Հարձակվող Պաուլո Դիբալան չի երկարաձգել պայմանագիրը «Յուվենտուսի» հետ և այս ամառ կհեռանա թիմից՝ ազատ գործակալի կարգավիճակով։
Այս տեղեկությունն ավելի վաղ հաստատել էր նաև թուրինյան ակումբի գլխավոր տնօրեն Մաուրիցիո Արիվաբենեն։ «Հունվարյան տրանսֆերներով, Վլահովիչի գալով, Պաուլոյի դերն այլևս կենտրոնական չէ նախագծում: Այդ իսկ պատճառով այս լուծումն ավելի նախընտրելի էր։ Ոչ ոք երբեք կասկածի տակ չի դրել Պաուլոյի կարողությունները։ Բայց պետք էր ամեն ինչ մանրամասն դիտարկել։ Մենք այս որոշումը կայացրել ենք դեռ հունվարին։ «Յուվենտուսը» կարող էր նրան համեստ գումար առաջարկել, բայց դա անհարգալից կլիներ Պաուլոյի նկատմամբ: Որոշումն ընդունված է»,- Արիվաբենեին է մեջբերում Tuttomercatoweb-ը։
Սակայն թուրինյան գրանդը Դիբալայի հեռանալուց հետո կփորձի լրացնել հարձակման գծում բացն արդեն առաջիկա ամառ․․․
«Յուվենտուսն» իր հայացքն ուղղել է դեպի «Լիվերպուլի» վինգեր Մոհամեդ Սալահը: Ինչպես հաղորդում է Mundo Deportivo-ն, թուրինյան ակումբը ցանկանում է օգտվել այն հանգամանքից, որ «Լիվերպուլին» չի հաջողվում երկարաձգել պայմանագիրը եգիպտոսցու հետ: «Յուվենտուսի» առավելությունն այն է, որ Իտալիայում ավելի ցածր հարկերի պատճառով նրանք կարող են խաղացողին ավելի շահավետ պայմանագիր առաջարկել: Հավանական է, որ «Յուվենտուսը» դիտարկում է Սալահին որպես Պաուլո Դիբալային փոխարինող, ով ամռանը կլքի ակումբը։
Իր հերթին «Սասուոլոյի» գործադիր տնօրեն Ջովանի Կարնևալին պատասխանել է այն լուրերին, թե իրենց հարձակվող Ջակոմո Ռասպադորին կարող է տեղափոխվել «Յուվենտուս»: Գործակալը չի բացառում իրադարձությունների նման զարգացումը։ «Անցյալ ամառ մենք Լոկատելիին վաճառեցինք «Յուվենտուսին»: Եթե մենք կարողանանք ևս մեկ գործարք կնքել, մենք ուրախ կլինենք»,- մեջբերում է Կարնևալիին football-italia-ն։
«Մանչեսթեր Յունայթեդի» հարձակվող Անտոնի Մարսիալը ևս հայտնվել է թուրինցիների ուշադրության կենտրոնում, հայտնում է La Stampa-ն: Ֆրանսիացին այժմ վարձավճարով հանդես է գալիս «Սևիլյայում»։ Ֆուտբոլիստի տրանսֆերային արժեքը գնահատվում է 28 միլիոն եվրո։
Լոկատելիի և Զաքարիայի հետ պայմանագիր կնքելուց հետո «Յուվենտուսի» ղեկավարությունը «Լիլի» ֆուտբոլիստ Ռենատո Սանչեշին համարում է կիսապաշտպանության կատարյալ լրացում: Այդ մասին հայտնում է Football-italia-ն։ Արդեն այս ամիս նախատեսվում է հանդիպում խաղացողի գործակալ Ժորժե Մենդեշի հետ՝ քննարկելու հավանական տրանսֆերի մանրամասները։ Կիսապաշտպանի տրանսֆերի համար «Ծեր սինյորայի» մրցակիցներն են համարվում «Միլանն» ու «Արսենալը»։ Առաջինն արդեն կապվել էր խաղացողի հետ հունվարին, բայց չէր կարողացել համաձայնության գալ հենց «Լիլի» հետ:
«Յուվենտուսի» ղեկավարությունը «Ռոմային» առաջարկել է փոխանակվել ֆուտբոլիստներով։ Ինչպես տեղեկացնում է Football Italia-ն, թուրինյան գրանդը ցանկանում է ձեռք բերել Նիկոլո Ձանիոլոյին, փոխարենը հռոմեացիների ճամբար ուղարկել Ուեսթոն Մաքքեննիին։ Այդկերպ «ծեր սինյորայի» ղեկավարությունը ցանկանում է իջեցնել Ձանիոլոյի տրանսֆերային արժեքը, որը հռոմեացիները գնահատում են 33 միլիոն եվրո։ Մաքքեննիի տրանսֆերային արժեքն իր հերթին գնահատվում է 25 միլիոն եվրո։
«Չելսիի» միանգամից չորս ֆուտբոլիստներ հայտնվել են «Յուվենտուսի» հետաքրքրությունների ոլորտում։ Ինչպես հայտնում է La Gazzetta dello Sport-ը, թուրինյան ակումբը հետաքրքրված է պաշտպան Անտոնիո Ռուդիգերով, կիսապաշտպան Ժորժինյոյով, ինչպես նաև եզրային հարձակվողներ Հակիմ Զիեշով և Քրիստիան Պուլիշիչով։ Նշվում է, որ Ժորժինյոն «Յուվենտուսի» գլխավոր նպատակներից մեկն է։ Զիեշն ու Պուլիշիչը այլընտրանքային տարբերակներ են, եթե «Յուվենտուսը» չկարողանա ձեռք բերել Նիկոլո Զանիոլոյին «Ռոմայից»: Ինչ վերաբերում է Ռուդիգերին, ապա նրա պայմանագիրը «Չելսիի» հետ ավարտվում է ամռանը և կարող է նոր թիմի պայմանագիր ստորագրվել ազատ գործակալի կարգավիճակով։
Թուրինյան ակումբը հետաքրքրված է նաև «Բորդոյի» պաշտպան Ռաուլ Բելլանովայի ծառայություններով: Ինչպես հայտնում է Calciomercato-ն, թուրինյան ակումբը պատրաստ է ֆուտբոլիստի տրանսֆերի համար վճարել 500 հազար եվրո։ Այս մրցաշրջանում Բելլանովան վարձավճարով հանդես է գալիս իտալական «Կալյարիում»:
«Մանչեսթեր Յունայթեդի» կիսապաշտպան Պոլ Պոգբան չի երկարաձգի պայմանագիրն անգլիական ակումբի հետ, որն ավարտվում է մրցաշրջանի վերջում: Այս մասին հայտնում է Calciomercato-ն: Աղբյուրի փոխանցմամբ, «Յուվենտուսը» 28-ամյա ֆուտբոլիստին իր գլխավոր տրանսֆերային նպատակն է դարձրել ամառային տրանսֆերային պատուհանի համար և պատրաստ է Պոգբային թիմ վերադարձնել, որի կազմում ֆրանսիացին արդեն հանդես եկել է 2012-ից 2016 թվականներին: Ընթացիկ մրցաշրջանում Պոգբան ԱՊԼ-ի 14 խաղում դարձել է գոլի և 8 գոլային փոխանցման հեղինակ: Նրա տրանսֆերային արժեքը 55 մլն եվրո է գնահատվում:
