Հայաստանի ազգային հավաքականը սկսել է մարզական հավաքը՝ ԱԱ-2022-ի ընտրական փուլի՝ հոկտեմբերին կայանալիք խաղերին նախապատրաստվելու համար: Խոակին Կապառոսի գլխավորությամբ հավաքական հրավիրված 25 ֆուտբոլիստից երևանյան հավաքին միացել են միայն 14-ը՝ VBET Հայաստանի Պրեմիեր Լիգայում հանդես եկող խաղացողները:
Իսկ հավաքականի հայտացուցակը նախորդ խաղերի համեմատ բավականին փոփոխությունների է ենթարկվել.
Չինացի ծովահենը․ մեր ընտրանու երկար սպասված նորեկը
Արգենտինահայ կիսապաշտպան Լուկաս Սելարայանի՝ Հայաստանի հավաքականին միանալու մասին խոսակցությունները վաղուց էին շրջանառվում, և վերջապես դա տեղի ունեցավ:
Ֆուտբոլային կարիերայում բավականին տպավորիչ ճանապարհ անցած 29-ամյա ֆուտբոլիստը, վստահաբար, նոր գույն ու որակ կհաղորդի մեր ընտրանու խաղին: Սելարայանը նաև տուգանայինների ֆանտաստիկ իրացնող է, ինչն, անկասկած, ամենաուրախալի կետերից է մեր ընտրանու համար:
Սելարայանը բավականին լավ տրամադրությամբ և լավ մարզավիճակում կմիանա Կապառոսի թիմին. օրերս նրա թիմը՝ ամերիկյան «Կոլումբուս Քրյուն» Campeones cup-ի եզրափակչում 2-0 հաշվով հաղթեց մեքսիկական «Կրուս Ասուլին», իսկ Սելարայանը ճանաչվեց հանդիպման լավագույն ֆուտբոլիստ:
Եվս մեկ՝ ոչ պակաս սպասված համալրում
«Որքան էինք սպասել․․․ Իր համբերատար, ամենօրյա քրտնաջան աշխատանքի արդյունքում Ժիրայր Մարգարյանն առաջին անգամ Ազգային հավաքականում է». ահա այսպես արձագանքեց «Արարատի» մամուլի քարտուղարությունը Մարգարյանի՝ Հայաստանի հավաքական հրավիրվելուն: Եվ իսկապես, 24-ամյա պաշտպանը Ազգային թիմից հրավերի իրավունքը վաղուց էր վաստակել: Արդեն երկար տարիներ Մարգարյանը՝ սկզբում Գյումրիի «Շիրակում», հիմա նաև «Արարատում», կայուն ֆուտբոլ է ցուցադրում և լավագույններից է իր դիրքում:
Անակնկալներ հայտացուցակում
Առաջիկա՝ անչափ կարևոր խաղերի համար մեր ընտրանու հայտացուցակը որոշակի հարցեր, այդուհանդերձ, առաջացնում է: Դրանցից, թերևս, ամենագլխավորը 22-ամյա գյումրեցի կիսապաշտպան Վահան Բիչախչյանի բացակայությունն է:
Բիչախչյանը դարձել է «Ժիլինայի» հիմնական կազմի խաղացողներից մեկը, գտնվում է հիանալի մարզավիճակում, իսկ հավաքականի սեպտեմբերյան խաղերից հետո նա «Ժիլինայի» կազմում ընդհանուր առմամբ 5 հանդիպման է մասնակցել և դարձել 3 գոլի հեղինակ:
Ազգայինի հայտացուցակից բացակայում է նաև 20-ամյա խոստումնալից կիսապաշտպան Ժիրայր Շաղոյանը: Այդուհանդերձ, վերջինս հրավիրվել է Հայաստանի երիտասարդական հավաքական, որն առաջիկայում Եվրոպայի Մ21 տարեկանների առաջնության որակավորման փուլի 2 հանդիպում է անցկացնելու: Հոկտեմբերի 7-ին Հայաստանի Մ-21 հավաքականը Երևանում կմրցի Սերբիայի հասակակիցների հետ, իսկ հոկտեմբերի 12-ին՝ կհյուրընկալի Հյուսիսային Մակեդոնիայի մինչև 21 տարեկանների հավաքականին:
Կապառոսի հրապարակած հայտացուցակից բացակայում է նաև 29-ամյա կոլումբացի կիսապաշտպան Վբեյմար Անգուլոյի անունը, որը վերջին անգամ մեր ընտրանու կազմում մասնակցել է Գերմանիայի դեմ ջախջախիչ պարտությանը (0-6):
Հիշեցնենք՝ այս անգամ հավաքական չի հրավիրվել նաև Հովհաննես Համբարձումյանը, որը Գերմանիայի հետ այդ խաղում ազդրի մկանային վնասվածք էր ստացել ու դեռևս չի վերականգնվել:
Հավաքականի ընդհանուր հայտացուցակը, հիշեցնենք, այս տեսքն ունի՝
Դարպասապահներ
Դավիդ Յուրչենկո — «Ալաշկերտ»
Անատոլի Այվազով — «Ուրարտու»
Ստանիսլավ Բուչնև — «Փյունիկ»
Պաշտպաններ
Վարազդատ Հարոյան — «Կադիս» (Իսպանիա)
Անդրե Չալըշըր — «Սիլկեբորգ» (Դանիա)
Կամո Հովհաննիսյան — «Կայրաթ» (Ղազախստան)
Ժոաո Ժորդի Արարատ Մոնրոյ — «Նոա»
Դավիթ Տերտերյան — «Արարատ-Արմենիա»
Ժիրայր Մարգարյան — «Արարատ»
Տարոն Ոսկանյան — «Ալաշկերտ»
Հրայր Մկոյան — «Արարատ»
Կիսապատշպաններ
Հենրիխ Մխիթարյան — «Ռոմա» (Իտալիա)
Էդուարդ Սպերցյան — «Կրասնոդար» (Ռուսաստան)
Տիգրան Բարսեղյան — «Աստանա» (Ղազախստան)
Խորեն Բայրամյան — «Ռոստով» (Ռուսաստան)
Սոլոմոն Ուդո — «Ատիրաու» (Ղազախստան)
Էրիկ Վարդանյան — «Փյունիկ»
Արտակ Գրիգորյան — «Ալաշկերտ»
Կարեն Մուրադյան — «Արարատ-Արմենիա»
Ալիկ Առաքելյան — «Արարատ»
Արտյոմ Ավանեսյան — «Արարատ-Արմենիա»
Հարձակվողներ
Սարգիս Ադամյան — «Հոֆենհայմ» (Գերմանիա)
Լուկաս Սելարայան — «Կոլամբուս Կրյու» (ԱՄՆ)
Իշխան Գելոյան — «Բալթիկա» (Ռուսաստան)
Ալեքսանդր Կարապետյան — «Նոա»
Հայաստանի ազգային հավաքականը ՖԻՖԱ ԱԱ 2022 որակավորման փուլի J խմբում նախ հոկտեմբերի 8-ին Ռեյկյավիկում կհյուրընկալվի Իսլանդիային, ապա 3 օր անց Բուխարեստում կմրցի Ռումինիայի ընտրանու հետ։