Հայաստանի ազգային հավաքականի կիսապաշտպան Լուկաս Սելարայանը կշարունակի հանդես գալ «Կոլամբուս Կրյու» ակումբում։ 29-ամյա ֆուտբոլիստը նոր՝ 3 տարվա պայմանագիր է կնքել ամերիկյան ակումբի հետ։ Այս մասին հայտնում է «Կոլամբուս Կրյուի» պաշտոնական կայքը։
«Անցած 2 մրցաշրջանների ընթացքում Լուկասն ապացուցել է, որ MLS-ում խաղերի ելքի վրա ազդող թոփ խաղացողներից մեկն է ու մենք շատ ուրախ ենք, որ նոր պայմանագիր ենք կնքում նրա հետ»,- ասել է «Կոլամբուս Կրյուի» նախագահ Թիմ Բեզբատչենկոն ու շարունակել․
«Մենք 2019 թվականի դեկտեմբերին պայմանագիր կնքեցինք Լուկասի հետ, քանի որ գիտեինք՝ ինչքան կարևոր է MLS-ում տարբերություն ստեղծող խաղացող ունենալը՝ չեմպիոնական հավակնություններ ունենալու համար։ Նա ընտրեց «Կոլամբուսը», քանի որ ցանկանում էր տիտղոսներ նվաճել,ինչն էլ արեց՝ օգնելով մեզ նախորդ տարի հաղթել ՄԼՍ-ի Գավաթում, իսկ այս տարի՝ Campeones Cup-ում։
Լուկասն ապացուցել է, որ կարող է հանդես գալ մեծ ճնշման տակ, ու նա մշտապես փայլում է։ Անհամբերությամբ ենք սպասում, թե Լուկասն ու թիմն էլ ինչերի կկարողանան միասին հասնել 2022-ին և դրանից հետո»։
Սելարայանը «Կոլամբուս Կրյուի» կազմում բոլոր մրցաշարերում ընդհանուր առմամբ 53 հանդիպման է մասնակցել՝ դառնալով 21 գոլի և 19 գոլային փոխանցման հեղինակ։
