Եղան ֆուտբոլիստներ, որ ընտրեցին ֆինանսը, ոչ թե Չեմպիոնների լիգան․ Եղիշե Մելիքյան

Հուլիսի 5-ին «Փյունիկը», որը Հայաստանի Պրեմիեր լիգայում մինչև վերջ կռիվ տվեց չեմպիոնության համար, կմեկնարկի Չեմպիոնների լիգայում՝ մրցելով ռումինական «Կլուժի» հետ։

Ամպագոռգոռ հայտարարություններ և անիրական թվացող խոստումներ մեր թիմի գլխավոր մարզիչ Եղիշե Մելիքյանից դուք չեք լսի։ Իրատեսական գնահատականներով, սթափ դատողություններով և ոչ քննադատական մոտեցմամբ՝ Մելիքյանը ArmSport-ին ներկայացրել է թիմի չեմպիոնական ճանապարհը, տրանսֆերներն ու ՉԼ-ից սպասելիքները։

-Պարոն Մելիքյան, սկսենք վերջից․ ինչպե՞ս անցավ թիմի հավաքը Դիլիջանում և ի՞նչ տվեց այն Ձեզ:

-Հավաքն անցավ այնպես, ինչպես պլանավորել էինք։ Ամենակարևորն այն է, որ լուրջ վնասվածքներ չունենք։ Լավ կազմակերպված հավաք էր։ Իսկ տվեց այն, որ այն ուղղությունը, որ բռնել էինք նախապատրաստական փուլում, կարողացանք իրագործել։

— Առաջնության վերջնամասը շատ լարված և անկանխատեսելի էր. մտավախություն ունեի՞ք, որ թիմը չեմպիոնությունը կզիջի «Արարատ-Արմենիային»:

-Մենք մեր ուժերի վրա վստահ էինք, բայց մտավախություն կար, որովհետև մրցակիցն ուժեղ էր, մրցակցությունն ուժեղ էր։ Դրա համար միշտ լարված վիճակ էր ու մենք մտածում էինք, որ կարող ենք լինել չեմպիոն և կարող ենք չլինել չեմպիոն։

— Ինչի՞ հաշվին, այնուամենայնիվ, «Փյունիկը» հաղթեց այս պայքարում:

-Ավելի շատ հաղթեց հավատի հաշվին, միասնության հաշվին։ Մենք չենք հուսահատվել, երբ մրցաշրջանի ընթացքում մեզ մոտ ինչ-որ բան չի ստացվել։ Սա ամենաառանցքայինն էր։ Նաև ակումբի կայուն ֆինանսական աշխատանքն էր կարևոր, տղաների նվիրվածությունը։ Անպայման պետք է ընդգծեմ նաև երկրպագուների հավատը մեր հանդեպ, սա ևս շատ կարևոր գործոն էր, նրանք մեզ ուժ էին տալիս։

-Առաջնության ավարտից հետո շատ խաղացողներ հեռացան թիմից, սա ինչո՞վ էր պայմանավորված, եթե հաշվի առնենք, որ հենց այդ կազմը նվաճեց չեմպիոնությունը:

-Ամենաքիչը տասը ֆուտբոլիստ է հեռացել թիմից և տասն էլ՝ տարբեր պատճառներով․ որի պայմանագրի ժամկետն է ավարտվել, որի հետ մենք չցանկացանք երկարաձգել այն, որը ինքը չցանկացավ երկարաձգել այն, քանի որ մենք չկարողացանք ապահովել նրա ուզած ֆինանսը։ Տարբեր են պատճառները․․․

-Չեմպիոնների լիգայում խաղալը ֆուտբոլիստների համար այլևս գրավիչ չէ՞:

-Կա ֆուտբոլիստ, որը մտածում է իր ֆինանսի մասին, ոչ թե՝ Չեմպիոնների լիգայի, և դա քննադատելու էլ չէ․ ամեն ֆուտբոլիստ իր ճանապարհն է ընտրում։ Մեկին ՉԼ-ն պետք է, մյուսին պետք է ֆինանսական լավ հնարավորություններով պայմանագիր, ոչ թե ՉԼ մեկնարկը։ Եղան ֆուտբոլիստներ, որ ընտրեցին ֆինանսը, ոչ թե Չեմպիոնների լիգան։

-Ունեցաք նաև նորեկներ. նրանք կհասցնե՞ն խաղակցվածություն ձեռք բերել թիմակիցների հետ:

-Ոչ, չեն հասցնի «Կլուժի» դեմ առաջիկա խաղին։ Ուշացել ենք։ Բայց ունենք այն, ինչ ունենք։ Տեսնենք՝ ինչ կստացվի։

-Իսկ այս կազմը ինչի՞ կարող է հասնել Չեմպիոնների լիգայում:

-Չեմ կարող ասել, թե ինչի կարող ենք հասնել, որովհետև Չեմպիոնների լիգան լուրջ մրցաշար է։ Պիտի աշխատենք ամեն խաղի առավելագույնը տալ և տեսնել՝ ինչպես կստացվի։ Բայց աշխատում ենք, որ կարողանանք ցույց տալ մեր ուժերի առավելագույնը։

— Ղեկավարության կողմից կոնկրետ առաջադրանք կա՞ այս մրցաշարի հետ կապված:

-Կա այսպիսի առաջադրանք․ ունենք խաղ և այդ խաղը պիտի հաղթենք։ Մենք շատ առաջ չենք նայում ՉԼ-ում․ ունենք այսօր «Կլուժը», մեր նպատակն է նրանց անցնելը, կանցնենք, կմտածենք հաջորդ քայլի մասին։ Այս առաջնությանը նայում ենք շատ կարճ․ տվյալ խաղի մրցակցին պիտի աշխատենք հաղթել։

-Ինչպե՞ս կբնութագրեք «Կլուժին»։

-Շատ ուժեղ մրցակից է։ Այսքանը կարող եմ ասել։ Պետք է շատ լուրջ մոտենանք խաղին, անենք առավելագույնը։ Չեմ ասի, որ վստահություն ունեմ, որ իրենց կհաղթենք, կարող եմ ասել, որ մենք ունենք հնարավորություն հաղթելու, պիտի աշխատենք։

-Պարոն Մելիքյան, Դուք 6 ամիս անընդմեջ արժանացաք ՀՊԼ լավագույն մարզչի կոչմանը, դա ի՞նչ նշանակություն ունի Ձեզ համար:

-Դա նշանակում է, որ մենք բոլորով՝ ողջ թիմը ճիշտ է աշխատել։ Մարզչի արդյունքը թիմից է կախված։ Եթե թիմը լավ է աշխատում, մարզիչը կհասնի հաջողության, եթե ոչ՝ հաջողության չի հասնի։ Դաշտում ֆուտբոլիստներն են օգտագործում իմ մտքերը, եթե նրանք կամ իմ մարզչական շտաբը, ադմինիստրատիվ շտաբը, բժշկական անձնակազմը մի տեղ թերանա, ես արդյունք չեմ ունենա։

Ստելլա Բաբլոյան

                                                          Լուսանկարները՝ «Փյունիկ» ՖԱ-ի և Vbet Armenian Premier League-ի