Պորտուգալիայի ազգային հավաքականի գլխավոր մարզիչ Ռոբերտո Մարտինեսն աշխարհի առաջնության ավարտից հետո կհեռանա զբաղեցրած պաշտոնից։ Ինչպես հայտնում են մարզական լրագրողներ Բեն Ջեյքոբսն ու Ալեքս Կրուկը, 52-ամյա իսպանացի մասնագետն արդեն որոշում է կայացրել չերկարաձգել Պորտուգալիայի ֆուտբոլի ֆեդերացիայի հետ ընթացիկ ամռանն ավարտվող պայմանագրի ժամկետը։
Նշվում է, որ Մարտինեսը կլքի հավաքականը՝ անկախ Մունդիալում թիմի գրանցած վերջնական արդյունքներից։ Ակնկալվում է, որ մարզիչը կարող է վերադառնալ ակումբային ֆուտբոլ (մասնավորապես՝ նա բաց է Անգլիայի Պրեմիեր լիգա տեղափոխվելու համար) կամ գլխավորել մեկ այլ ազգային հավաքական։
Հիշեցնենք, որ Ռոբերտո Մարտինեսը պորտուգալական ընտրանու ղեկը ստանձնել է 2023 թվականի հունվարին։ Նրա գլխավորությամբ թիմը հասցրել է դառնալ ՈւԵՖԱ-ի Ազգերի լիգայի հաղթող։
ԱԱ-2026-ի խմբային փուլում պորտուգալացիներն ընդգրկված են նույն խմբում Կոնգոյի ԴՀ-ի, Ուզբեկստանի և Կոլումբիայի հավաքականների հետ։ Մրցաշարում իրենց մեկնարկային հանդիպումը Պորտուգալիայի հավաքականը կանցկացնի հունիսի 17-ին՝ ուժերը չափելով Կոնգոյի ԴՀ-ի ընտրանու դեմ։ Խաղի մեկնարկային սուլիչը կհնչի Երևանի ժամանակով 21։00-ին։
