Հայաստան-Սիրիա հանդիպման լավագույն խաղացող, ինչպես նաև Sada Cup մրցաշարի լավագույն խաղարկող է ճանաչվել Հայաստանի բասկետբոլի հավաքականի բասկետբոլիստ Ալբերտ Թադևոսյանը։ Հայ բասկետբոլիստը խաղից հետո կիսվել է տպավորություններով․
«Մրցաշարը հիանալի էր։ Շնորհակալություն կազմակերպիչներին և երկրպագուներին․ զգում էինք նրանց աջակցությունը և խաղում էինք նրանց համար։ Ամեն ինչ լավ էր մինչև վերջին խաղը։ Ցավոք, չկարողացանք հաղթել։ Մեզ համար շատ դժվար էր, քանի որ վնասվածքներ ունեինք։
Անհատական մրցանա՞կս․ իհարկե, միշտ հաճելի է անհատական մրցանակ ստանալը։ Հասկանում ես՝ կարողացել ես թիմին օգտակար լինել, բայց ամենակարևորն այն է, որ թիմը հաղթի։ Այսօր, ցավոք, այդպես չստացվեց»։
Թադևոսյանն ասում է՝ լավ են տրամադրված Եվրոպայի փոքր երկրների առաջնությանը․ «Իհարկե, այս պարտությունից հետո մի փոքր տխուր ենք, բայց հուսով եմ՝ այլևս նմանօրինակ սխալներ թույլ չենք տա և Մալթայում յուրաքանչյուր խաղում կպայքարենք հաղթանակի համար»։
Ալբերտ Թադևոսյանը խոսել է նաև հավաքականի գլխավոր մարզիչ Ռեքս Կալամյանի հետ համատեղ աշխատանքի մասին․ «Պարզապես երջանկություն է ամեն օր նրա հետ մարզվելը։ Ձեռք ենք բերում մեծ փորձ, գիտելիքներ։ Վայելում ենք նրա հետ անցկացրած ամեն օրը։ Ինչո՞վ է տարբերվում աշխատանքը․ իրականում շատ բաներով։ Նա շատ դեմոկրատ է։ Նա աշխատում է NBA-ում՝ մոլորակի լավագույն բասկետբոլիստների հետ, կարող է գալ, պարզապես ասել, թե ինչ պետք է անենք, ու մենք, իհարկե, կլսենք նրան, բայց նա անընդհատ ցանկանում է մեզ լսել, կարևորում է մեր կարծիքը բոլոր հարցերում։ Հարցնում է՝ ինչպես ենք ավելի շատ սիրում խաղալ, ինչ կոմբինացիաներ կիրառել, դրանից հետո միայն վերլուծություններ է անում ու որոշումներ կայացնում։
Այնքան մեծ աշխատանք է կատարում նաև խաղահրապարակի սահմաններից դուրս։ Կարող է մեր մարզաշապիկները բերել, կամ ինչ-որ իրեր տանել սենյակներ ․․․ անհավանական է։ Կարծում եմ՝ մեր մարզիչներ Ռեքսն ու Փիթը մարզումների ժամանակ ավելի շատ են հոգնում, քան մենք։ Մենք մարզվում գնում ենք, իսկ նրանք ոչ մի րոպե դադար չունեն, շատ արագ մեզ ամեն ինչ բացատրում են, մարզումներից առաջ և հետո ևս անընդհատ աշխատում են։ Մեզ հետ հավասար վազում են ու ցույց տալիս, թե ինչ է պետք անել։ Մի խոսքով, նման մասնագետների հետ աշխատելը մեծ երջանկություն է»։
Հայաստանի բասկետբոլի հավաքականը վաղը կմեկնի Մալթա՝ մասնակցելու Եվրոպայի փոքր երկրների առաջնությանը: Խաղերը կկայանան հունիսի 28-ից հուլիսի 3-ը:
