Այսօր կկայանա Չեմպիոնների Լիգայի խմբային փուլի 4 տուրի երկրորդ խաղային օրը․ պայքարի մեջ կմտնեն A, B, C և D խմբերի ներկայացուցիչները։ Այդ խմբերում տիրող իրավիճակի մասին համառոտ կխոսենք այսօրվա մեր նյութում։
✅ A Խումբ
Նախորդ անգամ մենք արդեն խոսել էինք, թե որքան կարևոր է «Լայպցիգի» համար ՊՍԺ-ի դեմ հանդիպումը։ Դե ինչ, առաջին խաղում գերմանացիները զիջեցին ֆրանսիացիներին, իսկ այս տուրում ևս մեկ պարտությունը կարող է ճակատագրական լինել «Լայպցիգի» համար։ Այսօրվա խաղերից հետո շատ բան արդեն պարզ կլինի A խմբում, և կախված խաղերի արդյունքներից` կամ կունենք փլեյ-օֆիի ակնհայտ թեկնածուների, կամ էլ այս խումբը կդառնա ամենաինտրիգայիններից մեկը։ Համենայն դեպս, «Բրյուգեն», ի դեմս «Զալցբուրգի» և «Շերիֆի», այս մրցաշրջանի գլխավոր բացահայտումներից մեկն է, և հետաքրքիր կլինի հետևել, թե ո՞ւր կտանի այս ոդիսականը բելգիացիներին․․․
✅ B Խումբ
«Լիվերպուլն» արդեն այսօր կարող է ձևակերպել փլեյ-օֆիի ուղեգիրը, եթե կարողանա հաղթել «Աթլետիկոյին»։ B խմբի գլխավոր ինտրիգն ըստ ամենայնի, հարցն է, թե կկարողանա՞ «Միլանը» միանալ երկրորդ ուղեգրի համար պայքարին։ Այնպես որ, այս երեկո շա՜տ հետաքրքիր կլինի հետևել հենց այս խմբի իրադարձություններին։ Միլանում ու Լիվերպուլում թեժ երեկո է սպասվում․․․
✅ C Խումբ
Այսօր C խմբում կարող է որոշվել առաջին հորիզոնականի ճակատագիրը։ «Բորուսիան» սեփական հարկի տակ կփորձի ռևանշի հասնել «Այաքսի» նկատմամբ, նախորդ տուրում վերջիններիս կողմից հասցված «ապտակի» համար (0-4): Իսկ անհաջողության դեպքում «մեղուները» կարող են լավ հնարավորություն տալ «Սպորտինգին»՝ միավորներով հավասարվելու իրենց։ Վերջինս, իր հերթին, այսօր հաղթելու դեպքում, կարող է զրկել «Բեշիքթաշին» եվրագավաթային գարունից։
✅ D Խումբ
«Ինտերն» այս տուրում կարող է «Շերիֆին» իջեցնել երկնքից․ նախորդ տուրում դա միլանցիների մոտ արդեն ստացվել է։ Իսկ «Ռեալը» պետք է որ խնդիրներ չունենա սեփական հարկի տակ «Շախտյորի» դեմ խաղում։ Վիճակահանությունից հետո շատերն այս խումբը համարում էին ամենականխատեսելիներից մեկը, սակայն այս խաղարկության ամենահամեստ ակումբը՝ «Շերիֆը», խառնեց բոլորի խաղաքարտերը։ Ժամանակավոր բնույթ կրող երևո՞ւյթ է դա, անսպասելիության էֆեկտ, պատահականություն, օրինաչափությո՞ւն․․․ դեռ վաղ է հստակ ասել։ «Շերիֆի էֆեկտը»․․․ լավ վերնագիր է, չէ՞․․․ ու այս թիմի սխրագործության մասին, մեծ հավանակնությամբ, հետագայում կանդրադառնանք առանձին նյութով։
Իսկ այժմ, առաջին հայացքից թվում է, որ քիչ-քիչ այս խմբում ամեն ինչ իր տեղն է ընկնում․․․ սակայն, միգուցե, «Շերիֆն» ու «Շախտյորը» ա՞յլ կարծիք ունեն։ Այդ հարցի պատասխանը կստանանք արդեն այս երեկո։
Հանդիպումների ժամանակացույցը
⚽ 21։45․ «Միլան»-«Պորտու»
⚽ 21։45․ «Ռեալ»-«Շախտյոր»
⚽ 00։00․ «Մանչեսթեր Սիթի»-«Բրյուգե»
⚽ 00։00․ «Լայպցիգ»-ՊՍԺ
⚽ 00։00․ «Լիվերպուլ»-«Աթլետիկո»
⚽ 00։00․ «Բորուսիա Դ»-«Այաքս»
⚽ 00։00․ «Սպորտինգ»-«Բեշիքթաշ»
⚽ 00։00․ «Շերիֆ»-«Ինտեր»
Վար Բաբայան
