VBET Պրեմիեր լիգայի ավարտված մրցաշրջանի վերջնամասը շատ լարված ստացվեց․ թեժ պայքար էր ընթանում ինչպես չեմպիոնության, այնպես էլ 3-րդ տեղի համար։ Երևանի «Արարատը» եվրագավաթային եռյակում իր տեղը զիջեց «Ալաշկերտին», բայց Հայաստանի գավաթակիր «Նորավանքի» փոխարեն, այնուամենայնիվ, կխաղա Եվրոպական արենայում։
ArmSport-ը մրցաշրջանն ամփոփել է «Արարատի» ֆուտբոլիստ Դավիթ Մանոյանի հետ։
-Ինչպիսի՞ն էր առաջնությունն «Արարատի» համար՝ թիմի խաղի և գրանցած արդյունքի առումով:
-Շատ ծանր մրցաշրջան ունեցանք, բազմաթիվ խնդիրներ: Լավ ելույթներ ունեցանք Կոնֆերենցիաների Լիգայում, սակայն մի փոքր չբավարարեց մեզ 3-րդ փուլ անցնելու համար:
Հաջող սկսեցինք նաև առաջնությունը: Ձմռանը թիմից հեռացան շատ կարևոր ֆուտբոլիստներ, նաև գլխավոր մարզիչը ու փոխարենը ոչ ոք չհամալրեց թիմը տրանսֆերային արգելքի պատճառով: Ցանկացած թիմ այդ իրավիճակում մեծ խնդիրներ կունենար, ու մեզ մոտ 2-3 տուր հետո սկսվեց վնասվածքների շարքը: Բայց մենք մինչև վերջ պայքարեցինք եվրագավաթներում մեր տեղը պահպանելու համար:
-Առաջնության հատկապես վերջին հատվածը շատ լարված ստացվեց. դա լրացուցիչ մոտիվացիա՞, թե՞ լարվածություն էր ստեղծում:
-Մոտիվացիա միշտ կար, այդ բազում խնդիրները թիմը հաղթահարել է հենց մոտիվացիայի շնորհիվ, ոչ միշտ է ստացվել, բայց դա հասկանալի է:
-Վերջին մի քանի տուրը հաջող չէր «Արարատի» համար. արդեն հոգնե՞լ էիք, թե՞ «Նորավանքի»՝ գավաթակիր դառնալու փաստը լրացուցիչ հանգստություն էր հաղորդել եվրագավաթներին մասնակցելու տեսանկյունից:
-Հոգնածություն, իհարկե, կար, քանի որ պահեստայինների թիվը մեզ մոտ շատ սահմանափակ էր․ թիմից հեռացած ֆուտբոլիստներ, վնասվածքներով ֆուտբոլիստներ և շատ խիտ գրաֆիկ: Հանգստություն երբեք չի եղել, մենք ամեն ինչ փորձում էինք անել 3-րդ տեղը պահպանելու համար:
-«Արարատի» հավանական մրցակիցների ընդլայնված ցուցակն արդեն կա. քեզ համար նախընտրելի թիմեր առանձնացրե՞լ ես:
-Ոչ, դա իմ գործը չէ։
-«Արարատում» մարզչական փոփոխություն եղավ: Եվրագավաթներից առաջ ֆուտբոլիստի համար որքանո՞վ է նպատակահարմար նոր մարզչի հետ աշխատելը:
-Շատ կարճ ժամանակ ունենք մրցաշրջանին նախապատրաստվելու համար: Նպատակահարմար է, թէ ոչ՝ արդեն երկրորդական է, բոլորս պրոֆեսիոնալ ենք:
Ուզում եմ շնորհակալություն հայտնել Էդգար Թորոսյանին ու նրա օգնականներին թիմում իրենց կատարած աշխատանքի համար, նման իրավիճակում շատ բարդ էր թիմը մարզելն ու թիմի առջև դրված նպատակին հասնելը:
-Երկար տարիներ է հանդես ես գալիս Հայաստանի առաջնությունում, առաջնության մակարդակում փոփոխություն կա՞ խաղացողի համար:
-Քիչ է փոփոխությունը: Կուզենայի ավելի շատ հանդիսատես ներկա լիներ առաջնության խաղերին:
-Ո՞րն է այն առավելագույնը, որին ձգտում ես ֆուտբոլում:
-Ունենալ շատ հաղթանակներ ու նվաճել հնարավորինս շատ տիտղոսներ: Կարիերան ավարտելուց հետո հիշվում են քո նվաճած տիտղոսները, այլ ոչ թե այլ բաներ:
Ստելլա Բաբլոյան
