Առաջարկում ենք ծանոթանալ օրերս կայացած մի շարք կարևոր տրանսֆերներին ձմեռային տրանսֆերային պատուհանի ընթացքում։
✅ Հայաստանի ազգային հավաքականի դարպասապահ Հենրի Ավագյանը հեռացել է «Փյունիկից» ու այժմ նոր ակումբ ունի։ 28-ամյա Ավագյանը համալրել է «Արարատ-Արմենիայի» կազմը։
Ավագյանը «Միկայի» սան է, իր կարիերայի ընթացքում հանդես է եկել «Միկայի», «Բանանցի», «Ալաշկերտի», «Վանի», «Նորավանքի», «ԲԿՄԱ»-ի ու «Փյունիկի» կազմերում: Վերջինիս կազմում դարձել է 2023/24 մրցաշրջանի Հայաստանի չեմպիոն, 2018/19 մրցաշրջանի գավաթակիր ու սուպերգավաթակիր՝ «Ալաշկերտի» կազմում, ինչպես նաև գավաթակիր «Նորավանքի» կազմում՝ 2021/22 մրցաշրջանում: Ընթացիկ մրցաշրջանում Ավագյանը «Փյունիկի» կազմում մասնակցել է 20 հանդիպման։
✅ Հայաստանի ազգային հավաքականի դարպասապահ Արսեն Բեգլարյանը տեղափոխվել է Չարենցավանի «Վան»։ 31-ամյա դարպասապահի պայմանագրի ժամկետը ավարտվել էր «Արարատ-Արմենիայի» հետ, և կողմերը փոխադարձ համաձայնությամբ որոշել են չերկարաձգել այն։ Արսենը «Արարատ-Արմենիա» էր տեղափոխվել 2023 թվականի ամռանը ու թիմի կազմում անցկացրած մրցաշրջանների ընթացքում մասնակցել 33 հանդիպման։ Նշենք, որ Բեգլարյանը Հայաստանի ազգային հավաքականի կազմում անցկացրել է 16 հանդիպում։
✅ Դանիայի երիտասարդական հավաքականի հարձակվող Միկա Բիերեն ավստրիական «Շտուրմից» տեղափոխվել է «Մոնակո»: Ֆուտբոլիստի նոր աշխատանքային պայմանագիրը «Մոնակոյի» հետ նախատեսված է մինչև 2029 թվականի ամառ: Transfermarkt-ի ներկայացրած տեղեկատվության համաձայն՝ 21-ամյա ֆուտբոլիստի տրանսֆերի գումարը կազմել է 13 մլն եվրո։
✅ Ճապոնացի աջ պաշտպան Հիրոկի Սեկինեն «Կաշիվայից» տեղափոխվել է ֆրանսիական «Ռեյմս»։ 22-ամյա ֆուտբոլիստը Ճապոնիայի Օլիմպիական հավաքականի կազմում անցկացրել է 8 հանդիպում։ Նա հրավիրվել է նաև ազգային հավաքական, սակայն դեռ գլխավոր թիմում նորամուտը չի նշել։
✅ «Լիոնի» ֆրանսիացի կիսապաշտպան Մաքսենս Կակրեն միացել է իտալական «Կոմոյին», հայտնում է ակումբի մամուլի ծառայությունը: Կիսապաշտպանը իտալական թիմի հետ պայմանագիր է կնքել մինչև 2029 թվականի ամառ։ Ինչպես հայտնում է ինսայդեր Ֆաբրիցիո Ռոմանոն, «Լիոնը» 24-ամյա ֆրանսիացու համար ստացել է 15 միլիոն եվրո, ևս 2 միլիոնը՝ որպես բոնուսներ։ Սա «Կոմոյի» պատմության մեջ ամենաթանկարժեք տրանսֆերն է։ Մինչ այս ամենաթանկարժեքն օրեր առաջ 12 միլիոն եվրոյով «Բետիսի» 19-ամյա վինգեր Ասանե Դիաոյի ձևակերպած տրանսֆերն էր։
✅ Իտալական «Նապոլիի» կիսապաշտպան Մայքլ Ֆոլորունշոն վարձավճարով հանդես կգա «Ֆիորենտինայում»: Պայմանագիրը ներառում է ամբողջական տրանսֆերը ձևակերպելու իրավունք: Այս մրցաշրջանում կիսապաշտպանը բոլոր մրցաշարերում անցկացրել է 7 հանդիպում։ Նա 2024 թվականին նորամուտն է նշել Իտալիայի հավաքականում և երկու հանդիպում ունի իր ակտիվում։
✅ Վենեսուելայի հավաքականի հարձակվող Ժոզեֆ Մարտինեսը «Տորոնտոյից» տեղափոխվել է «Սան Խոսե»։
✅ «Նապոլին» հայտարարել է «Բորնմուտի» կիսապաշտպան Ֆիլիպ Բիլինգի հետ պայմանագիր կնքելու մասին։ Իտալական ակումբը վարձակալել է դանիացի ֆուտբոլիստին՝ ամբողջական տրանսֆերը ձևակերպելու հնարավորությամբ։
✅ Դանիացի կիսապաշտպան Մագնուս Անդերսենը «Վենեցիայից» տեղափոխվել է Պրահայի «Սպարտա»․ տրանսֆերի արժեքը՝ 500 հազար եվրո։
✅ Ուելսցի 37-ամյա դարպասապահ Ուեյն Հենեսին վերադարձավ «Նոթինգհեմ Ֆորեստ»: Ֆուտբոլիստը հեռացել էր ակումբից նախորդ մրցաշրջանի վերջում և մինչ այժմ առանց ակումբի էր։
✅ Շվեդ պաշտպան Մալքոլմ Յենգը «Սիրիուսից» տեղափոխվել է ֆրանսիական «Ռեյմս»․ տրանսֆերի արժեքը՝ 2,5 մլն եվրո։
Շարքի նախորդ մասերը՝
➡️ Հայ ֆուտբոլիստների նոր թիմերը, անգլիական ակումբների նորեկները
➡️ Սելարայանի նոր թիմը, Ա Սերիայի ակումբի ռեկորդը, դարպասապահների տեղափոխություններ Եվրոպայում
➡️ Ադամյանը փոխել է ակումբային գրանցումը, Տոտենհեմի նոր դարպասապահը, Գաբիգոլը նոր ակումբ ունի
