Հոկտեմբերի 30-ին Երևան-Էջմիածին ճանապարհին կայացավ «Հայաստանի Հանրապետության վարչապետի գավաթ» կրոսավազքի սիրողական մրցաշարը․ 3 տարիքային խմբի մոտ 1400 մասնակից կանգնեցին մեկնարկին, հաղթահարեցին 3 և 10 կմ մրցատարածությունն ու հասան եզրագծին։
18-35 տարեկան տղաների պայքարում 10 կմ տարածությունը բոլորից շուտ հաղթահարեց Հայաստանի աթլետիկայի հավաքականի անդամ, վազորդ Երվանդ Մկրտչյանը, որը 10 կմ-ն վազեց մոտ 30 րոպեում և արժնացավ 1 մլն դրամ մրցանակին։
«Սա հիանալի հնարավորություն էր՝ թե՛ ինքդ քեզ, թե՛ մյուս մարզիկներին ցույց տալու, որ կարող ես հաղթահարել քո առջև դրված խնդիրը: Շատ լավ հաղթահարեցի 10 կմ-ը»,- ասում է գյումրեցի Երվանդ Մկրտչյանը ու նշում, որ Գյումրիում իր համար ավելի դժվար է վազելը, քանի որ ծովի մակարդակից բարձր է, ճանապարհն էլ ոչ այնքան հարթ։
«Չի կարելի ասել, թե հավասարը չունեի: Այստեղ շատերին ճանաչում եմ, բոլորն իմ ընկերներն են ու բոլորն էլ շատ լավ վազեցին: 10 կմ վազելու փորձ չունեի, 5 անգամ մասնակցել եմ Երևանի կիսամարաթոնին ու 5 անգամ էլ չեմպիոն դարձել։ Նման մրցաշարերը շատ եմ կարևորում. սա ևս կնպաստի աթլետիկայի զարգացմանը մեր երկրում, քանի որ աթլետիկան սպորտի թագուհին է»,- ասում է Երվանդ Մկրտչյանը։
18-35 տարեկան տղաների պայքարում երկրորդ տեղը զբաղեցրեց Բալաբեկ Հարությունյանը, իսկ պատվո հարթակի երրորդ աստիճանին կանգնեց Մհեր Մաշումյանը։
«ՀՀ վարչապետի գավաթ» կրոսավազքի սիրողական մրցաշարի ամենատարեց մասնակիցը Խաչատուր Փրխոյանն էր. նա 80 տարեկան է։ Ասում է՝ սպորտով չի զբաղվել, բայց առողջ ապրելակերպի ջատագով է, օրական 4-5 կմ քայլում է.
«Փարաքարից եմ, գյուղացիները, իմանալով, որ շատ շարժուն մարդ եմ, համոզեցին, որ մասնակցեմ: Իհարկե, երիտասարդները կհաղթեն, բայց ցանկանում եմ իմ օրինակով ցույց տալ, որ մարդ ինչքան էլ հասակով լինի, պետք է ոչ մի բանից ետ չմնա: Լավ է, որ երիտասարդները առողջ ապրելակերպ են վարում, զբաղվում են սպորտով: Նման մրցաշարերն էլ շատ կարևոր են»:
Խաչատուր Փրխոյանը 1 ժամ 5 րոպեում հաղթահարեց 10 կմ մրցատարածությունը: Ասում է՝ դժվար չէր, բայց տարիքն իրեն զգացնել տվեց: Խաչատուր Փրխոյանը և կանանց պայքարում ամենատարեց մասնակիցը՝ 72-ամյա տիկին Շուշանիկն արժանացան խրախուսական մրցանակների։
18-35 տարեկան կանանց պայքարում հաղթողի կոչումը նվաճեց Էլլադա Ալավերդյանը, երկրորդը վանաձորցի Լիլիթ Հարությունյանն էր, իսկ երրորդ տեղը գրավեց Ալեքսանդրա Գալինսկին Ստեփանակերտից։
Պարգևատրման արարողությանը մասնակցեցին ՀՀ վարչապետ Նիկոլ Փաշինյանը, ԿԳՄՍ նախարար Վահրամ Դումանյանը, ԿԳՄՍ նախարարի տեղակալ Կարեն Գիլոյանը,Էջմիածնի քաղաքապետ Դիանա Գասպարյանը և պաշտոնատար այլ անձինք։
Ուղերձով հանդես եկավ ՀՀ վարչապետ Նիկոլ Փաշինյանը և շնորհավորեց բոլոր մրցանակակիրներին․
«Շնորհավորում եմ բոլոր մրցանակակիրներին, ինչպես նաև մեզ բոլորիս։ Այս ընթացքում ես անընդհատ հետաքրքրվում էի, թե մասնակցության քանի դիմում ենք ստացել ոչ թե վիճակագրության համար, այլ որպեսզի հասկանայի՝ արդյոք այս նախաձեռնությունն անհրաժե՞շտ է մարդկանց, ՀՀ քաղաքացիներին։ Այն փաստը, որ այսօր ավելի քան 1500 մասնակից ենք ունեցել, տալիս է այդ հարցի պատասխանը՝ այո, անհրաժեշտ է։
Ուզում ենք , որ մեր հայրենակիցներն իրենց առջև խնդիրներ դնեն ու լուծեն դրանք, կյանքում էլ առաջնորդվեն այդ գաղափարով՝ ունենալ նպատակասլացություն և վճռականություն, կանգնել մեկնարկին, անցնել տարածությունն ու հատել վերջնարկը»։
ԿԳՄՍ նախարարի տեղակալ Կարեն Գիլոյանն իր խոսքում ընդգծեց, որ մասնակիցներից յուրաքանչյուրն այսօր փոքրիկ սխրանք գործեց․
«Այսօր մենք ևս մեկ քայլ կատարեցինք դեպի մասսայական սպորտ։ Մենք ևս մեկ անգամ ապացուցեցինք, որ կարող ենք և պարտավոր ենք առողջ ապրել։ 10 հազար մետրը պատկառելի տարածք է։ Որպեսզի խոսքերիս լրջությունը պատկերացնեք, պետք է փաստեմ, որ Հայաստանում 10 կմ-ի պրոֆեսիոնալ վազորդ չունենք։
Այնպես որ, սա իսկապես շատ մեծ մրցատարածք էր, ու մասնակիցներից յուրաքանչյուրը փոքրիկ սխրանք գործեց։ Մասնակիցներից յուրաքանչյուրը հաղթանակ տարավ ինքն իր նկատմամբ»,- ասաց Կարեն Գիլոյանը ու նաև հայտնեց, որ մրցաշարին մասնակցել է նաև Ուկրաինայի դեսպանատան առաջին քարտուղար Վիկտոր Օլեյնիկը, որին խրախուսական մրցանակ հանձնվեց։
Նշենք՝ «ՀՀ վարչապետի գավաթ» կրոսավազքի սիրողական մրցաշարին մասնակցեց նաև ArmSport-ի ֆոտոթղթակից Գևորգ Ղազարյանը։
Առաջին տարիքային խմբի`15-17 տարեկան դպրոցականների մրցանակակիր տղաները և աղջիկները ստացան համակարգիչներ: Երկրորդ և երրորդ տարիքային խմբերում առաջին տեղի համար սահմանված էր 1 մլն դրամ մրցանակ, երկրորդ տեղի համար` 600 հազար դրամ, երրորդ տեղի համար` 400 հազար դրամ, չորրորդ տեղի համար` 150 հազար դրամ, հինգերորդ տեղի համար` 100 հազար դրամ:
Դրամական խրախուսումներ են նախատեսված նաև 6-10-րդ տեղեր գրավածների համար` 75 հազարական դրամ, և 11-20-րդ տեղերի համար` 50 հազարական դրամ: Բացի դրանից՝ մրցաշարի 3 տարիքային խմբերում 1-3-րդ տեղերը գրաված մասնակիցները պարգևատրվեցին ԿԳՄՍ նախարարության հավաստագրերով, գավաթներով, մեդալներով:
