Իսպանիայի երկրորդ դիվիզիոնի 38-րդ տուրում Ժերար Պիկեին պատկանող «Անդորրա» ակումբը սեփական հարկի տակ 0:1 հաշվով ցավալի պարտություն է կրել «Ալբասետեից»: 86-րդ րոպեին խփված միակ գոլը հանգեցրել է իսկական սկանդալի. հյուրերի խաղացողը նախքան գոլ խփելը, հնարավոր է, տրորել էր տանտերերի պաշտպանի ոտքը, սակայն գլխավոր մրցավար Ալոնսո Դե Էնա Վոլֆը խախտում չէր արձանագրել, իսկ VAR համակարգը չէր միջամտել:
Մրցավարի որոշումն առաջացրել է տանտերերի բուռն դժգոհությունը, ինչի արդյունքում 90-րդ րոպեին վրդովված մարզիչ Կարլես Մանսոն և նրա շտաբի ևս չորս անդամ կարմիր քարտ են ստացել և հեռացվել:
Ըստ գլխավոր մրցավարի պաշտոնական զեկույցի՝ հանդիպումից հետո ակումբի բարձրագույն ղեկավարությունն անցել է բոլոր սահմանները.
- Ժերար Պիկե (Սեփականատեր). Դեռ ընդմիջմանը դժգոհել է մրցավարությունից, իսկ խաղից հետո սպառնացել է. «Այստեղից ուղեկցորդներով հեռացեք, որպեսզի ձեզ վրա չհարձակվեն»: Ավելի ուշ նա խաղի պատվիրակին ասել է. «Մեկ այլ երկրում ձեզ կհոշոտեին, բայց Անդորրան քաղաքակիրթ երկիր է»:
- Ժաումե Նոգես (Սպորտային տնօրեն). Մեղադրել է մրցավարին կանխակալության մեջ՝ բղավելով. «Ձեզ հատուկ են նշանակել այս խաղին… դուք սրիկաներ եք»: Արդեն ավտոկայանատեղիում նա մրցավարների մեքենայի հետևից գոռացել է. «Հուսով եմ՝ վթարի կենթարկվեք»:
- Ֆեռան Վիլասեկա (Նախագահ). Ավտոկայանատեղիում մոտեցել է խաղի պատվիրակին, հրել նրան և բռունցքով փորձել հարվածել: Միջադեպը հարթվել է միայն ոստիկանության միջամտությունից և նրան բերման ենթարկելուց հետո:
