UFC-ի թեթևագույն քաշային կարգի մարտիկ Քեմերոն Սմոթերմանը տեղափոխվել է հիվանդանոց բուժզննման այն բանից հետո, երբ ուշագնաց է եղել UFC 324-ի կշռման արարողության ժամանակ։ Միջադեպի պատճառով նրա նախատեսված մենամարտը չեղարկվել է։ Այս մասին տեղեկացնում է The Guardian-ը։
Լաս Վեգասի T-Mobile Arena-ում կայացած կշռման արարողության ժամանակ 28-ամյա ամերիկացին տեսանելիորեն անկայուն վիճակում էր: Կշեռքին կանգնելուց և պահանջվող 135.5 ֆունտ (մոտ 61.5 կգ) քաշն ապահովելուց անմիջապես հետո, հարթակից իջնելիս Սմոթերմանը կորցրել է գիտակցությունն ու ընկել հատակին:
UFC-ի անձնակազմն ու բժիշկները վայրկյանների ընթացքում օգնություն են ցուցաբերել մարտիկին: Քիչ անց նա ուշքի է եկել, ինչից հետո բժիշկները նրան դուրս են տարել դահլիճից՝ հետագա զննման համար: Նրա առողջական վիճակի մասին այլ մանրամասներ կազմակերպությունը դեռևս չի հաղորդել:
Միջադեպից հետո որոշում է կայացվել չեղարկել Ռիկի Տուրսիոսի դեմ նախատեսված մենամարտը, որը պետք է կայանար շաբաթ երեկոյան՝ մրցաշարի նախնական քարտում:
Այս միջադեպը կրկին թեժացրել է քննարկումները MMA-ում քաշի կրճատման վտանգավոր պրակտիկայի շուրջ: Սա մի խնդիր է, որը UFC-ն ընդունում է, սակայն համապարփակ բարեփոխումներ դեռևս չեն իրականացվել:
Ուրբաթ օրը կայացած կշռման արարողությունը առանց խնդիրների չի անցել նաև այլ զույգերի համար: Թեթևագույն քաշային կարգի նախկին չեմպիոն Դեյվիսոն Ֆիգերեդոն և ալեքս Պերեսը չեն կարողացել տեղավորվել թույլատրելի քաշային սահմանում: Երկու մարտիկներն էլ կտուգանվեն իրենց հոնորարի 25 տոկոսի չափով, սակայն նրանց մենամարտերը կկայանան ըստ նախատեսվածի:
Հիշեցնենք, որ UFC 324-ի գլխավոր իրադարձությունը լինելու է թեթև քաշային կարգում ժամանակավոր չեմպիոնի տիտղոսի համար մենամարտը՝ լիվերպուլցի Փեդի Փիմբլեթի և Ջասթին Գեյջիի միջև։
