Միջազգային Օլիմպիական կոմիտեն արդեն տևական ժամանակ Օլիմպիական խաղերը վերածել է շոուի: Իհարկե, հասկանալի է, որ քառամյակի կարևորագույն ստուգատեսի անցկացման համար միլիարդավոր դոլարներ են ծախսվում, և ՄՕԿ-ը, ինչպես նաև կազմակերպիչ երկիրը, խնդիր ունեն ծախսերը կոմպենսացնելու, բայց դրանից տուժում է սպորտը, ու նաև այն մարզիկները, որոնք իսկապես քրտինք են թափում հաջողության հասնելու համար: Տարբեր երկներին ու կազմակերպություններին չնեղացնելու համար օլիմպիական մեդալները կամա թե ակամա իրենց հասցեատերերն են ունենում դեռևս խաղերից առաջ: Տոկիո 2020-ում Հայաստանի մեդալները կարող էին կրկնակի լինել, եթե Միջազգային Օլիմպիական կոմիտեն կամայականորեն չորոշեր, որ Հայաստանը ծանրամարտում պետք է ներկայանա ընդամենը երկու մարզիկով: Իհարկե, ՄՕԿ-ն այս ամենը պատճառաբանում է դոպինգի հետ կապված նախկինում եղած խնդիրներով, որոնք իրականում եղել են ավելի քան տասը տարի առաջ, ու այն մարզիկները, ովքեր պետք է ներկայացնեին Հայսատանը այդ ժամանակ նույնիսկ սպորտով չէին զբաղվում: Դոպինգային սկանդալի պատճառով Տոկիո 2020-ին ռուս մարզիկները ներկայացան առանց Ռուսաստանի դրոշի և հիմնի, ինչը բացասական արձագանք ունեցավ մարզաշխարհի ներկայացուցիչների շրջանում: Բռնցքամարտի Հայաստանի կանանց հավաքականի մարզիչ, Հայաստանի և ԽՍՀՄ վաստակավոր մարզիչ, Ֆիզկուլտուրայի և սպորտի վաստակավոր գործիչ Ռաֆայել Մեհրաբյանը մեզ հետ զրույցում նշում է, որ դա սխալ որոշում էր, ինչն անկասկած գցեց Օլիմպիական խաղերի շուքը.
«Ժամանակին Օլիմպիական խաղերին մասնակցում էին միայն ուժեղագույնները, իսկ այսօր պատկերն այլ է, ինչը գցում է Օլիմպիական խաղերի հետաքրքրությունը: Ես մասնակցել եմ 9 Օլիմպիական խաղերի ու ինձ համար ակնառու է, որ Խաղերն աստիճանաբար կորցնում են իրենց հետաքրքրությունը, քանի որ ոչ բոլոր ուժեղագույններն են մասնակցում: Խաղերը դարձրել են շոու: Ռուսաստանին իրենց դրոշի ներքո մասնակցելուց զրկելը նույնպես շոու էր , ինչ-որ տեղ նաև քաղաքական շոու: Ռուսաստանը մի երկիր է, որը միշտ ուժեղ կազմով է մասնակցել Օլիմպիական խաղերին և այս անգամ նույնպես: Եվ ի՞նչ է թվում՝ եթե ռուս մարզիկի հաղթանակից հետո Ռուսաստանի հիմնը չէր հնչում, միթե՞ բոլորը չէին հասկանում, որ հաղթողը ռուս մարզիկ է: Կամ ինչու՞ ընդամենը մեկ հայ ծանրորդի թույլ տվեցին մասնակցել Օլիմպիական խաղերին: Պայքարից դուրս մնաց օլիմպիական արծաթե մեդալակիրը, մինչդեռ նրա արդյունքը երաշխավորված մեդալ էր Հայաստանի համար»:
Մեհրաբյանը նաև անդրադարձավ բռնցքամարտը Օլիմպիական խաղերից հանելու վիճահարույց հարցին: Վաստակաշատ մարզիչը նշում է, որ հանցագործործություն կլինի Օլիմպիական խաղերի ակունքներում գտնվող մարզաձևը կամայականորեն դուրս թողնել.
«Ինչպե՞ս կարելի է մտածել բռնցքամարտը Օլիմպիական խաղերի ցանկից դուրս թողնելու մասին: Օլիմպիական խաղերը ձևավորվել են հենց բռնցքամարտի ու էլի այդպիսի հարուստ ավանդույթներ ունեցող մարզաձևերի հիման վրա: Եթե կան մարզաձևեր, որոնք արժանի են մտնել օլիմպիական ցանկ, թող ավելացնեն, բայց ոչ բռնցքամարտի հաշվին: Բռնցքամարտի մրցաշարերը միշտ մեծ հետաքրքրություն են վայելում, իսկ Օլիմպիական խաղերի ժամանակ բռնցքամարտի մարզադահլիճը միշտ լեփ լեցուն է լինում»,–ասում Մեհրաբյանը:
Բռնցքամարտն օլիմպիական խաղերից հանելու միտքը խստորեն դատապարտում է նաև Խորհրդային Միության կրկնակի չեմպիոն, Եվրոպայի գավաթակիր, Միջազգային կարգի ԱԻԲԱ-ի մրցավար Սուրեն Ղազարյանը, ով մեզ հետ զրույցում նկատում է․
«Բռնցքամարտը Օլիմպիական խաղերից հանելը սարսափելի որոշում կլինի: Դա արհամարհանք ու վիրավորական քայլ կլինի մարզաձևի ներկայացուցիչների նկատմամբ: Բռնցքամարտը աշխարհի լավագույն մարզաձևերից մեկն է, իսկապես տղամարդկային մարզաձև: ԱԻԲԱ-ի նախագահ Ումար Կրեմլյովն էլ արդեն ամեն ինչ անում է, որպեսզի մարզաձևն ավելի զարգանա ու շտկվեն մրցավարական խնդիրները» :
Հիշեցնենք, որ Միջազգային Օլիմպիական կոմիտեն AIBA- ի ղեկավար Ումար Կրեմլյովին նամակ է ուղարկել և կրկին մտահոգություն հայտնել բարեփոխումների առթիվ: ՄՕԿ-ը դեռ երկմտում է 2024 թվականի Փարիզի Օլիմպիական խաղերում բռնցքամարտն ընդգրկելու հարցում: Ըստ ՄՕԿ-ի՝ խնդիրներն առնչվում են մասնավորապես մրցավարությանն ու ֆինանսավորմանը, թեպետ բռնցքամարտում ֆինանսական խնդիրներ վաղուց արդեն չկան: Վերջին շրջանում բռնցքամարտի բոլոր տարիքային խմբերի Աշխարհի ու Եվրոպայի առաջնություններում կան խոշոր մրցանակային ֆոնդեր, իսկ հոկտեմբերի 24-ին մեկնարկող Աշխարհի առաջնությունում լինելու է գերխոշոր մրցանակային ֆոնդ՝ 2,6 մլն դոլար, ինչպիսին չի եղել ոչ մի օլիմպիական մարզաձևի Աշխարհի առաջնությունում:
