեց. «Ըմբշամարտն այնպիսի մարզաձև է, որ ոչինչ չես կարող հստակ ասել, բայց ունենք ոսկու հավակնորդներ, և հույս ունենք, որ կարդարացնեն մեր սպասելիքները»:
Բացի Հայաստանի առաջնությունից այս տարի ըմբիշները կմասնակցեն նաև բանակայինների աշխարհի առաջնությանն ու մինչև 23 տարեկանների աշխարհի առաջնությանը: