Vbet Հայաստանի Գավաթի 1/8 եզրափակչի հանդիպումները ըստ խաղացանկի՝ կկայանան երեք օր. նոյեմբերի 1-ին, 2-ին և 3-ին: Խաղային առաջին օրը նախատեսված էր երկու հանդիպում, իսկ մյուս օրերին՝ երեքական հանդիպում:
Հիշեցնենք, որ համաձայն նոր ձևաչափի՝ 1/8 եզրափակչի խաղերը ևս կկայանան մեկ անգամ, այսինքն՝ թիմերը քառորդ եզրափակչի ուղեգիրը չեն խաղարկի տնային ու արտագնա խաղերով:
Առաջարկում ենք ծանոթանալ սպասվող հանդիպումների տեղերին, ժամերին, մրցող թիմերի անցած ուղիներին ու այլ փաստերի:
«Դիլիջան»-«Լոռի»
01.11.2019թ., ժ.14:30, Դիլիջան, UWC միջազգային դպրոց
Առաջին խմբի նորեկ, նորաստեղծ «Դիլիջանը» Գավաթի նախնական փուլում պետք է հանդիպեր «Մակարավանքին», որը, սակայն, այդպես էլ չմասնակցեց մրցաշարին (նաև Առաջին խմբի առաջնությանը) ու «Դիլիջանը» ավտոմատ կերպով հայտնվեց 1/8 եզրափակչում:
Առաջին խմբի ընթացիկ առաջնությունում «Դիլիջանի» վիճակը նախանձելի չէ. թիմը 13-րդ տուրից հետո ընդամենը 3 միավոր է վաստակել և Բարձրագույն խմբի 5-րդ տեղում ընթացող «Լոռիի» հետ խաղը լուրջ մարտահրավեր էր լինելու նրա համար: Սակայն․․․սակայն երեկ պարզ դարձավ, որ դիլիջանյան ակումբը հրաժարվել է մասնակցել Գավաթի 1/8 եզրափակչին, ինչը նշանակում է, որ այս անգամ էլ «Լոռին» ավտոմատ կերպով հայտնվեց մյուս փուլում։
«Գանձասար-Կապան»-«Շիրակ»
01.11.2019թ., ժ.15:00, Երևան, Ֆուտբոլի ակադեմիա
Գավաթային հաջորդ զույգը ներկայացնում է Բարձրագույն խմբի առաջնությունը: Երկու թիմն էլ պայքարը սկսում է միանգամից 1/8 եզրափակչից:
Հայաստանի Բարձրագույն խմբի ընթացիկ առաջնությունում այս թիմերը հանդիպել են դեռևս մեկ անգամ՝ չկարողանալով գրավել միմյանց դարպասները: Չնայած այս փաստին՝ Մրցաշարային աղյուսակում թիմերը համապատասխանաբար զբաղեցնում են 10-րդ ու 2-րդ տեղերը («Շիրակն» ու առաջատար «Արարատը» հավասար միավորներ ունեն):
«Լոկոմոտիվ»-«Վան»
02.11.2019թ., ժ.14:30, Երևան, ՄԶՀՀԿ մարզադաշտ (նախկին «Միկա» մ/դ)
Հետաքրքիր պայքար է սպասվում Երևանն ու Չարենցավանը ներկայացնող այս թիմերի խաղում: Առաջին խմբի ընթացիկ առաջնությունում նրանք կիսում են առաջին տեղն ու սպասվում է, որ այդ պայքարը կտեղափոխեն նաև այս մրցաշար:
Հիշեցնենք, որ նորաստեղծ «Վանը» նախնական փուլում ջախջախիչ 6-0 հաշվով հաղթանակ է տարել «Արագածի» նկատմամբ ու 1/8-ի ուղեգիր նվաճել, իսկ «Լոկոմոտիվը» պայքարը սկսում է միանգամից այս փուլից:
Ի դեպ, այս խաղի տոմսերը սպառված են։ Մարզադաշտը լեփ-լեցուն է լինելու։
«Սևան»-«Երևան»
02.11.2019թ., ժ.14:30, Ձորաղբյուրի մարզահամալիր
Առաջին խմբի առաջնության նախորդ մրցաշրջանի չեմպիոնն ու Բարձրագույն խմբի ուղեգիր նվաճած «Երևանը» գավաթային պայքարը սկսում են հենց այս փուլից:
Ի տարբերություն «Սևանի», որն Առաջին խմբի ընթացիկ առաջնությունում ևս մրցանակային տեղերի ակտիվ պայքար է մղում, «Երևանը» ԲԽ առաջնության 12 տուրերի արդյունքում միավոր չի վաստակել ու եզրափակում է մրցաշարային աղյուսակը: Միգուցե հենց այս մրցաշարում «Երևանին» հաջողվի տանել իր առաջին հաղթանակը:
«Փյունիկ»-«Ուրարտու»
02.11.2019թ., ժ.16:00, Երևան, «Հանրապետական» մարզադաշտ
Բարձրագույն խմբի առաջնության 7-րդ և 8-րդ տեղերում հանգրվանած «Փյունիկն» ու «Ուրարտուն» ընթացիկ առաջնությունում հանդիպել են երկու անգամ. արդյունքում երկու թիմն էլ երեքական միավոր է վաստակել:
Այս խաղը լավ հնարավորություն է պարզելու ուժեղագույնին:
«Վեստ Արմենիա»-«Արարատ-Արմենիա»
03.11.2019թ., ժ.14:30, Ձորաղբյուրի մարզահամալիր
«Վեստ Արմենիան» Գավաթի 1/8 եզրափակչում հայտնվեց «Անիի» հետ խաղում տարած 7-1 հաշվով հաղթանակից հետո, իսկ «Արարատ-Արմենիան», իհարկե, պայքարը սկսում է հենց այս փուլից:
Առաջին խմբի ընթացիկ առաջնությունում «Վեստ Արմենիան» պայքարում է չեմպիոնության համար՝ առաջին տեղը կիսելով «Վանի» ու «Լոկոմոտիվի» հետ: Իսկ «Արարատ-Արմենիան» Հայաստանի Բարձրագույն խմբի առաջնության գործող չեմպիոնն է, ընթացիկ մրցաշրջանում էլ տեղ է զբաղեցրել 3-րդ հորիզոնականում՝ ընդամենը 3 միավորով հետ մնալով առաջատարներից:
Երկու «Արմենիաների» միջև գավաթային խաղը հետաքրքիր պայքար է խոստանում:
«Տորպեդո»-«Ալաշկերտ»
03.11.2019թ., ժ.15:00, Աբովյանի քաղաքային մարզադաշտ
«Տորպեդոն» 1/8 եզրափակչի ուղեգիր նվաճել է՝ նախնական փուլում 3 անպատասխան գնդակ ուղարկելով «Մասիսի» դարպասը: «Ալաշկերտը» նախորդ տարվա գավաթակիրն է:
«Տորպեդոն» Առաջին խմբի մրցաշարային աղյուսակում առայժմ 8-րդ տեղում է: «Ալաշկերտը» ԲԽ-ի մրցաշարային աղյուսակում 4-րդն է, բայց հավասար միավորներ ունի 3-րդ տեղում գտնվող «Արարատ-Արմենիայի» հետ:
Այս մրցաշարն առհասարակ հետաքրքիր է հենց նրանով, որ կարող ենք պայքարի մեջ տեսնել Առաջին ու Բարձրագույն խմբի թիմերին:
«Նոա»-«Արարատ»
03.11.2019թ., ժ.16:00, Երևան, «Նաիրի» մարզադաշտ
Երկու թիմն էլ մրցաշարը սկսում են 1/8 եզրափակչից: Սա պայքար է Բարձրագույն խմբի առաջնության 6-րդ տեղի ու մրցաշարային աղյուսակի առաջատարի միջև:
Գավաթային խաղ լինելուց բացի, սա, վստահաբար, սկզբունքային խաղ է նաև այս առումով: Կարելի է սպասել հետաքրքիր զարգացումների:
Գավաթի անցկացման ձևաչափի փոփոխությունից հետո, երբ, ինչպես արդեն նշեցինք, թիմերը հաղթողին պարզելու են 1 խաղով, դժվար է քննարկել ֆավորիտների: Եթե նախկինում կարելի էր հույս դնել պատասխան խաղում սխալներն ուղղելու վրա, ապա այժմ ամեն ինչ վճռվելու է մեկ ճակատամարտով: Գավաթն ամենակարճ ճանապարհն է դեպի Եվրոպա Լիգա: Սա նշանակում է, որ հատկապես Բարձրագույն խմբի թիմերը մեծ ջանքեր են գործադրելու, որպեսզի հնարավորինս երկար առաջ գնան այս մրցաշարում:
Ստելլա Բաբլոյան
