Հուլիսի 2-ին մի շարք երկրներում նշվում է աշխարհի ամենահետաքրքիր ու էմոցիոնալ մասնագիտություններից մեկի՝ մարզական լրագրության ու մարզական լրագրողի օրը:
«Լրագրողների աշխատանքը մոլորակի ամենաչգնահատված մասնագիտություններից մեկն է, նույնը նաև սպորտային լրագրողներինն է: Եվ այդ ամենը կրկնակի է բարդանում, երբ դու աղջիկ ես». «Արմենպրեսի» մարզական լրագրող Վարվառա Հայրապետյանի հետ խոսել ենք մարզական լրագրության առանձնահատկությունների ու դժվարությունների մասին.
— Ի՞նչ է քեզ տվել մարզական լրագրությունը ու ինչո՞ւ դառնալ մարզական լրագրող:
-Սպորտային լրագրությունն այն բացառիկ մասնագիտություններից է, որն իր մեջ ներառում է երկու երևույթ՝ լինել սպորտի սիրահար և կարողություն ունենալ հասարակությանը ներկայացնել այդ ամենը: Մասնագիտության ընտրության հարցում երկար չեմ մտածել, քանի որ երբ ընդունվում էի ինստիտուտ, Հայաստանում նոր-նոր էր տարածվում մեր մասնագիտությունը և Ֆիզիկական կուլտուրայի հայկական պետական ինստիտուտում նոր էին բացել մարզական լրագրության ամբիոնը:
Մեր մասնագիտությունը ժամանակի հետ մեզ սովորեցրեց, որ կարևոր չէ, թե որքան ուժեղ են մկաններդ, կարևոր է` որքան ուժեղ ես մտքով:
— Աշխատանքային կարիերայիդ ամենահիշարժան դրվագը, իրադարձությունը և ինչո՞ւ:
-Անխոս ինձ համար ամենահիշարժանն Օլիմպիական խաղերը լուսաբանելու հնարավորությունն էր, որն ունեցա Ռիո դե Ժանեյրոյի խաղերի ժամանակ: Հենց այդտեղ է, որ հասկանում ես, թե որքան մեծ դեր ունեն մարզիկերը երկրների ճանաչման գործում:
— Մարզական լրագրողի աշխատանքի դժվարությունները, որոնք հատուկ են միայն այս մասնագիտությանը:
-Լրագրողների աշխատանքը մոլորակի ամենաչգնահատված մասնագիտություններից մեկն է, նույնը նաև սպորտային լրագրողներինն է: Եվ այդ ամենը կրկնակի է բարդանում, երբ դու աղջիկ ես՝ մենթալիտետի և աշխարհընկալման խնդիրներից սկսած, վերջացրած մարզիկների հետ խոսելու ճիշտ մոտեցմամբ: Հեշտ չէ, բայց մարզիկները պիտի ընդունեն, որ նրանց աշխատանքի գնահատականը հասարակությանը հասնում է հենց մեր միջոցով:
— Ի՞նչ կմաղթես գործընկերներիդ ու ի՞նչ խորհուրդ կտաս նրանց, ովքեր նոր են սկսում այս ճանապարհը:
-Շնորհավորում եմ բոլորիս` մասնագիտական տոնի առթիվ: Գուցե սա աշխարհի լավագույն մասնագիտություններից մեկն է, պետք է անենք այնպես, որ մեր գործով նպաստենք մարզիկների ձեռքբերումներին, սակայն չմոռանանք անարդարության մասին բարձրաձայնել:
Նարե Հովհաննիսյան
