«Նոա» ակումբը ՀՖՖ նախագահի պաշտոնում թեկնածու չառաջադրեց, իսկ որպես Գործկոմի անդամ առաջադրեց ակումբի գործադիր տնօրեն Արթուր Սահակյանի թեկնածությունը։ Վերջինս երկար տարիներ զբաղվել է ֆուտբոլով, իսկ 2017 թվականից՝ ֆուտբոլիստի կարիերան ավարտելուց հետո, ղեկավար պաշտոն է ստանձնել նախ «Արցախ», ապա՝ «Նոա» ակումբում։
ArmSport-ի հետ զրույցում «Նոայի» 27-ամյա տնօրենը պատմել է ՀՖՖ Գործկոմի կազմում ընդգրկվելու հավանականության, հայկական ֆուտբոլի զարգացման իր տեսլականի, ինչպես նաև ակումբային գործերի մասին․
Որևէ մեկին «համոզելու» կարիք չունեմ
«Որպես գործադիր կոմիտեի անդամ՝ մեր ակումբից առաջադրվել է իմ թեկնածությունը։ Ճիշտն ասած «համոզելու» կարիք չունեմ։ ՀՖՖ անդամ բոլոր կազմակերպությունների հետ ծանոթ եմ ու ավելորդ անգամ ներկայանալու կարիք չունեմ։ Կներկայացնեմ իմ մտքերը, թե ինչպես եմ պատկերացնում հայկական ֆուտբոլի զարգացումը, ունեմ մտահաղացումներ։ Բայց նախևառաջ պետք է ընտրել ՀՖՖ նախագահ, ինչից հետո Գործադիր կոմիտեի յուրաքանչյուր անդամ կարող է առաջարկություններով հանդես գալ»,- ասում է Արթուր Սահակյանն ու ընդգծում, որ լավ գիտի հայկական ֆուտբոլի առջև ծառացած խնդիրների ու առաջնահերթ լուծում պահանջող հարցերի մասին․
«Գրեթե ողջ գիտակցական կյանքս հայկական ֆուտբոլում եմ՝ նախ որպես ֆուտբոլիստ, ապա նաև ակումբի գործադիր տնօրեն: Քաջատեղյակ եմ մեր ֆուտբոլի խնդիրներին՝ տարբեր հարթություններից, առիթ լինելուն պես պետք է բարձրաձայնեմ այն խնդիրները, որոնց շուտափույթ լուծում պետք է տրվեն։
- Առաջնային խնդիրներից մեկը մանկապատանեկան ֆուտբոլի զարգացումն ապահովելն է։ Այն մեր ֆուտբոլի հիմքն է։
- Պետք է պաշտպանել բոլոր ֆուտբոլիստների իրավունքները.
- Մրցավարական դպրոցը զարգացնել
- Առաջնության այս ձևաչափին՝ 6+4, կողմ չեմ, քանի որ մրցաշարային աղյուսակի վերջին 4 հորիզոնականների թիմերն առաջնության երկրորդ հատվածում անգործության են մատնվելու։ «Երևանը» մրցակցությունից դուրս է, իսկ այն 3 թիմերը, ստացվում է, 4 հանդիպում են անցկացնելու և վերջ։ Կարծում եմ՝ հաջորդ մրցաշրջանում ձևաչափը կփոխվի։
- Առաջնահերթ լուծում պահանջող ու կարևոր հարցերից է նաև սեփական դաշտ ու մարզումային բազա չունենալը։ Կարծում եմ՝ ֆեդերացիան պետք է հնարավորինս օգնի թիմերին ու տրամադրի պայմաններ,որպեսզի թիմերն էլ իրենց կողմից դրան մի բան ավելացնեն ու զարգացնեն։ Ֆեդերացիան պետք է փորձի թիմերին ապահովել դաշտերով։ Գիտեի, որ Սևանի մարզադաշտն արդեն պետք է պատրաստ լիներ, Հոկտեմբերյանի և Վանաձորի մարզադաշտերը ևս։ Թիմերը չունեն մարզումային դաշտեր։ Կան մարզադաշտեր էլ, որոնք իրոք օգնության ու ֆինանսի կարիք ունեն։ Կարելի է փոքր ֆինանսներով այդ մարզադաշտերը վերակառուցել ու պատրաստել Բարձրագույն խմբի խաղերին։
- Պետք է պայքարել պայմանավորված խաղերի դեմ և մեկընդմիշտ ազատվել նմանատիպ երևույթներից
- Վերանայել Առաջին ու Բարձրագույն խմբի առաջնություններում լեգեոներների լիմիտը, ինչպես նաև մի շարք այլ հարցեր
Եթե տեսնենք՝ ՀՖՖ նախագահի ընտրություններն արդար մթնոլորտում չեն անցկացվում, առաջինը կբարձրաձայնենք այդ մասին
«Ժամանակը շատ կարճ էր ու հատուկ նախապայմաններ կային՝ վերջին 5 տարուց 2-ը ֆուտբոլային գործունեություն։ Շատ երկար չմտածեցինք։ Գիտեինք՝ շատ թեկնածուներ են լինելու։ Որոշեցինք չառաջադրել մեր թեկնածուին, այլ ծանոթանալ մնացած թեկնածուների ծրագրերին ու սատարել այն թեկնածուին, որի ծրագիրն ավելի ընդունելի ու հոգեհարազատ կլինի մեզ համար։ Շուտով կհայտնենք մեր դիրքորոշումը ներկայիս 3 թեկնածուների վերաբերյալ»,- Արթուր Սահակյանն այսպես է մեկնաբանում «Նոայի»՝ ՀՖՖ նախագահի սեփական թեկնածու չառաջադրելու որոշումը։
Օրերս ՀՖՖ-ի Գործադիր կոմիտեի հերթական նիստի ընթացքում որոշվել էր կասեցնել 7 ՀԿ-ների անդամակցությունը ֆուտբոլի ֆեդերացիային։ Արդյոք սա բավարա՞ր է ՀՖՖ նախագահի արդար ընտրություններ անցկացնելու համար․
«Որքանով՝ տեղյակ եմ ֆեդերացիայի ժողովի ընթացքում տեղի է ունենալու քվեարկություն ու այդ քվեարկությամբ որոշվելու է՝ արդյոք այս ՀԿ-ները նախագահի ընտրություններում զրկվելու՞ են ձայնի իրավունքից, թե՞ ոչ։
Անկախ նրանից այդ ՀԿ-ները կհեռացվեն, թե ոչ, պետք է ապահովվի արդար ընտրություն։ Մենք հիմա հայտնվել ենք այնպիսի իրավիճակում ու ապրում ենք այնպիսի երկրում, որտեղ ամեն գնով պետք է կատարվեն արդար ընտրություններ, լինի վստահելի մթնոլորտ։ Եթե տեսնենք, որ ընտրությունն արդար մթնոլորտում չի իրականացվում, առաջիններից կլինենք, որ դրա մասին կբարձրաձայնենք։
Մենք չենք ցանկանում որևէ ՀԿ-ին ֆեյք կամ կեղծ որակել, քանի որ կան ՀԿ-ներ, որոնք գուցե գործունեություն են ծավալում, բայց մենք տեղյակ չենք։ Մեր գործը չէ նրանց ֆիլտրելը կամ նրանց դեմ գործելը»,- ասում է Արթուր Սահակյանը։
Պայքարելու ենք երկու ճակատով
«Նոան» վերջերս դուրս եկավ VBet Հայաստանի Գավաթի խաղարկության կիսաեզրափակիչ, առաջնության ձմեռային հատվածն էլ ավարտեց 6-րդ տեղով։ Արթուր Սահակյանն ասում է՝ իրենք երկու ճակատով են պայքարելու։
«Պայքարելու ենք երկու ճակատով՝ առավելագույն պայքար մղելով բոլոր մրցակիցների դեմ։ Շատ հաճելի է, որ Գավաթի խաղարկությունում պայքարը շարունակում ենք, քանի որ Գավաթը հնարավորություն է տալիս մի քանի հանդիպումների շնորհիվ դուրս գալ Եվրոպա լիգա։ Պայքարելու ենք մաքսիմալ հնարավորությունների չափով։ Ձմռանը ևս կլինեն փոփոխություններ ու հուսամ՝ կհասնենք մեր նպատակին ու Եվրոպա լիգայի ուղեգիր կնվաճենք»։
«Նոան» ձմեռային արձակուրդից կվերադառնա հունվարի 12-ին։ Հունվարի 13-ին ու 14-ին կիրականացվեն բժշկական ստուգումներ, իսկ արդեն հունվարի 15-ից թիմի ֆուտբոլիստները կսկսեն մարզումներն ու նախապատրաստությունն առաջնության մնացած հատվածին։
Արթուր Սահակյանի խոսքով, թիմը երկու հավաք կանցկացնի ձմեռային դադարի ընթացքում․
«Երկու հավաք ենք պլանավորում․ մեկը Հայաստանում, մյուսը՝ Անթալիայում։ Հոկտեմբերին մեր գլխավոր մարզչի հետ մեկնել էինք Անթալիա, գտանք մեզ հարմար տարբերակն ու արդեն փետրվարին կմեկնենք արտասահմանյան հավաքի։ Թե որտեղ կանցկացնենք հայաստանյան հավաքը, դեռևս հայտնի չէ, քանի որ բանակցություններ են ընթանում։ Ամեն դեպքում, ամբողջ հունվար ամիսը գտնվելու ենք Հայաստանում»։
«Նոայի» գործադիր տնօրենը մեզ հետ զրույցում պատմեց նաև սպասվելիք համալրումների ու կադրային փոփոխությունների մասին․
«Կազմում կլինեն փոփոխություններ։ Այժմ մեր սպորտային բաժինը զբաղված է այդ հարցերով։ Ինչպես գիտեք, օրերս խզվել են պայմանագրերը 3 ֆուտբոլիստի` Ալեկսեյ Տուրիկի, Դավիթ Մանոյանի և Արման Մելիքսեթյանի հետ։ Առաջիկա օրերին մեկ-երկու փոփոխություն ևս հնարավոր է լինեն։ Կարծում եմ՝ 3-4 նորեկ կունենանք։ Նոր ֆուտբոլիստների հետ կապված աշխատանքները սկսել ենք դեռ հոկտեմբեր ամսից»։
Չգիտեմ՝ պարոն Լոռեցյանն ինչու էր այդպես ասում
«Նոայի» գործադիր տնօրենը, խոսելով «Միկա» մարզադաշտի շուրջ ստեղծված իրավիճակի մասին, ընդգծեց, որ իրենք դեռ հոկտեմբերին ներկայացրել են ներդրումային ծրագիր ու սպասում են հետագա զարգացումներին․
«Մեր ակումբի կողմից ներդրումային ծրագիր է ներկայացվել Հայաստանի ֆուտբոլի ֆեդերացիա, որտեղ մենք մեր մտահաղացումները և ֆինանսական ծրագիրն ենք ներկայացրել՝ կապված մարզադաշտը վերանորոգելու հետ։ ՀՖՖ-ն մեզ հավաստիացրել էր, որ նրանք ևս իրենց ծրագիրը կներկայացնեն ու սպորտի նախարարության բալանսից մարզադաշտը կտեղափոխվեր ՀՖՖ բալանս։ Դրանից հետո ֆուտբոլի ֆեդերացիան պետք է ընդուներ կամ չընդուներ մեր առաջարկը։ Այն, ինչ ներկայացնում էր պարոն Լոռեցյանը, ինձ համար անհասկանալի էր, քանի որ երբ մենք ֆեդերացիայի ներկայացուցչի հետ «Միկա» մարզադաշտում քննարկում էինք շինարարական պլանը և այն, թե մենք ինչպես ենք պատկերացնում այդ ամենը, նա ևս ներկա էր։
Ինձ համար զարմանալի էր, որ նա ասում էր, թե մեր հետաքրքրությունն ընդամենը խոսակցությունների մակարդակում է եղել։ Թե ինչու էր այդպես ասում, չգիտեմ»,- ասում է Արթուր Սահակյանն ու նշում, որ «Միկայում» շինարարական աշխատանքների լուրջ կարիք կա՝ ինչպես խոտածածկի, այնպես էլ՝ տրիբունաների, հանդերձարանների հետ կապված․
«Մենք հաստատակամ ենք և այժմ պետք է սպասենք ՀՖՖ նախագահի ընտրություններին, ինչից հետո կմտածենք այդ ուղղությամբ»։
Թիմի ելույթներից գոհ եմ
Խոսելով «Նոայի» ելույթների ու ցուցադրած խաղի մասին՝ Արթուր Սահակյանն իր գոհունակությունը հայտնեց ու ամփոփեց այս ամիսների կատարած աշխատանքը․
«Ճիշտն ասած մարզչի նշանակումը շատ ուշ եղավ, ու նա ընդամենը 1 ամիս ժամանակ ուներ թիմին նախապատրաստելու համար։ Ուսումնամարզական հավաք անցկացրինք Թբիլիսիում, ու եթե ուշադիր լինեք, այժմյան հիմնական կազմից 5-6 ֆուտբոլիստ թիմին միացավ ուսումնամարզական հավաքի երկրորդ հատվածից։ Այսինքն, մրցաշրջանին նախապատրաստվելու համար ունեին ընդամենը 10 օր ժամանակ։
Ֆունկցիոնալ առումով պատրաստ չէին։ Իսկ մրցաշրջանի մեկնարկից հետո՝ օգոստոսի վերջին ու սեպտեմբերի սկզբին, 3-4 նորեկ ունեցանք, որոնք հետագայում դարձան հիմնական կազմի խաղացողներ։ Կարող եմ ասել, որ մինչ հոկտեմբեր, թիմը դեռ կայունացման փուլում էր ու մարզչին դժվար էր ընտրել հիմնական կազմը։ Հոկտեմբերից սկսած թիմն ընդգծված խաղային ձեռագիր ձեռք բերեց, սկսեց կայուն խաղ ցուցադրել և այդ հատվածից սկսած բավականին հաջող ելույթներ ունեցավ։ Վստահ եմ՝ հաջող ելույթները շարունակական կլինեն նաև գարնանային հատվածում։ Ընդհանուր առմամբ թիմի ելույթները շատ լավ եմ գնահատում»։
Մեծ ուշադրություն նաև մարքեթինգին
«Նոան» արդեն իսկ նաև զարգացած ու բավականին կայացած բրենդ է։ Արթուր Սահակյանն ընդգծում է՝ իրենք մեծ ուշադրություն ու կարևորություն են տալիս նաև մարքեթինգին․
«Մեզ մոտ մեծ ուշադրություն է դարձվում նաև մարքեթինգին։ Փորձում ենք լինել մաքսիմալ կազմակերպված՝ լի նոր մտահաղացումներով։ Ստեղծել ենք լավ թիմ, լավ կոլեկտիվ՝ ինչպես ֆուտբոլի, այնպես էլ ադմինիստրացիայի տեսանկյունից։ Միահամուռ ուժերով փորձում ենք հասնել հաջողության»։
Առաջիկա ծրագրերում՝ «Նոա-2»-ի ստեղծում ու սեփական ակադեմիայի հիմնում
Մեծ հավակնություններ ունեցող ակումբում, մանկապատանեկան ֆուտբոլի զարգացման ֆոնին, կարևորում են նաև սեփական ակադեմիայի ու բազայի հիմնումն, ինչն ակումբի ղեկավարների ծրագրերում է։
«Այս ամսին մեր ակումբի ղեկավարները մեկնելու են արտասահման՝ նայելու ֆուտբոլային ակադեմիաներ։ Հաջորդ տարվանից նախատեսում ենք ունենալ սեփական ակադեմիան։ Այժմ 8 մանկապատանեկան թիմ ունենք, բայց չկա կոնկրետ ուղղվածություն, քանի որ չունենք սեփական բազա։ Առանց դրա դժվար է հաջողության հասնել։ Ունենք երիտասարդ ֆուտբոլիստներ, ովքեր խաղային պրակտիկա չեն ստանում հիմնական թիմում։ Հաջորդ տարվանից կունենանք նաև մեր երկրորդ թիմը՝ «Նոա-2»-ը» ,- եզրափակեց իր խոսքը Արթուր Սահակյանը։
Նարե Հովհաննիսյան