«Ուրարտուի» ռուս հարձակվող Իվան Իգնատևը իր թիմի առաջատարն է և հավակնում է Հայաստանի առաջնության լավագույն խաղացողի տիտղոսին, ասել է հարձակվողի գործակալ Ալան Ագուզարովը «Матч ТВ»-ին տված հարցազրույցում:
Իգնատևը պայմանագիր է ստորագրել «Ուրարտուի» հետ անցած ամռանը մեկ տարվա ժամկետով: Այդ ժամանակից ի վեր նա թիմի կազմում անցկացրել է 19 հանդիպում բոլոր մրցաշարերում, խփել 13 գոլ և կատարել հինգ գոլային փոխանցում:
— Իվան Իգնատևի՝ «Ուրարտու» տեղափոխությունից հետո շարունակո՞ւմ եք համագործակցությունը նրա հետ:
— Այո: Վանյայի հետ կապի մեջ եմ: Նա «Ուրարտուի» վերջին տուրում հաղթական գոլը խփեց 90+7-րդ րոպեին: Նա թիմի և առաջնության լավագույն ռմբարկուն է՝ 13 գոլով: Նրա կարիերայում վերափոխում է տեղի ունենում:
Ինչ վերաբերում է «Ուրարտուին», ապա այս պահին կարող եմ ասել, որ նրա տեղափոխությունը ճիշտ որոշում էր: «Ուրարտուն» թիմ է, որը իր մակարդակով մոտավորապես համադրելի է Ռուսաստանի առաջնության միջին թիմերի հետ: Իսկ Իգնատևը այս թիմի առաջատարն է, հավակնում է Հայաստանի առաջնության լավագույն ֆուտբոլիստի կոչմանը:
— Շատ լավ է հնչում, հաշվի առնելով, որ մինչև այդ Իվանի կարիերան մի քանի տարի կարծես թե չէր ստացվում:
— Չպետք է մոռանալ, որ նա ընդամենը 25 տարեկան է: Նրա առջև դեռ բավական ժամանակ կա, որպեսզի ռուս երկրպագուների գիտակցության մեջ իր տեղը զբաղեցնի՝ որպես արժանի ռուս ֆուտբոլիստ:
— Իգնատևի հաջողություններից հետո արդյո՞ք ռուսական ակումբները ցանկություն են հայտնել, որ նա վերադառնա:
— Ինքնըստինքյան հետաքրքրություն եղել է և կա Իգնատևի նկատմամբ, նույնիսկ այն ժամանակ, երբ նա ամենալավ հատվածները չէր անցկացնում: Բայց այս պահին նրա թիմը պայքարում է չեմպիոնության համար, ուստի հեռանալը նրա համար արդիական չէ: Նա մրցաշրջանը կանցկացնի մինչև վերջ, ամեն ինչ կանի, որպեսզի իր թիմին օգնի զբաղեցնել առաջին տեղը և փորձի հաղթել ռմբարկուների պայքարը։
Ավելի վաղ, 25-ամյա ֆուտբոլիստն իր կարիերայի ընթացքում հանդես է եկել «Կրասնոդարում», մոսկովյան «Լոկոմոտիվում», Կազանի «Ռուբինում», «Սոչիում», Սամարայի «Կռիլյա Սովետովում» և սերբական «Ժելեզնիչարում»:
