Նախորդ գիշերն ավարտվեց ԱԱ-2022 եվրոպական գոտու ընտրական փուլի 8-րդ տուրը։ Առաջարկում ենք անդրադառնալ այս պահին բոլոր խմբերում տիրող իրավիճակներին և գլխավոր իրադարձություններին, ինչպես նաև հասկանալ՝ ինչ ակնկալել վերջին երկու տուրերում։
Նախ նշենք, որ Ազգերի լիգայի կիսաեզրափակիչ և եզրափակիչ հանդիպումներով պայմանավորված, մի շարք խմբերի հանդիպումներ չկայացան։ Բելգիան, Ֆրանսիան, Իսպանիան և Իտալիան վիճարկում էին Ազգերի լիգայի հաղթողի տիտղոսը, որն, ի վերջո, բաժին հասավ ֆրանսիացիներին։
Այս անգամ, ավանդույթը խախտելով, ԱԱ ընտրական փուլին մեր անդրադարձը կսկսենք վերջին՝ J խմբից, որում ընդգրկված է մեր հավաքականը։
J խումբ
Նախ, 7-րդ տուրում մեր ընտրանին ոչ-ոքի՝ 1-1 ավարտեց հանդիպումը Իսլանդիայի հետ արտագնա խաղում։ Մեր հավաքականը առաջին խաղակեսից հետո առջևում էր հաշվի մեջ, սակայն այդ մեկ գոլի առավելությունը պահպանել Կապառոսի թիմի մոտ չստացվեց։ Մյուս խաղերում ռումինները համառ պայքարում զիջեցին գերմանացիներին՝ 1-2 հաշվով, իսկ մակեդոնացիները Լիխտենշտեյնի հավաքականին հաղթեցին 4-0 հաշվով։
Իսկ իոկտեմբերի 11-ին Հայաստանի հավաքականը կրկին արտագնա խաղում՝ այս անգամ Բուխարեստում, նվազագույն հաշվով պարտվեց Ռումինիայի ընտրանուն: Գերմանիայի հավաքականը 4-0 հաշվով ջախջախեց Հյուսային Մակեդոնիային: Զուգահեռաբար ընթացող խաղում Իսլանդիան նույն՝ 4-0 հաշվով առավելության հասավ Լիխտենշտեյնի նկատմամբ:
8-րդ տուրից հետո Գերմանիայի հավաքականը 21 միավորով գլխավորում է J խմբի մրցաշարային աղյուսակը, Ռումինիան 13 միավորով երկրորդն է, իսկ Հյուսիսային Մակեդոնիան 12 միավորով երրորդն է: Հայաստանի հավաքականը նահանջել է 4-րդ հորիզոնականը: Վերջին երկու հավաքականներն ունեն հավասար՝ 12 միավոր, սակայն բալկանյան հավաքականը լրացուցիչ ցուցանիշներով (խփած և բաց թողնված գնդակների տարբերություն) առաջ է մեր հավաքականից։
Գերմանիայի հավաքականն ապահովել է J խմբի մրցաշարային աղյուսակի առաջին հորիզոնականն ու դարձել է առաջին թիմը, որը պաշտոնապես ապահովել է իր մասնակցությունը Քաթար-2022-ին: Հիշեցնենք, որ բոլոր խմբերում առաջին հորիզոնականը զբաղեցրած թիմերը ստանում են ԱԱ-2022 եզրափակիչ փուլի ուղեգիր, իսկ երկրորդ տեղերը զբաղեցրած թիմերը կխաղարկեն ևս 5 ուղեգիր արդեն փլեյ-օֆֆ փուլում։ Հայաստանի հավաքականը ևս կարող է հնարավորություն ստանալ մասնակցել այդ փուլին, եթե իհարկե վերջին երկու խաղերում անհրաժեշտ արդյունք գրանցի։ Վերջին երկու խաղերը մեր ընտրանին կանցկացնի տանը․ նախ Երևան կժամանեն մակեդոնացիները, ովքեր մեր անմիջական մրցակիցներն են երկրորդ տեղը զբաղեցնելու համար, իսկ վերջին տուրում կհյուրընկալենք գերմանացիներին։ Շանս կա՞․․․ իհարկե՛։ Շատ բան կախված է մեր հավաքականի տղաներից, մակեդոնացիներն այն մրցակիցները չեն, որոնց չի կարելի հաղթել, իսկ գերմանացիները․․․ իսկ այս դեպքում, հնարավոր է, որ Ֆլիկը գնա փորձարկումների, նոր ֆուտբոլիստներ, սխեմաներ փորձարկի, չէ՞ որ նրանց համար այդ հանդիպումը կրելու է, այսպես ասենք, «ընկերական խաղի» բնույթ։
Վերջին երկու տուրերում Իսլանդիայի հավաքականը ևս կարող է մեզ նվերներ մատուցել․ նախ նրանք կհանդիպեն ռումինացիների հետ, իսկ հետո՝ մակեդոնացիների։ Եվ այդ երկու հավաքականներից միավորներ խլելը բավականին մեծ դերակատարում կարող է ունենալ հենց Հայաստանի ընտրանու վերջնական դիրքի վրա։
Սա մեդալի մի կողմն է, իսկ հիմա շրջենք այդ մեդալը, և կտեսնենք, որ ամեն ինչ չէ, որ այդքան «պայծառ» է։ Եթե նայենք, խաղային օրացույցին, ապա հենց Ռումինիայի հավաքականի համար այն դասավորվում է իդեալական․ սեփական հարկի տակ հանդիպում Իսլանդիայի հետ և արտագնա հանդիպում Լիխտենշտեյնում։ Չես համեմատի մեր օրացույցի հետ, համաձա՞յն եք․․․ Բացի այդ, որակազրկման պատճառով մակեդոնացիների հետ խաղը բաց կթողնեն Հարոյանը, Սպերցյանը, Ադամյանն ու Ոսկանյանը։
Ամփոփելով այս ամենը, կարող ենք միայն ասել՝ պետք չէ հույսը դնել մեր մրցակցների միջև կայանալիք հանդիպումների ցանկալի արդյունքների վրա, այլ պետք է հույսը դնել միայն մեր առաջիկա խաղերում դրական արդյունք գրանցելու վրա։ Համենայն դեպս, առջևում ունենք երկու «եզրափակիչ», որոնցում պետք է ներդնել առավելագույն ուժերն ու կամային որակներ ցուցադրել․․․ հավատում ենք, սպասում ենք․․․
A խումբ
Երեկ Պորտուգալիայի հավաքականը սեփական հարկի տակ 5-0 հաշվով հաղթեց Լյուքսեմբուրգին: Կրիշտիանու Ռոնալդուն այս խաղում հեթ-տրիկի հեղինակ դարձավ: Այս հեթ-տրիկը 10-րդը դարձավ նրա համար ազգային հավաքականի կազմում, ինչը բացարձակ ռեկորդ է միջազգային մրցաշարերի պատմության մեջ: Նա թարմացրեց իր սեփական ռեկորդը, որը նա սահմանել էր 2019 թվականին: Այս ցուցանիշով պատմության մեջ երկրորդը Գերմանիայի հավաքականի լեգենդար հարձակվող Գերդ Մյուլերն է (8 հեթ-տրիկ):
Ռոնալդուից անցնենք խմբում տիրող իրավիճակին։ Այստեղ ամեն ինչ պարզ է՝ Սերբիան և Պորտուգալիան կպայքարեն առաջին տեղի համար, մյուսներն արդեն պայքարից դուրս են։ Պորտուգալիան այդ դիմակայությունում ունի առավելություն․ նրանք մեկ խաղ պակաս են անցկացրել և հաջորդ տուրում արդեն կարող են շրջանցել սերբերին, իսկ վերջին տուրում միմյանց կբախվեն հենց առաջատարները։ Այդ խաղը կլինի «տորթի վրայի բալն» այդ խմբում։
1․ Սերբիա — 17 միավոր
2․ Պորտուգալիա — 16
3․ Լյուքսեմբուրգ — 6
4․ Իռլանդիա — 5
5․ Ադրբեջան — 1
B խումբ
Այստեղ, ինչպես և նախորդ խմբում, ծավալվելու է համառ պայքար առաջին տեղի համար։ Եվս մեկ ընդհանրություն A խմբի հետ․ այս խմբում նույնպես երկու առաջատարները կհանդիպեն վերջին տուրում։
1․ Շվեդիա — 15 միավոր
2․ Իսպանիա — 13
3․ Հունաստան — 9
4․ Վրաստան — 4
5․ Կոսովո — 4
C խումբ
C խմբում ամեն ինչ հիշեցնում է նախորդ խմբերում առկա իրավիճակները, բայց այստեղ խմբի առաջատարը կարող է որոշվել ոչ թե վերջին, այլ հենց հաջորդ փուլում․ Հռոմում իտալացիները կընդունեն հարևան շվեյցարացիներին․․․
1․ Իտալիա — 14 միավոր
2․ Շվեյցարիա — 14
3․ Բուլղարիա — 8
4․ Հս․ Իռլանդիա — 5
5․ Լիտվա — 3
D խումբ
D խումբն ամենահետաքրքիրներից է թեժ մրցակցության առումով։ 5 հավաքականից 4-ը ռեալ հնարավորություն ունեն ԱԱ ուղեգիր նվաճելու։ Համեմատաբար ոչ հաճելի իրավիճակում է գտնվում Ուկրաինայի հավաքականը, որն իր անմիջական մրցակիցների համեմատ 1 խաղ ավել է անցկացրել և ունի միայն մեկ հանդիպում անցկացնելու, այն էլ՝ բոսնիացիների հետ։ Ֆիններին ևս երկու բարդ հանդիպում է սպասվում, իսկ ահա ֆրանսիացիների մրցակիցներից մեկն առաջիկա երկու խաղերում կլինի Ղազախստանի հավաքականը։ Այնպես որ, ըստ ամենայնի, ֆրանսիացիներն առաջին տեղով դուրս կգան խմբից, իսկ թեժ պայքարն արդեն կշարունակվի երկրորդ տեղի համար։
1․ Ֆրանսիա — 12 միավոր
2․ Ուկրաինա — 9
3․ Ֆինալանդիա — 8
4․ Բոսնիա և Հերցեգովինա — 7
5․ Ղազախստան — 3
E խումբ
Այս խմբում ակնհայտ ֆավորիտը Բելգիան է։ Եվ, թերևս, Լուկակուն ու ընկերները հենց առաջին տեղով էլ դուրս կգան խմբից։ Երկրորդ տեղի համար պայքարում ֆավորիտ է Ուելսը, քանի որ մեկ խաղ պակաս են անցկացրել, քան չեխերը։ Բրիտանացիները վերջին տուրում հանդիպում ունեն անցկացնելու Բելգիայի ընտրանու հետ, բայց մինչ այդ նրանք պետք է մտածեն Բելառուսի հետ խաղում երեք միավոր վաստակելու մասին։ Իսկ ահա չեխերին միայն մեկ հադիպում է մնացել անցկացնելու՝ Էստոնիայի հավաքականի հետ։
1․ Բելգիա — 16 միավոր
2․ Չեխիա — 11
3․ Ուելս — 11
4․ Էստոնիա — 4
5․ Բելառուս — 3
F խումբ
Կոպենհագենում Դանիան սեփական հարկի տակ 1-0 հաշվով հաղթեց Ավստրիային: Մեհլեի գոլի շնորհիվ Դանիան ժամանակից շուտ (2 տուր առաջ) դուրս եկավ Աշխարհի առաջնության եզրափակիչ փուլ՝ F խմբում գրավելով առաջին տեղը։ Սկանդինավյան թիմը վաստակել է մաքսիմալ՝ 24 միավոր 8 խաղում, իսկ խփած և բաց թողնված գոլերի տարբերությունը կազմում է 27-0: Շոտլանդիան՝ ամենամոտ հետապնդողը, ունի 17 միավոր իր ակտիվում: Իր հերթին, Ավստրիայի հավաքականը կորցրեց խմբից դուրս գալու բոլոր հնարավորությունները, իսկ շոտլանդացիների «կյանքը բարդացնել» կփորձեն Իսրայելի հավաքականի ֆուտբոլիստները, սակայն, անձամբ իմ կարծիքով, դա շատ բարդ խնդիր կլինի։
1․ Դանիա- 24 միավոր
2․ Շոտլանդիա — 17
3․ Իսրայել — 13
4․ Ավստրիա — 10
5․ Ֆարերյան կղզիներ — 4
6․ Մոլդովա — 1
G խումբ
Իսկ ահա այս խմբում թեժ վերջաբան է սպասվում։ Երեք թիմ պայքարում է առաջին տեղի համար, իսկ վերջին տուրում միմյանց կհանդիպեն Նիդեռլանդների և Նորվեգիայի ընտրանիները։ Կտեսնե՞նք Հոլանդին ԱԱ-ում․․․ ամեն ինչ պարզ կլինի միայն վերջին տուրից հետո։
Հետաքրքիր իրադարձություն գրանցվեց 8-րդ տուրում։ Նիդեռլանդների հավաքականը սեփական հարկի տակ 6-0 հաշվով հաղթեց Ջիբրալթարին: Նիդեռլանդների հավաքականում դուբլի հեղինակ դարձավ Մեմֆիս Դեպայը: «Բարսելոնայի» հարձակվողի համար դա 14-րդ գոլն էր ազգային հավաքականի կազմում 2021 թվականին: Այսպիսով, 27-ամյա հարձակվողը օրացուցային մեկ տարվա կտրվածքով նոր ռեկորդ սահմանեց ազգային հավաքականի կազմում: Նախկինում այս նվաճումը պատկանում էր Պատրիկ Կլյուվերտին, ով 2000 թվականին դարձել էր 12 գոլի հեղինակ:
1․ Նիդեռլանդներ- 19 միավոր
2․ Նորվեգիա — 17
3․ Թուրքիա — 15
4․ Մոնտենեգրո — 11
5․ Լատվիա — 5
6․ Ջիբրալթար — 0
H խումբ
H խմբում մնացել է միայ մեկ ինտրիգ՝ ո՞ր հավաքականը կզբաղեցնի առաջին տեղը։ Եվ չի բացառվում, որ այդ հարցի պատասխանը կստանանք հենց վերջին տուրում, որում կհանդիպեն Խորվաթիայի և Ռուսաստանի հավաքականները։ Երկու թիմերն էլ արդեն իսկ ապահովել են նվազագույնը երկրորդ տեղն այս խմբում՝ անհասանելի դառնալով Սլովակիայի և Սլովենիայի համար։
1․ Ռուսաստան — 19 միավոր
2․ Խորվաթիա — 17
3․ Սլովակիա — 10
4․ Սլովենիա — 10
5․ Մալթա — 5
6․ Կիպրոս — 5
I խումբ
I խմբում ևս սպասվում է թեժ վերջաբան։ Երեք հավաքական դեռ հնարավորություն ունի առաջին տեղը գրավելու, իսկ Հունգարիան շատ չնչին, բայց տեսականորեն շանսեր ունի զբաղեցնելու երկրորդ տեղը։ Սակայն, ամենայն հավանականությամբ, անգլիացիները կկարողանան ապահովել ուղեգիրը Քաթար, քանի որ առաջիկա երկու հանդիպումներից մեկը Սան Մարինոյի հետ է։ Իսկ ահա մյուս հանդիպումը Ալբանիայի հետ է, և հաղթանակի դեպքում բրիտանացիները կարող են հաճելի նվեր մատուցել լեհերին՝ հնարավորություն տալով նրանց այս խմբում զբաղեցնել երկրորդ տեղը։
1․ Անգլիա — 20 միավոր
2․ Լեհաստան — 17
3․ Ալբանիա- 15
4․ Հունգարիա — 11
5․ Անդորրա — 6
6․ Սան Մարինո — 0
Այս ընտրական փուլի գլխավոր ֆենոմենը, միանշանակ, դա Դանիայի հավաքականն է։ Այս թիմը միակն է, որը հաղթել է իր բոլոր հանդիպումները, նաև միակն է, որը բացարձակապես ոչ մի գոլ բաց չի թողել։ Իսկ խփած գոլերի քանակով (27) դանիացիները զիջում են միայն նիդեռլանդացիներին (29)։ Պարզապես ֆանտաստիկ ցուցանիշներ․․․
Ընտրական փուլի ռմբարկուների մրցավազքը գլխավորում է Նիդեռլանդների հավաքականի հարձակվող Մեմֆիս Դեպայը , ում հաջողվել է 9 անգամ տխրեցնել մրցակիցների դարպասպահներին։ Մեկ գոլ պակաս իր ակտիվում ունի Իսրայելի հավաքականի հարձակվող Էրան Զահավին, իսկ լավագույն եռյակը 7 գոլով եզրափակում է սերբ Ալեքսանդր Միտրովիչը։
Եվ վերջում հիշեցնենք, որ վերջին երկու տուրերը կկայանան նոյեմբերի 11-ից 15-ը։ Հուսով ենք, մեր հավաքականը ընտրական փուլը կավարտի լավ մեկնարկին համահունչ և նոյեմբերի 16-ին բարձր տրամադրությամբ կամփոփենք այս փուլի ավարտը։ Առողջ եղեք, մինչ հանդիպում․․.
Վար Բաբայան
