«Արսենալի» գլխավոր մարզիչ Միկել Արտետան ծրագրում է գլխավորել Դեկլան Ռայսին ձեռք բերելու բանակցությունների գործընթացը և կարծում է, որ կարող է համոզել «Վեսթ Հեմի» աստղին պայմանագիր կնքել «զինագործների» հետ։ Այս մասին հաղորդում է Mirror-ը։
«Արսենալը» ակտիվացրել է իր թիմն ուժեղացնելու ջանքերը՝ հաջորդ մրցաշրջանի Չեմպիոնների լիգայում տեղ ապահովելուց հետո, իսկ 24-ամյա Ռայսը Արտետայի առաջնահերթ թիրախն է, որն առաջինը ձգտում է ուժեղացնել կիսապաշտպանությունը:
Ռայսի պայմանագիրը «Վեսթ Հեմի» հետ ավարտվում է հաջորդ ամառ, պայմանագիրը կարող է երկարաձգվել ևս մեկ տարով, սակայն խաղացողը մերժել է ակումբի բոլոր առաջարկները։ Կիսապաշտպանը պատրաստվում է հեռանալ «Վեսթ Հեմից», սակայն ցանկանում է մնալ Լոնդոնում՝ ընտրելով «Չելսիի» և «Արսենալի» միջև։ Քանի որ Ռայսը վերջերս խոստովանել է, որ երազում է խաղալ Չեմպիոնների լիգայում, «Չելսիի» շանսերը՝ ձեռք բերելու ֆուտբոլիստին զգալիորեն նվազել են:
Բրիտանական պարբերականի տեղեկության համաձայն՝ Արտետան պլանավորում է անձամբ հանդիպել խաղացողի հետ մրցաշրջանի ավարտից հետո՝ կոչ անելով «Արսենալին» տրանսֆերային պատուհանի բացվելուն պես միաժամանակ պաշտոնական խնդրանքով դիմել ակումբին։
Հաղորդվում է նաև, որ «Մանչեսթեր Սիթիից» կրած ցավալի պարտությունից հետո Արտետան որոշել է վերանայել ամառային ծրագրերը։ «Արսենալն» ի սկզբանե ցանկանում էր երկու խոշոր գործարք կնքել՝ ծախսելով ոչ ավելի, քան 150 միլիոն ֆունտ ստեռլինգ Ռայսի և Մոյզես Կայսեդոյի հետ պայմանագիր կնքելու համար, սակայն այժմ մենեջերը հասկացել է, որ ուրիշ դիրքերը նույնպես պետք է ուժեղացվեն: «Զինագործներն» այժմ ֆինանսավորում են փնտրում ևս երկու պաշտպանի և, հնարավոր է, մեկ եզրային խաղացող գնելու համար:
Ինչ վերաբերում է «Վեսթ Հեմին», ապա նրանք արդեն փնտրում են Ռայսին փոխարինող, իսկ Ֆրանկֆուրտի «Այնտրախտի» կիսապաշտպան Ջիբրիլ Սոուն կարող է տարբերակներից մեկը լինել։
