Մադրիդի «Ռեալի» դարպասապահ Տիբո Կուրտուան խոսել է իսպանական գրանդում իր ապագայի և պայմանագրի հնարավոր երկարաձգման մասին։
Մայիսի 11-ին բելգիացի դարպասապահը դարձավ 34 տարեկան։ Նրա գործող համաձայնագիրը «արքայական» ակումբի հետ նախատեսված է մինչև 2027 թվականի հունիսի 30-ը։
«Իմ ապագա՞ն։ Երբ դառնում ես 30 տարեկան, «Ռեալում» պայմանագրերը երկարաձգում են միայն մեկ տարով։ Այնպես որ, ես միանգամայն հանգիստ եմ այս հարցում։ Եթե շարունակեմ հանդես գալ այնպես, ինչպես նախկինում, երկարաձգումը խնդիր չի դառնա։ Բայց «Ռեալն» էլիտար մակարդակի ակումբ է, և ինչ-որ պահի նրանք ստիպված կլինեն մտածել ինձ փոխարինող գտնելու մասին»,- Կուրտուայի խոսքերն է մեջբերում հայտնի ինսայդեր Ֆաբրիցիո Ռոմանոն։
Նշենք, որ ավարտված 2025/26 մրցաշրջանում Կուրտուան մադրիդցիների կազմում մասնակցել է 45 հանդիպման՝ բաց թողնելով 43 գնդակ։ 17 խաղում բելգիացին իր դարպասը պահել է անառիկ։ Transfermarkt հեղինակավոր պորտալը դարպասապահի տրանսֆերային արժեքը գնահատում է 15 միլիոն եվրո։
