Երևանում ավարտին մոտեցող բռնցքամարտի ավագ տարիքի պատանիների աշխարհի առաջնությունում Հայաստան 10 ներկայացուցիչներ՝ 9 տղա և 1 աղջիկ, դուրս են եղել կիսաեզրափակիչ և ապահովել առնվազն բրոնզե մեդալներ։ կիսաեզրափակիչի 10 ուղեգիր։
Հայաստանի ներկայացուցիչներից այսօր քառորդ եզրափակչում հաղթանակներ են տարել Վաղարշակ Քեյանը (48 կգ), Արեն Խառատյանը (52 կգ), Արգիշտի Հակոբյանը (66 կգ), Սամվել Սիրամարգյանը (70 կգ), Ալբերտ Հարությունյանը (75 կգ), Տիգրան Խաչատրյանը (+80 կգ)։
48 կգ քաշային կարգում Հայաստանը ներկայացնող Վաղարշակ Քեյանը շատ վստահ հաղթանակ է տարել Դանիան ներկայացնող Ռիդա Տամիռի նկատմամբ։ Հայ բռնցքամարտիկն ամբողջ մենամարտի ընթացքում թելադրել է իր կամքը և առավելության հասնելով 5-0 հաշվով` դուրս եկել կիսաեզրափակիչ:
1/4 եզրափակիչում հիանալի մենամարտ է անցկացրել Արեն Խառատյանը, որը ոչ մի շանս չի տվել հունգարացի Պետեր Բենեդեկին։ Առաջին ու երկրորդ ռաունդներում հաղթելով 4:1, և 5։0 հաշիվներով, 3-րդ ռաունդում մեր մարզիկն ավելի է մեծացրել ճնշումն ու նույնիսկ նոկդաունի ենթարկել մրցակցին։
66 կգ քաշային Արգիշտի Հակոբյանը քառորդ եզրափակչում մրցակցել է խորվաթ Մատիյա Բերենդդի հետ։ Առաջին ռաունդում ըստ մրցավարների առավելություն է ունեցել մրցակիցը։ Ռաունդը ավարտվել է 4-1 հաշվով հօգուտ խորվաթ բռնցքամարտիկի :Երկրորդ ռաունդից սկսած Արգիշտին մեծացրել է ճնշումը և հաղթել է 5-0 հաշվով,մենամարտի վերջնամասում Հակոբյանը նոկդաունի է ենթարկել մրցակցին և էլ ավելի ակնհայտ դարձրել իր առավելությունը:
Հայաստանի մյուս ներկայացուցիչ Ալբերտ Հարությունյանը երկու նոկդաունից ու մրցավարի անհասկանալի նկատողությունից հետո պոկել է հաղթանակը ղազախ մրցակցից։
70 կգ քաշային Սամվել Սիրամարգյանը մրցել է Հնդկաստանը ներկայացնող Կունդու Ռահուլի հետ: Առաջին ռաունդում Սամվելը զիջել է 3-2 հաշվով, ինչից հետո, մեր բռնցքամարտիկը կամային որակների շնորհիվ տիրել է նախաձեռնությանն ու արդյունքում հաղթել 5-0 հաշվով:
Գերծանր քաշային Տիգրան Խաչատրյանն էլ մենամարտել է Խորվաթիան ներկայացնող մարզիկի հետ։ Առաջին ռաունդում Տիգրանի հարվածից հետո մրցավարը հաշիվ է բացել մրցակցի վրա և ռաունդը ավարտվել է 5-0 հաշվով: Երկրորդ ռաունդում Տիգրանի բազմաթիվ գրոհներից հետո մրցավարը ստիպված է եղել դադարեցնել մենամարտը և արձանագրել մեր բռնցքամարտիկի հաղթանակը տեխնիկական նոկաուտով:
Նոյեմբերի 29-ին քառորդ եզրափակիչներում հաղթանակներ էին տարել Հեղինե Պետրոսյանը (48 կգ), Առնո Դարչինյանը (46 կգ), պատանիների Եվրոպայի չեմպիոն Տիգրան Հովսեփյանը (50 կգ) և Անդրանիկ Մարտիրոսյանը (60 կգ):
