Վրաստանի հավաքականն աննախադեպ ելույթներ ունեցավ Եվրոպայի 2024 թվականի առաջնությունում, և, անկասկած, մրցաշարի բացահայտումն ու ամենահիշվող թիմերից մեկը կլինի:
Վրացական ֆուտբոլի ֆենոմենի մասին զրուցել ենք «Նոայի» մարզական տնօրեն, անվանի մասնագետ Արթուր Ոսկանյանի հետ:
«Այն, ինչ ցույց տվեց Վրաստանը, տարիների հսկայածավալ աշխատանքի արդյունք է: Նրանք տարիներ շարունակ գնում էին այդ ուղղությամբ՝ սկսած մանկապատանեկան ակադեմիաներից, վրացի ֆուտբոլիստներին շատ խաղաժամանակ տրամադրելուց: Սա մեկ օրվա կամ մեկ տարվա աշխատանքի արդյունք չէր. տարիներ են պետք այս արդյունքին հասնելու համար: Երբ Ազգերի լիգայում Վրաստանի հետ հայտնվել էինք մի խմբում (խմբ.՝ 2020/21 մրցաշրջանում) և հաղթելով խմբում բարձրացանք B դիվիզիոն, իրենք շատ հանգիստ էին, ընդհակառակը՝ մեր դեմ խաղում իրենց մեծ թվով ֆուտբոլիստներ չէին խաղում: Իսկապես, շատ հանգիստ էին և մտածում էին՝ ինչու՞ է պետք մեկ խումբ բարձր խաղալ, ավելի լավ է ցածր դիվիզիոնում հանդես գալ, քանի որ հնարավորություններն ավելի շատ կլինեն: Այդպես էլ եղավ. իրենք երբ՝ պետք էր, այդ ժամանակ խմբում առաջին տեղը գրավեցին: Ազգերի լիգայի նախորդ խաղարկությունում՝ Եվրոպայի առաջնությունում հանդես գալու իրավունքի համար, իրենք դարձյալ հնարավորություն ունեին, բայց վերջին խաղում տանը պարտվեցին Հյուսիսային Մակեդոնիային: Այս անգամ երկրորդ փորձն էր. հաղթեցին և դուրս եկան ԵՎՐՈ-ի եզրափակիչ փուլ»,- ամփոփում է Արթուր Ոսկանյանը:
Նրա խոսքով՝ Վրաստանի հավաքականի հաջողության ամենակարևոր գրավականներից մեկը համախմբվածությունն է. «Բոլոր թիմերը՝ միահամուռ կերպով, մտածում են իրենց ֆուտբոլի զարգացման մասին: Հավաքականը մի կոլեկտիվ էր, որը խաղադաշտում ներդրեց ամեն ինչ: Վստահ եմ՝ մեր հավաքականն էլ այսպիսի խոշոր մրցաշարում հանդես գալու դեպքում նույնքան նվիրված ու կուռ կոլեկտիվ է լինելու, բայց դրան հասնելու համար ժամանակ և ճիշտ աշխատանք է պետք»:
Վրաստանի հաջողության մյուս կարևոր գործոնն, ըստ Արթուր Ոսկանյանի, բոլոր լավագույն խաղացողների ներկայությունն էր թիմում. «Հայաստանի հավաքականում տարբեր պատճառներով բացակայում են մի շարք կարևոր խաղացողներ, ինչը ևս բացասական է մեզ համար: Ինչո՞ւ մեր հավաքականում չպետք է լինեն Հենրիխ Մխիթարյանը, Տիգրան Բարսեղյանը: Տարբեր պատճառներ կարող ենք գտնել և մեղադրել տարբեր մարդկանց և հանգամանքների, բայց եթե մեղավորներ ենք փնտրում, ուրեմն մենք բոլորս ենք մեղավոր:
Վրաստանը նվիրված գնաց լավ հավաքական ստեղծելու ճանապարհով և հասավ արդյունքի: Կարծում եմ՝ արժանի խաղ ցուցադրեցին: Իսպանիայից կրած խոշոր հաշվով պարտությունը շատ քննարկվեց: Ակնհայտ էր, որ այդ պարտությունը լինելու էր: Այդքան մեծ նվիրումն այդ խաղում պետք է պայթեր: Անգամ գոլ խփեցին, պայքարեցին, բայց դեռ թոփ թիմ չեն, թեև կարողացան թոփ թիմերի դեմ կռվել ու արժանի մրցակցություն ապահովել»:
Արթուր Ոսկանյանի գնահատմամբ՝ սա նոր հեռանկարներ է բացելու վրացի երիտասարդ ու պատանի ֆուտբոլիստների համար. հիմա ավելի շատ մարդիկ են սկսելու զբաղվել ֆուտբոլով, մարզաձևին ավելի մեծ ուշադրություն է դարձվելու երկրում, ավելի շատ հովանավորներ են սկսելու Վրաստանում ներդրումներ կատարել, եվրոպական ակումբներն ավելի շատ են հետաքրքրվելու վրացի ֆուտբոլիստներով:
«Իրենք սրան հասան, ու ապագան ավելի լավն է լինելու: Մենք էլ պետք է հասկանանք, որ ճիշտ ճանապարհը պետք է գտնել ու առաջ շարժվել: Ֆուտբոլում մանրուքներ չկան. ֆուտբոլը պետք է սիրել ու ներդնել ամեն ինչ»,- նշում է Արթուր Ոսկանյանը:
Հայաստանի Մ19 տարեկանների հավաքականի նախկին գլխավոր մարզիչ Արթուր Ոսկանյանը նաև վերհիշել է թիմի հետ ԵՎՐՈ-2019-ի եզրափակիչ փուլ դուրս գալը.
«Մեզ համար էլ շատ դժվար էր, մի խմբում էինք հայտնվել Իսպանիայի, Իտալիայի և Պորտուգալիայի հավաքականների հետ: Իսպանիայի Մ19 հավաքականի հետ խաղում անգամ մի պահ հաշիվը 1:1 էր, տղաները կռիվ տվեցին ու պայքարեցին: Դժվար էր, քանի որ այդ տղաներից շատերն անգամ Հայաստանի Առաջին խմբի առաջնությունում հանդես չէին գալիս, այլ Մ18 տարեկանների թիմում: Բայց խաղում էին այնպիսի խաղացողների դեմ, որոնք հանդես էին գալիս «Բարսելոնայի», «Սևիլիայի», «Մանչեսթեր Սիթիի» նման թիմերում:
Բայց հետո փոխեցինք մեր տեսլականն ու զարգացման վեկտորը: Կարծում եմ՝ պետք է հավատարիմ մնանք մեր ընտրած ճանապարհին, հավատանք ու առաջ գնանք: Կարծում եմ՝ Վրաստանը հավատում է իր առջև դրված նպատակին ու չի շեղվում ընտրած ճանապարհից: Մենք շատ անգամ շեղվում ենք, 1-2 տարի հետո որոշակի արդյունք չապահովելու դեպքում փոխում ենք ուղին: Պետք է ունենանք ծրագիր, հավատանք դրան ու գնանք առաջ՝ չշեղվելով այդ ճանապարհից»,- եզրափակում է Արթուր Ոսկանյանը:
