«Մեր թիմը Եվրոպական մրցասպարեզում մեծ հաջողություններ չունի: Ամենամեծ հաջողությունը եղել է Եվրոպա լիգայի 3-րդ փուլում «Բրյուգեին» պայքարից դուրս թողելը»,-ArmSport-ի հետ զրույցում նկատում է լեհական հեղինակավոր Kanał Sportowy Youtube-յան ալիքի թղթակից Ադամ Սլավինսկին:
Կոնֆերենցիաների լիգայի որակավորման 2-րդ փուլում Երևանի «Արարատը» կմրցի լեհական «Շլյոնսկի» հետ: Դիմակայության առաջին խաղը կկայանա այսօր՝ Գյումրիի քաղաքային մարզադաշտում:
Վրոցլավի թիմը հիմնադրվել է 1947 թվականին: Ակումբի առաջին անվանումը եղել է «Պիոներ», իսկ 1957 թվականից կրում է «Շլյոնսկ» անվանումը: Ակումբը պատմության մեջ երկու անգամ է նվաճել երկրի չեմպոնի տիտղոսը՝ 1977 եւ 2012 թվականներին: Թիմը երկուական անգամ դարձել է նաեւ Լեհաստանի գավաթակիր (1976 և 1987) եւ սուպերգավաթակիր (1987 և 2012) :
Թիմը տնային հանդիպումներ է անցկացնում «Քաղաքային» մարզադաշտում, որը տեղավորում է 45 105 հանդիսական: Այդ մարզադաշտը կառուցվել է 2012 թվականին՝ Եվրոպայի առաջնության հանդիպումների համար:
Ընդհանուր առմամբ, լեհական թիմի համար եվրագավաթների այս խաղարկությունը 14-րդն է պատմության մեջ: Թիմը 8 անգամ մասնակցել է Եվրոպական ակումբային ֆուտբոլի նշանակությամբ երկրորդ մրցաշարի որակավորման փուլերին (4-ական անգամ ՈւԵՖԱ-ի գավաթ և Եվրոպա լիգա): Մեկական անգամ մասնակցել է Չեմպիոնների գավաթի 1977/1978 և Չեմպիոնների լիգայի 2012/13 մրցաշարերին: Խաղացել է նաեւ գավաթակիրների գավաթի, ինչպես նաեւ Ինտերտոտոյի գավաթի որակավորման փուլերում:
Եվրագավաթներում լավագույն արդյունքը Վրոցլավը ներկայացնող թիմը ցույց է տվել 2011-2014 թվականներին, հասնելով Եվրոպա լիգայի փլեյ-օֆֆ:
Լեհաստանի նախորդ առաջնությունում թիմը գրավել է 4-րդ տեղը՝ վաստակելով 43 միավոր, ու 9 միավորով զիջել է 3-րդ տեղը գրաված «Պագոնին»:
Լեհ լրագրող Ադամ Սլավինսկին, խոսելով թիմի՝ նախորդ մրցաշրջանում ելույթների մասին, նշում է.
«Շլյոնսկը նախորդ մրցաշրջանում սպասվածից լավ հանդես եկավ: Մրցաշրջանը լավ սկսեցին, բայց դրանից հետո որոշ խնդիրներ ունեցան, ու թիմը գլխավորեց Յացեկ Մագերան, որից հետո թիմը քայլ առաջ կատարեց: Մագերան երիտասարդ մարզիչ է, ով սիրում է տեղ տալ երիտասարդ ֆուտբոլիստներին: Նա եղել է մինչեւ 20 տարեկանների հավաքակաների մարզչական շտաբում»։
Սպորտային մեկնաբանի խոսքով երիտասարդ մարզիչն ամբողջությամբ փոխել է թիմի խաղային փիլիսոփայությունը, սակայն դա ամենևին էլ չի նշանակում, որ նրանց համար հեշտ է լինելու խաղալ «Արարատի» հետ:
«Մագերայի գլխավորությամբ թիմը սկսեց ավելի կարգավորված ֆուտբոլ խաղալ: Ամենակարևորն այն է, որ թիմի կազմը պահեցին ու միայն ուժեղացրեցին այդ դիրքերը, որտեղ թերանում էին: Բայց իմ կարծիքով, սա այն կազմն է, որը կարող է խնդիրներ ունենալ «Արարատի» հետ խաղում՝ հատկապես եթե հաշվի առնենք Հայաստանի կլիման ու եղանակը: Բացի այդ, ուղևորությունը երկար է: Լեհական ակումբները չեն սիրում այդ տարածաշրջանի թիմերի հետ խաղալ հենց այդ պատճառներով»,-նշում է մեր լեհ գործընկերն ու հավելում,-«Մեր թիմը հարձակվողական ֆուտբոլ է խաղում: Կարծում եմ՝ եթե «Արարատը» խորքային պաշտպանությամբ խաղա, մեր թիմը լուրջ խնդիրներ կունենա»:
Ադամ Սլավինսկին պակաս տեղեկացված չէ նաև հայկական ֆուտբոլից.
«Հայկական ֆուտբոլը շարունակում է զարգանալ: Ազգային հավաքականը վտանգավոր է ու կարող է խնդիրներ ստեղծել յուրաքանչյուր հավաքականի համար:
Երբ տեղի ունեցավ կոնֆերենցիաների լիգայի որակավորման փուլի վիճակահանությունը, առաջին հայացքից կարծեցի, որ մեր մրցակիցը «Արարատ-Արմենիան» է, քանի որ հիշում էի, որ մի քանի տարի առաջ «Արարատը» Հայաստանի առաջնությունում վերջին տեղերն էր զբաղեցնում, բայց զարմացա՝ տեսնելով, որ մեր մրցակիցն իսկապես «Արարատ Երևանն» է լինելու: «Ֆեհերվարի» հետ խաղը չեմ դիտել, բայց զարմացել եմ արդյունքից: Կարծում եմ՝ դա մեծ հաջողություն է ձեզ համար: «Արարատը» հատկապես վտանգավոր է տանը և ձեր մարզադաշտում խաղալը շրջադարձային կարող է լինել «Շլյոնսկի» համար»,-եզրափակեց Սլավինսկին:
