«Արարատ-Արմենիայի» գլխավոր մարզիչ Վարդան Մինասյանի խոսքով, VBet Հայաստանի Գավաթի կիսաեզրափակիչ պատասխան խաղում «Գանձասար-Կապանի» նկատմամբ տարած հաղթանակն իրենց դժվարությամբ չտրվեց:
Թիմը 2 անպատասխան գնդակ ուղարկեց կապանյան թիմի դարպասն ու իր պատմության մեջ առաջին անգամ դուրս եկավ Գավաթի խաղարկության եզրափակիչ (առաջին խաղում «Արարատ-Արմենիան» հաղթել էր 1-0 հաշվով).
«Չէի ասի, թե շատ դժվար խաղ ստացվեց. մեր խնդիրն այսօր ամենից շատ հաղթանակ տանելն էր: Չնայած առաջին խաղում արդեն 1-0 հաշվով հաղթել էինք, բայց տրամադրվել էինք, որ այս խաղում էլ պետք է հաղթենք, որովհետև վաղուց չէինք հաղթել ու հոգեբանորեն այս հաղթանակը մեզ պետք էր:
Արդյոք «Գանձասար-Կապանը» զարմացրե՞ց. նույնն էի սպասում, բայց երևի՝ արագ գոլն էլ հանգստացրեց խաղը: Համենայն դեպս, մեծ լարվածություն չկար»,- խաղից հետո նշել է Մինասյանը՝ պատասխանելով լրագրողների հարցերին:
Վարդան Մինասյանն ընդգծում է՝ յուրաքանչյուր մրցաշարում իրենք առավելագույն խնդիրներն են դնում թիմի առջև.
«Մենք ցանկացած մրցաշարի՝ կլինի Գավաթ, Սուպերգավաթ, առաջնություն, միշտ առավելագույն խնդիրներ ենք դնում թիմի առջև: Լավ է, որ առաջին անգամ դուրս եկանք եզրափակիչ, բայց Գավաթի խաղում ֆավորիտներ չկա: Բոլորը հավասար են»,- ասում է «Արարատ-Արմենիայի» գլխավոր մարզիչն ու պարզաբանում, թե վերջին շրջանում թիմում առկա որոշակի խնդիրներն ինչով են պայմանավորված.
«Կարանտինային դադարից հետո երկու կարևոր գործոն կար՝ ֆունկցիոնալ վիճակ և հոգեբանություն: Ֆունկցիոնալ առումով մեզ մոտ ամեն ինչ կարգին է, բայց հոգեբանության տեսանկյունից որոշ խնդիրներ կան: Հուսով եմ՝ այսօրվա հաղթանակը կնպաստի, որ այդ խնդիրը շտկվի: Մոտիվացիայի հետ կապված խնդիր չկա, ինչ-որ տեղ լարվածություն կա. մեզ հանգստություն է պետք»,- եզրափակել է իր խոսքը Վարդան Մինասյանը:
Հիշեցնենք՝ VBet Հայաստանի Գավաթի խաղարկության եզրափակչում Վարդան Մինասյանի թիմը կխաղա «Նոայի» հետ: Ինչ վերաբերում է Հայաստանի Բարձրագույն խմբի առաջնությանն, ապա «Արարատ-Արմենիան» առաջնության ավարտից 4 տուր առաջ իր ակտիվում 45 միավոր ունի և գլխավորում է մրցաշարային աղյուսակը՝ 3 միավորով գերազանցելով երկրորդ տեղում ընթացող «Շիրակին»:
