Հայկական ֆուտբոլում հասունանում է իրավական նոր սկանդալ։ Ինչպես վկայում են «Դատալեքս» դատական տեղեկատվական համակարգի տվյալները, Երևանի քաղաքացիական դատարանը վարույթ է ընդունել ՀՖՖ Գործադիր կոմիտեի անդամ Աննա Օհանյանի հայցն ընդդեմ Հայաստանի ֆուտբոլի ֆեդերացիայի։
Խոսքը վերաբերում է ՀՖՖ Գործկոմի՝ 2026 թվականի հունիսի 27-ին ընդունված որոշմանը, որով հաստատվել էր «ՀՖՖ պրոֆեսիոնալ ֆուտբոլի մրցումների անցկացման կանոնակարգը (2026-2027 մրցաշրջան)»։ Հայցվոր Աննա Օհանյանը պահանջում է անվավեր ճանաչել այս փաստաթուղթը։
Հիշեցնենք, որ հենց այս կանոնակարգով էր սահմանվել լեգիոներ ֆուտբոլիստների քանակի վերաբերյալ նոր, բուռն քննարկումների առիթ դարձած սահմանափակումը. ակումբներին թույլատրվում է մրցաշրջանի հայտացուցակում (ներառյալ առաջին և երկրորդ թիմերը) ունենալ առավելագույնը 15 արտասահմանցի ֆուտբոլիստ։
Ըստ հայցվորի՝ որոշման ընդունման մեխանիզմը չի համապատասխանել սահմանված նորմերին, ինչն էլ դարձել է իրավական վեճի պատճառ։
Այսպիսով, լեգիոներների հարցը տեղափոխվել է իրավական դաշտ։ Այժմ Երևանի քաղաքացիական դատարանը պետք է քննության առնի հայցվորի փաստարկները և գնահատական տա, թե արդյոք ՀՖՖ Գործադիր կոմիտեն որոշումը կայացնելիս պահպանել է անհրաժեշտ ընթացակարգային կանոնները։
