Գաղտնիք չէ, որ Հայաստանի ազգային հավաքականը անկախ Հայաստանի պատմության մեջ երկրորդ անգամ ռեալ շանս է ստացել Եվրոպայի առաջնության եզրափակիչ փուլի ուղեգիր ձեռք բերելու:
Նախորդ անգամ մեր «բախտի» վրա քար գցեց իսպանացի Իտուրալդե Գոնսալեսը: Այս անգամ նույնպես խնդիրներ կան: Ազգայինի ճամբարում չէ Հենրիխ Մխիթարյանը:
Հավաքականի դիրիժորի վնասվածքը գլուխկոտրուկ է առաջացրել Արմեն Գյուլբուդաղյանցի համար: Բացի Հենոյից, չկա նաև Կառլեն Մկրտչյանը: Լիխտենշտեյնի դեմ չի խաղա նաև Կամո Հովհաննիսյանը, իսկ Ֆինլանդիայի դեմ խաղում մեր հիմնական ձախ պաշտպանի մասնակցությունը հարցականի տակ Է: Եթե գաճաճ Լիխտենշտեյնի դեմ առանց Հենո կարելի է խաղալ, ապա Ֆինլանդիայի դեմ, միանշանակ, դժվար է լինելու: Բայց ինչպես հավաքականի գխավոր մարզիչն է ասում, շարժվենք խաղից խաղ:
Երկար ճանապարհ անցնելուց հետո Հայաստանի հավաքականը կմրցի Լիխտենշտեյնի ընտրանու դեմ: Մրցակիցը խմբի ակնհայտ հետնապահն է , բայց չպետք է մոռանալ 11 ամիս առաջ նույն հավաքականի հետ ոչ-ոքին: Լիխտենշտեյն էլ իր հերթին, սեպտեմբերին , Հունաստանից միավորներ է խլել: Դա ևս մեկ փաստ է , որ Լիխտենշտեյնի հետ 1 ոտքով խաղալ և ուժեր խնայել, հնարավոր չէ: Հավաքականի լուսավոր կետերից մեկը Սարգիս Ադամյանն է: Բավարիայի դեմ խաղում Ադամյանի «բենեֆիսը» մինչ օրս արդիական է Մյունխենում: Մխիթարյանի բացակայության պայմաններում, ժամանակն է , որ առաջատարի պարտականությունները ստանձնի հենց Ադամյանը:
Շատ կարևոր 4 ֆուտբոլիստի վերադարձ ազգային հավաքական. Մարկոս, Օզբիլիս, Արարատ, Մալաքյան: Մխիթարյանի դիրքում կարող է խաղալ նաև Մարկոսը: Բայց ամենահայ բրազիլացին , նույնիսկ լավագույն մարզավիճակում գտնվելու դեպքում, հավաքականում խաղում է առավելագույնը 70 րոպե: Արարատն իր ակումբում խաղում է աջ պաշտպանի դիրքում, բայց խաղացել է նաև ձախից: Վարդան Մինասյանի օրոք ևս, Արարատը կատարել է ձախ պաշտպանի պարտականություններ: Այնպես որ, դեպքերի վատ զարգացման դեպքում, Արարատը կփոխարինի Կամո Հովհաննիսյանին:
Լիխտենշտեյնի դեմ խաղում Մկրտչյանի փոխարեն կարող է խաղալ Ռումյան Հովսեփյանը, ում փոխանցումների «կուլտուրան» ավելի բարձր մակարդակի վրա է: Հարձակման գծում կասկած չի հարուցում Կարապետյանի մասնակցությունը: Իսկ ահա, Ֆինլանդիայի դեմ խաղում, դժվար է հավատալ, որ «Սոչիի» հարձակվողը խաղը կսկսի մեկնարկային րոպեներից: Դեպքերի լավ զարգացման դեպքում, Ֆինլանդիայի դեմ միգուցե մերոնք խաղան «կեղծ» ինը համարով: Այդ դեպքում, միաժամանակ խաղադաշտում գտնվելու հնարավորություն կստանան Բարսեղյանը ,Ադամյանն ու Ղազարյանը:
Ստեղծագործողի պարտականությունները «կգցեն» Մարկոսի ուսերին, իսկ հենակետային գոտում խաղ կկառուցեն ու կքանդեն Մալաքյանն ու Գրիգորյանը, եթե իհարկե «Ալաշկերտի» կիսապաշտպանը պատրաստ լինի խաղին: Հավաքականը գտնվում է հոգեբանական շատ լավ վիճակում և ժամանակն է գոնե ապացուցելու, որ մեր ընտրանին կախված չէ մեկ ֆուտբոլիստից: Ժամանակն է նաև Ադամյանի լավագույն որակները տեսնելու հավաքականում և «քաղել» դրա պտուղները՝ ուղեգրի տեսքով: Բարձունքի ճանապարհին միշտ էլ դժվարություններ լինում են: Դժվարությունները հաղթահարելի են դառնում այն դեպքում, երբ քեզ հետ չես մոռացել վերցնել հավատը: Իսկ այս պահին հավաքականին հավատում են բոլորը, անկախ սեռից, տարիքից և ազգային պատկանելիությունից:
Արմեն Գարամյան
