Սուլշերի հերթական քննությունը, Զալցբուրգը մեկ ոտքով փլեյ-օֆֆում է․ ՉԼ անոնս

Այսօր մեկնարկում է Չեմպիոնների Լիգայի խմբային փուլի 4 տուրը։ Երեքշաբթի պայքարի մեջ կմտնեն E, F, G և H խմբերի ներկայացուցիչները։ Խմբերում տիրող իրավիճակի մասին համառոտ կխոսենք այսօրվա մեր նյութում։

✅ E Խումբ

E խմբում միայն մեկ բան է ակնհայտ․ «Բավարիան» առանց մեծ ջանքեր գործադրելու այս կվարտետում գլխավորն է և գրեթե կասկած չկա, որ գերմանական «մեքենան», առանց ճանապարհին խոչընդոտների հանդիպելու, կհասնի սպասված կայանատեղի՝ 1-ին հորիզոնական։ Իսկ ահա ինչն է անսպասելի (եթե իհարկե կարելի է դա անակնկալ համարել), դա «Բարսելոնայի» իրավիճակն է այս խմբում։ Իհարկե, կատալոնական թիմին այս տուրում ամենամատչելի մրցակիցն է սպասում, և եթե հաշվի առնենք, որ «Բենֆիկան» էլ հանդիպելու է վերը նշված «մեքենային» (առաջին դիմակայության հաշիվը՝ 0-4) և, ամենայն հավանականությամբ, ևս մեկ անգամ «վրաերթի» կենթարկվի (թող ներեն ինձ պորտուգալական ակումբի երկրպագուները), ապա «Բարսելոնան» լավ հնարավորություն է ստանում բարելավելու մրցաշարային իրավիճակը․ մնում է միայն երեք միավոր վաստակել «Դինամոյի» հետ խաղում․․․

✅ F Խումբ

Ամենաանկախատեսելի խմբերից մեկն այս մրցաշրջանում F խումբն է։ ՄՅՈՒ-ն կարողացավ նախորդ տուրում դժվարին հաղթանակ տանել «Ատալանտայի» նկատմամբ՝ միևնույն ժամանակ հետաձգելով նաև Սուլշերի պաշտոնանկությունը։ Իսկ ահա այսօր, այս թիմերը կրկին կհանդիպեն, սակայն այս անգամ արդեն Ապենիններում, և մանկունիանցիներին իսկապես շատ ծանր հանդիպում է սպասվում․ չի բացառվում, որ այսօրվա դուելը վերջինը լինի Սուլշերի համար՝ ՄՅՈՒ-ի ղեկին։ Իսկ ահա այս մրցակիցներից մեկի սայթաքումից կարող է օգտվել «Վիլյառեալը», որի ծրագրերը խափանողի դերում այսօր հանդես կգա «Յանգ Բոյսը»։ Անկախ նրանից, թե ինչ արդյունքներ կգրանցվեն այսօր, ամեն ինչ գնում է նրան, որ այս խմբում վերջնական պատասխանները կստանանք միայն վերջին տուրում։ Եվ դա էլ ավելի հետաքրքիր է դարձնում այս կվարտետին հետևելը։

✅ G Խումբ

Իսկ անձամբ ինձ համար ամենահետաքրքիր խմբերից մեկը G-ն է։ Բոլորը պնդում են, որ մրցաշարի գլխավոր բացահայտումը «Շերիֆն» է, և իսկապես, չեմ առարկում, դա այդպես է, բայց․․․ անկեղծ ասեք, շատե՞րդ էիք ակնկալում «Զալցբուրգին» տեսնել առաջատարի դիրքում երեք տուրերից հետո, այն էլ միավորների այսպիսի առավելությամբ։ Անկախ այսօր գրանցվելիք արդյունքներից, ավստրիական ակումբը կպահպանի առաջին տեղն այս տուրից հետո, իսկ եթե այսօր նրանք հաղթեն «Վոլֆսբուրգին», ապա նույնիսկ կապահովեն փլեյ-օֆֆի ուղեգիրը, քանի որ նվազագույնս կապահովեն երկրորդ տեղը խմբում։

✅ H Խումբ

Եվս մեկ ակումբ, որ կարող է այսօր ապահովել փլեյ-օֆֆի ուղեգիր, դա «Յուվենտուսն» է։ Եթե Ալեգրիի թիմի մոտ ներքին առաջնությունում գործերը, մեղմ ասած, այդքան էլ լավ չեն ընթանում, ապա ՉԼ-ում «ծեր սինյորան» իրեն շատ էլ լավ է զգում։ Ավելի վաղ արդեն խոսել էինք, որ այս խումբը ամենականխատեսելիներից է, և կարծես թե, այդպես էլ ստացվում է։ Նայեք վերևի նկարին, որտեղ մրցաշարային աղյուսակն է․․․ վերջին տուրում թիմերի դասավորվածությունը 90%-ով կլինի նույնը, դե, մաքսիմում կարող են «Յուվեն» ու «Չելսին» փոխվել տեղերով, բայց դա, միևնույն է, ոչինչ չի փոխում․ երկու գրանդները կշարունակեն պայքարը փլեյ-օֆֆում, «Զենիթը» կուղևորվի Եվրոպա Լիգա, իսկ «Մալմոն»՝ Սբ․Ծննդյան տոներին նախապատրաստվելու․․․

Հանդիպումների ժամանակացույցը

⚽ 21։45․ «Վոլֆսբուրգ»-«Զալցբուրգ» 
⚽ 21։45․ «Մալմո»-«Չելսի» 
⚽ 00։00․ «Բավարիա»-«Բենֆիկա»
⚽ 00։00․ «Դինամո Կիև»-«Բարսելոնա»
⚽ 00։00․ «Ատալանտա»-«Մանչեսթեր Յունաթեդ»
⚽ 00։00․ «Վիլյառեալ»-«Յանգ Բոյս»
⚽ 00։00․ «Սևիլյա»-«Լիլ»
⚽ 00։00․ «Յուվենտուս»-«Զենիթ»

Վար Բաբայան