Մյունխենի «Բավարիայի» գլխավոր մարզիչ Վենսան Կոմպանին կիսվել է Չեմպիոնների լիգայի կիսաեզրափակիչի՝ ֆրանսիական ՊՍԺ-ի դեմ կայանալիք պատասխան հանդիպման սպասելիքներով:
— Սա Ձեր մարզչական կարիերայի ամենակարևոր հանդիպումն է։ Այսօր կկարողանա՞ք հանգիստ քնել։
«Այո, առանց որևէ խնդրի կքնեմ։ Ես նույնիսկ ճնշում չեմ զգում այս խաղից առաջ։ Պարզապես կատարում եմ իմ աշխատանքն ու հանգիստ քնում եմ»։
— Արդյո՞ք ՊՍԺ-ն ամենաուժեղ թիմն է, որի դեմ երբևէ մրցել եք որպես մարզիչ։
«Չեմ սիրում վարկանիշային աղյուսակներ կազմել։ Վերջին տարիներին նրանք Եվրոպայի ուժեղագույն թիմն էին, հաղթել են Չեմպիոնների լիգայում։ Բացի բարձր որակից և մարզչական աշխատանքից, կարևոր է նաև թիմի տարիքը. նրանք շարունակում են զարգանալ և սովորել։ Սա մի թիմ է, որին մենք անչափ հարգում ենք, և որի դեմ խաղալը շատ բարդ է։ Սակայն մենք նաև հավատում ենք ինքներս մեզ և վստահ ենք, որ կարող ենք վաղը հաղթել»։
— Ի՞նչ կասեք Միկել Արտետայի այն հայտարարության մասին, ըստ որի՝ Բունդեսլիգայի և Լիգա 1-ի ակումբներն ավելի շատ հանգստի հնարավորություն ունեն, քան Անգլիայի Պրեմիեր լիգայի թիմերը։
«Չեմ ցանկանում շատ մեկնաբանել դա։ Ես երկար տարիներ խաղացել եմ Պրեմիեր լիգայում։ Չեմ կարծում, որ դա «Բավարիայի» կամ ՊՍԺ-ի հասցեին հնչած քննադատություն էր. ավելի շուտ՝ պարզապես քննարկում էր։ Անգլիայի առաջնությունում 38 հանդիպում կա, գավաթային խաղարկություններ, չկա ձմեռային դադար։ Նման քննարկումները միանգամայն նորմալ են, ժամանակին Յուրգեն Կլոպն էլ էր այդ մասին խոսում»։
— Նախապատրաստվե՞լ եք արդյոք հետխաղյա 11 մետրանոցների հարվածաշարին։
«Իհարկե, մենք ունենք ցուցակ և իրացնողների հստակ հերթականություն։ Բայց մենք որևէ ֆուտբոլիստի չենք պարտադրի հարվածել, եթե նա չի ցանկանում կամ իրեն պատրաստ չի զգում։ Այս հարցը քննարկվել է դեռևս երեք ամիս առաջ՝ Գերմանիայի գավաթի խաղերին ընդառաջ։ Դա մրցաշրջանի երկրորդ հատվածի մարզումային գործընթացի անբաժանելի մասն է, ուստի վաղը ոչ մի ինքնաբուխ որոշում չի լինելու»։
— Բաց թողած գոլերի քանակը Ձեզ անհանգստացնո՞ւմ է, թե՞ դա թիմի խաղաոճի մի մասն է կազմում։
«Մեր գլխավոր նպատակը խաղերում հաղթելն է։ Մենք ունենք գաղափարներ, որոնք, մեր համոզմամբ, օգնում են հասնել դրան։ Արդեն ապացուցել ենք, որ կարող ենք մեծ հաշիվներով հաղթել. ՊՍԺ-ն՝ նույնպես։ Ի վերջո, պետք է մրցակցից պարզապես մեկ գոլով ավելի խփել։ Իհարկե, եթե հնարավոր է հաղթել առանց գնդակ բաց թողնելու՝ դա իդեալական տարբերակն է»։
— Ակնկալո՞ւմ եք կրկին բաց և դիտարժան խաղ։
«Ամեն ինչ կախված է թիմերից։ Եթե որևէ մեկը որոշի նահանջել ու ավելի շատ պաշտպանվել, հնարավոր են ավելի հանգիստ խաղային փուլեր։ Եթե ոչ՝ ապա դրանք պարզապես չեն լինի։ Դժվար է պատկերացնել, որ որևէ թիմ կփոխի այն ձեռագիրը, որն իրեն հասցրել է մինչև այս փուլ։ Մենք խաղում ենք տանը, ցանկանում ենք հաղթել և դրա համար կանենք առավելագույնը», — Կոմպանիի խոսքերն է մեջբրում Bayern & Germany-ն։
Հիշեցնենք, որ պատասխան հանդիպումը կկայանա մայիսի 6-ին (Երևանի ժամանակով 23:00-ին), իսկ թիմերի առաջին դիմակայությունն ավարտվել է փարիզցիների հաղթանակով՝ 5-4 հաշվով։
