Ֆրանսիայի ազգային հավաքականի ավագ Կիլիան Մբապեն ինքնատիպ ձևաչափով է ամփոփել 2026 թվականի աշխարհի առաջնությունը։
Մադրիդի «Ռեալի» հարձակվողը ֆրանսիական մի շարք առաջատար պարբերականներում, այդ թվում՝ հեղինակավոր L’Equipe-ում, գովազդային էջեր է գնել՝ հայրենակիցներին բաց նամակով դիմելու համար։
Մբապեն իր ուղերձում, մասնավորապես, նշել է․
«Դուք երբեք երես չթեքեցիք մեզնից՝ նույնիսկ ամենաբարդ պահերին ու անգամ այն ժամանակ, երբ մենք ամենաքիչն էինք դրան արժանի։ Այս պատմությունը կերտվել է միլիոնավոր ձեռքերով, և ոչ միայն խաղադաշտ դուրս եկած 11 ֆուտբոլիստներով։ Մեզ բոլորիս առաջ էր մղում միևնույն կիրքը։
Ֆրանսիան անհավանական ճանապարհ անցավ, սակայն գլխավոր գավաթի բացակայությունը ցավոտ է, և այդ ցավը դեռ որոշ ժամանակ կուղեկցի մեզ։ Ես հպարտությամբ եմ ընդունում մրցաշարի լավագույն ռմբարկուի կոչումը, բայց, միանշանակ, շատ ավելի լավ կլիներ, եթե մենք նվաճած լինեինք տիտղոսը։ Մենք դաշտում թողեցինք մեր ողջ ուժերը և հպարտ ենք դրանով»։
Հարձակվողը շնորհակալություն է հայտնել նաև անտեսանելի հերոսներին և ակնարկել գլխավոր մարզչի հետ ունեցած խոսակցության մասին․
«Շնորհակալ եմ թիմակիցներիս, երկրպագուներին և բոլոր նրանց, ում աշխատանքը ստվերում է մնում, բայց առանց որի այս ամենն անհնար կլիներ։ Ես արդեն ասել եմ Դիդիե Դեշամին այն ամենը, ինչ պետք է ասեի, նա դա գիտի։
Ֆուտբոլն իր էությամբ պարզապես խաղ է։ Խաղ, որին մենք անչափ լուրջ ենք վերաբերվում, որին կատարելապես տիրապետելու համար նվիրում ենք մեր ողջ կյանքը։ Բայց և այնպես, դա խաղ է՝ պարզ կանոններով, որոնք չեն փոխվել մեր առաջին քայլերից ի վեր․ կա գնդակ, կա դարպաս, և կա գոլ խփելու մեծ ցանկություն»,- եզրափակել է Մբապեն։
Հիշեցնենք, որ ԱԱ-2026-ում Դիդիե Դեշամի գլխավորած հավաքականը գրավեց 4-րդ տեղը՝ բրոնզե մեդալների համար գերգոլառատ պայքարում 4:6 հաշվով զիջելով Անգլիային։
