Հայաստանի ազգային հավաքականի գլխավոր մարզչի պաշտոնակատար կնշանակվի մեր ընտրանու ֆիզպատրաստության մարզիչ Խավյեր Մինյանոն:
Այս մասին հայտնում է Telegram-ի Notes of the Dark Knight ալիքը:
Շատ շուտով Հայաստանի հավաքականը կսկսի նախապատրաստությունը Եվրո-2020-ի ընտրական փուլի վերջին 2 տուրին, բայց Արմեն Գյուլբուդաղյանցի հրաժարականից հետո ՀՖՖ-ն դեռևս փոխարինող չի գտել նրան:
Աղբյուրը նշում է, որ գլխավոր մարզչին փոխարինող այդպես էլ չի գտնվել ու, ամենայն հավանականությամբ, հավաքականի մնացած խաղերում թիմի ղեկը կվստահվի իսպանացի մասնագետին, որն ընդգրկված է նաև «Վալենսիայի» մարզչական շտաբում:
Նշվում է նաև, որ ՀՖՖ-ն Հունաստանի և Իտալիայի հետ առաջիկա խաղերի համար հավաքականի գլխավոր մարզչի պաշտոնն առաջարկել է Սուրեն Չախալյանին, բայց «Փյունիկի» մարզիչը մերժել է այն:
Ինչ վերաբերում է Մինյանոյին, ապա հայտնի է, որ նա եղել է Վիսենտե դել Բոսկեի օգնականը: 11 տարի աշխատել է «Ռեալում», երկու անգամ հաղթել է Չեմպիոնների լիգայում (2000, 2002): 8 տարի ընդգրկված է եղել Իսպանիայի հավաքականի մարզչական շտաբում՝ դառնալով աշխարհի (2010) և Եվրոպայի (2012) չեմպիոն:
Մինյանոն նաև «Բեշիքթաշի», «Ռասինգի» և Հարավային Կորեայի հավաքականի հետ աշխատելու փորձ ունի:
