Պահել չի կարելի բաց թողնել․ ձմեռային տրանսֆերային պատուհանի չկայացած գործարքները

Ձմեռային տրանսֆերային պատուհանի ընթացքում շատ էին աղմկոտ տեղափոխությունները։ Եվրոպական ակումբները միշտ չէ, որ ակտիվ են լինում մրցաշրջանի միջնամասում։ Armsport-ն արդեն անդրադարձել է տրանսֆերային պատուհանի նոր ռեկորդներին, գերծախսերին, տարօրինակ և անսպասելի տրանսֆերներին։

Ինչպես միշտ, ձախողումներից խուսափել չի հաջողվել։ Այս անգամ մեր դիտակետում են հունվարյան տրանսֆերային պատուհանի ընթացքում շատ քննարկված, բայց այդպես էլ չկայացած գործարքները։

Մոյսես Կայսեդո — «Բրայթոնից» — Լոնդոն՝ «Չելսի», «Արսենալ»

Էկվադորի հավաքականի կիսապաշտպան Մոյսես Կայսեդոն դեռ երկար կհիշի այս տրանսֆերային պատուհանը։ «Բրայթոնի» ֆուտբոլիստի ծառայություններով հետաքրքրված էին լոնդոնյան 2 գրանդները՝ «Չելսին» և «Արսենալը»։ Երկու ակումբներն էլ լրջորեն էին տրամադրված ու պաշտոնական առաջարկներ են արել ֆուտբոլիստին ձեռք բերելու համար։ «Արսենալն» անգամ 3 առաջարկ է կատարել, սակայն Բրայթոնի համանուն ակումբն անդրդվելի էր։

Հունվարի 28-ին 21-ամյա Կայսեդոն նույնիսկ գրառում էր կատարել սոց․ ցանցի իր էջում՝ հայտնելով, որ հեռանում է թիմից և ուրախ է, որ իր շնորհիվ «Բրայթոնը» մեծ գումար կվաստակի։ Բայց այս թեմայի մեխն էլ հենց գումարի հարցն է։ Խնդիրն այն է, որ անգլիական ակումբները, կարելի է ասել, ֆինանսապես բավականին կայուն վիճակում են։ Այսինքն՝ թոփ 5 լիգաներից յուրաքանչյուր միջակ կամ թույլ թիմի համար տրանսֆերային ցանկացած առաջարկ դիտարկվում է որպես գոյատևման միջոց, բայց ոչ Անգլիայում։

«Բրայթոնն» արդեն կորցրել էր իր առաջատարներից մեկին՝ Լեանդրո Տրոսարդին, որը 27 մլն ֆունտ ստեռլինգի դիմաց տեղափոխվել էր հենց «Արսենալ»։ Եվ ակումբը նախապատվությունը տվեց մրցաշրջանի մնացած հատվածում կազմը չթուլացնելուն, քան ևս մի քանի տասնյակ միլիոններ վաստակելուն։ Թիմի գլխավոր մարզիչ Ռոբերտո Դե Ձերբին ֆանտաստիկ աշխատանք է կատարում։ Նրա գլխավորությամբ թիմը պայքարում է եվրագավաթային տեղերի համար։ Արդարացի է, որ ակումբը չի ցանկանում կորցնել իր առաջատարնրից ևս մեկին։

Հակիմ Զիեշ՝ «Չելսիից» — ՊՍԺ

Մարոկկոյի հավաքականի առաջատարն այդպես էլ չկարողացավ «Չելսիի» հիմնական կազմի խաղացող դառնալ։ Ո՛չ Թոմաս Տուխելի, ո՛չ էլ Գրեմ Փոթերի օրոք Զիեշն անձեռնմխելիների ցանկում չի եղել։ Դա փոքր-ինչ տարօրինակ է, քանի որ ԱԱ 2022-ը ևս մեկ անգամ ապացուցեց, որ մարոկկացին բացառիկ որակների տեր ֆուտբոլիստ է։

Զիեշի ծառայություններով արդեն երկար ժամանակ է հետաքրքրվում էր «Միլանը», բայց այդպես էլ չէր կարողանում բանակցությունները հասցնել եզրափակիչ փուլ։ Տրանսֆերային պատուհանի վերջին օրը պայքարի մեջ մտավ ՊՍԺ-ն, առաջարկ արեց «Չելսիին», ֆուտբոլիստը նույնիսկ մեկնեց Փարիզ, բայց․․․

«Չելսիի» ներկայացուցիչները 3 անգամ սխալ փաստաթղթեր են ուղարկել ֆրանսիական կողմին։ Ըստ ԶԼՄ-ների, լոնդոնյան ակումբը դիտմամբ է խափանել տրանսֆերը։ Արդյունքում՝ Զիեշը վերադարձել է Լոնդոն և միացել թիմի մարզումներին։

Նիկոլո Ձանիոլո՝  «Ռոմայից» — «Բորնմութ», «Միլան»

Դժվար է պատկերացնել, որ Ժոզե Մոուրինյուի գլխավորած որևէ թիմում նման պատմություն կարող է չգրանցվել։ Դժվարը դարձավ անհնար․ «Ռոմայի» կիսապաշտպան Նիկոլո Ձանիոլոն ցանկանում էր հեռանալ թիմից և տեղափոխվել «Միլան»։ Այստեղ 2 խնդիր կա։ Նախ՝ թե՛ «Ռոմայի» ղեկավարությունը, թե Մոուրինյուն հիմար չեն, որպեսզի մրցաշրջանի կեսում ֆուտբոլիստ վաճառեն իրենց հիմնական մրցակիցներից մեկին՝ ուժեղացնելով հակառակորդի կազմն ու թուլացնելով սեփականը։ Կարող է հարց առաջանալ, թե ինչպես ստացվեց, որ «Ռոման» դարձավ «Միլանի» հիմնական մրցակիցներից մեկը` Ա Սերիայի լավագույն քառյակում հայտնվելու համար։ Այդ մասին կարող եք կարդալ ԱՅՍՏԵՂ։ «Յուվենտուսից»՝ 15 միավոր հանելուց, «Միլանի»՝ 2023 թվականի սկիզբը ձախողելուց հետո, Իտալիայի առաջնության մրցաշարային աղյուսակում խառնաշփոթ է։

Ինչևէ, վերադառնանք Զիեշին։ «Միլանը» չէր էլ կարող վճարել պահանջվող տրանսֆերային գումարը, որպեսզի փորձեր ճնշում գործադրել «Ռոմայի» վրա և ձեռք բերեր Ձանիոլոյին։ Հռոմը ներկայացնող ակումբն էլ լուծում էր գտել։ Ձանիոլոյի համար պաշտոնական առաջարկ էր եղել անգլիական «Բորնմութից»։ Բնականաբար, ակումբը կողմ էր այս տարբերակին, իսկ ֆուտբոլիստը՝ ոչ։ Արդարության համար պետք է նշենք, որ Ձանիոլոն ոչ մի շարժառիթ չուներ ԱՊԼ-ի ամենահամեստ հնարավորություններով թիմ տեղափոխվելու համար։

Արդյունքում՝ Ձանիոլոն մնաց թիմում և ռիսկի է դիմում մինչև մրցաշրջանի ավարտը չընդգրկվել թիմի հայտացուցակում, եթե իր և ակումբի միջև կոնֆլիկտը չհարթվի։

Միլան Շկրինյար՝ «Ինտերից» — ՊՍԺ

ՊՍԺ-ն այս տրանսֆերային պատուհանի գլխավոր անհաջողակն է։ Ակումբը նախնական պայմանագիր էր կնքել «Ինտերի» կենտրոնական պաշտպան Միլան Շկրինյարի հետ։ Վերջինիս գործող պայմանագրի ժամկետը լրանում է մրցաշրջանի ավարտին, և կողմերը համաձայնության էին հասել, որ խաղացողն ազատ գործակալի կարգավիճակով ամռանը կհամալրի ՊՍԺ-ի կազմը։ Այնուամենայնիվ, ՊՍԺ-ն ցանկանում էր և նույնիսկ պատրաստ էր 15-20 մլն եվրո վճարել «Ինտերին», որպեսզի սլովակ պաշտպանի տրանսֆերն իրանակացվի հունվարին։ Ու նորից նույն պատմությունը։ «Ինտերը» որքան էլ ֆինանսական խնդիրներ ունենա, միևնույնն է, Շկրինյարի նման պաշտպանին մրցաշրջանի մնացած հատվածում թիմում պահելն ավելի արժեքավոր է, քան վերոնշյալ գումարը։ Այո, իտալական ակումբը փորձում էր տարբերակներ փնտրել․ ըստ լուրերի՝ միլանցիները հետաքրքրվում էին «Մանչեսթեր Յունայթեդի» պաշտպաններ Վիկտոր Լինդելյոֆի և Հարի Մագուայրի ծառայություններով։ Բայց այս տարբերակներն էլ չաշխատեցին և արդյունքում՝ Շկրինյարը մինչև մրցաշրջանի ավարտը կմնա թիմում։

Սոֆյան Ամրաբատ՝ «Ֆիորենտինայից» — «Բարսելոնա»

Թոփ ակումբների կողմից՝ իրենց վերաբերյալ հետաքրքրության մասին լսելուց հետո շատ ֆուտբոլիստներ են ընկել երազանքների գիրկն ու «կծել իրենց կերակրող ձեռքը»։ Այդ ցանկում հայտնվեց նաև «Ֆիորենտինայի» կիսապաշտպան Սոֆյան Ամրաբատը։ Վերջինս փայլուն խաղ էր ցուցադրել Մարոկկոյի հավաքականի կազմում ԱԱ 2022-ի ժամանակ և վաղ թե ուշ կտեղափոխվեր ավելի թոփ ակումբ, բայց․․․ Ամրաբատը «Բարսելոնայի» առաջարկի մասին լսելուց հետո չէր մասնակցել «Ֆիորենտինայի» մարզմանը։ Դրա հետևանքով նա հաջորդ խաղում դուրս էր մնացել թիմի հայտացուցակից։ Կատալոնացիների՝ 3 մլն եվրոյով վարձակալության և 40 մլն եվրոյով լրիվ տրանսֆերը գնելու առաջարկը «Ֆիորենտինան» համարել էր վիրավորական։

Արդյունքում՝ Ամրաբատը ոչ միայն չտեղափոխվեց «Բարսելոնա», այլ նաև ստիպված էր ներողություն խնդրել թիմի գլխավոր մարզիչ Վինչենցո Իտալիանոյից և թիմակիցներից՝ իր պահվածքի համար։

«Բարսելոնայի»՝ տրանսֆերային վերջին օրվա գլխավոր ձախողման մասին էլ կարող եք կարդալ ԱՅՍՏԵՂ և ԱՅՍՏԵՂ։

Իսկո՝ ազատ գործակալի կարգավիճակով — «Ունիոն Բեռլին»

Եթե մյուս բոլոր դեպքերում ֆուտբոլիստների ճակատագիրը իրավականորեն տնօրինում էին ակումբները, որոնց հետ խաղացողները պայմանագրեր ունեին, ապա իսպանացի կիսապաշտպան Իսկոն «ինքն իր գլխի տերն է»։ Հունվարի սկզբին «Սևիլիայից» հեռանալուց հետո նա ազատ գործակալի կարգավիճակ ունի։ Նրա ծառայություններով հետաքրքրված էին գերմանական երկու ակումբներ՝ «Ունիոնը» և «Լայպցիգը»։ Եթե «Լայպցիգի» պարագայում կոնկրետ գործողություններ չկային, ապա «Ունիոնի» դեպքում ֆուտբոլիստը նույնիսկ ժամանել էր բուժզննման։

Բեռլինը ներկայացնող այս համեստ ակումբը չունի հնարավորություններ մեծ տրանսֆերների համար,  բայց կարողանում է հետաքրքրել ֆուտբոլիստներին՝ ակումբում և թիմում տիրող ջերմ մթնոլորտի շնորհիվ։ Իսկոն բացառություն չէր։

Որպեսզի ավելի պատկերավոր լինի․

Մարզումներից մեկի ժամանակ թիմի ֆուտբոլիստները բացականչում էին․ «Իսկո, Իսկո», իսկ բեռլինյան դերբիում «Հերտայի» նկատմամբ հաղթանակից հետո «Ունիոնի» ավագ Քրիստոֆեր Տրիմելը թիմային լուսանկար էր հրապարակել՝ գրելով․ «Իսկո, սա քեզ համար է»։

Եվ չնայած այս «հեռակա ռոմանտիկային», տրանսֆերային պատուհանի վերջին օրը պարզ դարձավ, որ գործարքը ձախողվել է։ «Ունիոնը» պաշտոնական հայտարարություն էր տարածել` հայտնելով, որ տրանսֆերը չի կայացել, քանի որ նախօրոք պայմանավորված ֆինանսական պահանջների շեմը գերազանցվել է։ Կարճ ասած, ակումբն ու ֆուտբոլիստը նախապես պայմանավորվել են X աշխատավարձի համար, բայց վերջին պահին ֆուտբոլիստն ավելի մեծ պահանջներ է ներկայացրել։

Միհրան Ալեքսանյան