«Ալբերտ Ազարյանին երկինք տարավ սերը: Կնոջ՝ Լիզայի մահից հետո նա հալվեց աչքներիս առաջ ու գիտակցաբար գնաց միանալու իր միակ սիրելիին, ում հետ շատ երկար ու գեղեցիկ ճանապարհ էր անցել», — ասում է ԿԳՄՍ նախարարի տեղակալ Կարեն Գիլոյանը:
Օպերայի և բալետի ակադեմիական թատրոնում այսօր կայացավ լեգենդար մարզիկի հոգեհանգստի արարողությունը, որին մասնակցեցին ու նրա հիշատակին հարգանքի տուրք մատուցեցին ՀՀ վարչապետ Նիկոլ Փաշինյանը, ԿԳՄՍ նախարար Ժաննա Անդրեասյանը, ՀԱՕԿ նախագահ Գագիկ Ծառուկյանը, Կառավարության բարձրաստիճան պաշտոնյաներ, մարզաշխարհի անվանի ներկայացուցիչներ, Ազարյանի անվան մանկապատանեկան մարզադպրոցի սաներ, ազարյանական սպորտի ջատագովներ․
ԱՄՆ-ից Հայաստան էր ժամանել նաև Ալբերտ Ազարյանի որդին՝ Օլիմպիական չեմպիոն Էդուարդ Ազարյանը:
Լեգենդար մարմնամարզիկը մինչև վերջերս դեռ ամեն օր լինում էր իր անունը կրող մարզադպրոցում. մարմնամարզիկները խոստովանում են՝ անսովոր կլինի գնալ մարզադպրոց ու նրան չտեսնել այնտեղ.
«Պարոն Ազարյանը ոչ միայն լավ մարդ էր, այլև լավ ուսուցիչ՝ թե՜ կյանքում, թե՜ սպորտում: Ճիշտ է տարիքով արդեն բավականին մեծ էր, բայց մենք այնպիսի տպավորություն ունեինք, որ իրեն միշտ պետք է տեսնենք մարզադպրոցում: Լեգենդար մարդ էր, ու նրա կողքին մարզվելը մեծ պատիվ էր մեզ համար: Հիշողությունները բազմաթիվ են ՝ թե՛ իր հումորները, թե՛ խորհուրդները , թե՛ մեր սխալներն ուղղելը շատ արժեքավոր են մեզ համար»,- նշում է Եվրոպայի փոխչեմպիոն Վահագն Դավթյանը:
Դավթյանի խոսքով՝ լեգենդար մարզիկը նաև բնավորության յուրահատուկ գծեր ուներ, հումորի սուր զգացում, երիտասարդների մոտ էլ միշտ փորձել է հաղթողի հոգեբանություն ձևավորել ու սովորեցրել է միշտ ավելիին ձգտել:
Այն, որ մարզադպրոցում դեռ երկար կզգացվի «Օղակների արքայի» բացակայությունը, փաստում է նաև Հայաստանի մարմնամարզության ֆեդերացիայի նախագահ Գագիկ Վանոյանը: Նրա խոսքով Ալբերտ Ազարյանը նախևառաջ չափազանց հայրենասեր անձնավորություն էր.
«Մեր երեխաների մեջ առաջինը հայրենասիրություն էր սերմանում: Բացի այդ, շատ էր սիրում իր աշխատանքը, մարմնամարզությունը, սպորտը: Իր ապրած կյանքով Ալբերտ Ազարյանը օրինակ էր մեզ ու առհասարակ մեր ժողովրդի համար՝ ցույց տալով ,թե ինչպես է պետք սիրել երկիրն ու այն աշխատանքը, որով զբաղվում ես: Ասում էր՝ եթե զբաղվում ես մի գործով, պետք է նվիրվես ու ուժերի ներածին չափով անես առավելագույնը այդ գործում: Դա մեզ պարոն Ազարյանն է իր օրինակով սովորեցրել»,- ընդգծում է ֆեդերացիայի նախագահը:
Հոգեհանգստի արարողության ժամանակ լեգենդար մարզիկի աճյունի մոտ պատվո պահակ էին կանգնում նաև Հայաստանի մարմնամարզության հավաքականի անդամները։
Հիշեցնենք՝ Ալբերտ Ազարյանի վերջին հրաժեշտը տեղի կունենա սեպտեմբերի 9-ին՝ ժամը 11:00-13:00-ը Կոնդի Սուրբ Հովհաննես եկեղեցում, ժամը 13:00-13:30-ը՝ Ալբերտ Ազարյանի անվան մանկապատանեկան մարզադպրոցում (հասցե՝ Մոսկովյան 3):
Ալբերտ Ազարյանի աճյունը կամփոփվի Կոմիտասի անվան պանթեոնում. հուղարկավորությունը՝ ժամը 14:00-ին:
Ալբերտ Ազարյանը ծնվել է 1929 թվականի փետրվարի 11-ին Գանձակում՝ արհեստավորի ընտանիքում։ 1939 թվականին ընտանիքը տեղափոխվել է Վանաձոր, իսկ 1947 թվականին՝ Երևան։ Նա ԽՍՀՄ սպորտի վաստակավոր վարպետ է (1954), ՀԽՍՀ վաստակավոր մարզիչ, ՀԽՍՀ ֆիզկուլտուրայի և սպորտի վաստակավոր գործիչ (1967)։
Մասնակցել է մրցումների աշխարհի 49 երկրում, նվաճել է 45 ոսկյա, 42 արծաթյա և 10 բրոնզե մեդալներ։ Օլիմպիական խաղերի եռակի, աշխարհի քառակի և Եվրոպայի կրկնակի չեմպիոն է: ԽԱՀՄ առաջնություններում 11 անգամ արժանացել է չեմպիոնի կոչման։
Մարմնամարզության միջազգային ֆեդերացիայի հավաստագրման համաձայն՝ օղակների վրա նրա կատարած վարժությունների համալիրը պաշտոնապես անվանակոչվել է «Ազարյանական խաչ»։
Ալբերտ Ազարյանը Հայաստանի մարմնամարզության ֆեդերացիայի պատվավոր նախագահն էր: Նա վախճանվել է 2023 թվականի սեպտեմբերի 5-ին՝ 94 տարեկանում:
