ՈւԵՖԱ-ի Կոնֆերենցիաների լիգայի որակավորման երրորդ փուլի շրջանակում «Նոան» պատրաստվում է կարևորագույն դիմակայության. առաջին խաղում երևանյան ակումբը տանը կընդունի շվեյցարական «Սյոնին»։ Հանդիպմանն ընդառաջ կայացած մամուլի ասուլիսի ընթացքում լրագրողների հարցերին պատասխանել է թիմի հարձակողական ոճի կիսապաշտպան Գոռ Մանվելյանը։
«Ինձ շատ լավ եմ զգում, գտնվում եմ լավ մարզավիճակում։ Զգում եմ մարզչի վստահությունը և անում եմ ամեն ինչ՝ թիմին օգտակար լինելու համար։ Կարծում եմ՝ մենք կարող ենք հաղթել ցանկացած մրցակցի։ Գիտակցում ենք, որ ուժեղ թիմի դեմ ենք խաղալու, և մեզ բարդ հանդիպում է սպասվում, բայց մենք պատրաստ ենք դրան։
Մեր թիմի նորեկների մակարդակը շատ բարձր է։ Արագ ենք հարմարվում նրանց հետ խաղալուն, ինչը բավականին հեշտ է ստացվում։ Շատ լավ ֆուտբոլիստներ են, և վստահ եմ, որ ժամանակի ընթացքում խաղակցվածությունն ավելի կբարելավվի։
Այս ամենն ինձ շատ է մոտիվացնում։ Հասկանում եմ, որ իմ դիրքում պետք է շատ օգնեմ թիմին՝ գոլերով և գոլային փոխանցումներով։ Ինձ համար ամենակարևորը հենց դա է՝ թիմի հաղթանակը։
Գիտենք, որ բարդ ճանապարհ ունենք անցնելու, բայց, ինչպես արդեն նշեցի, մենք լիովին պատրաստ ենք։ Ամեն օր տքնաջան աշխատում ենք այդ ուղին հաղթահարելու համար, և վստահ եմ, որ դաշտում կանենք առավելագույնը»,- նշել է Գոռ Մանվելյանը։
Հիշեցնենք, որ Կոնֆերենցիաների լիգայի «Նոա» – «Սյոն» առաջին հանդիպումը կկայանա վաղը՝ օգոստոսի 6-ին, և կմեկնարկի Երևանի ժամանակով 20:00-ին։
