«Կրասնոդարի» նախկին կիսապաշտպան Յուրի Գազինսկին խոսել է ակումբի ավագ և Հայաստանի ազգային հավաքականի առաջատար Էդուարդ Սպերցյանի մրցելույթների, ինչպես նաև նրա՝ եվրոպական ակումբ տեղափոխվելու հավանականության մասին։
Նախկին ֆուտբոլիստի կարծիքով՝ 25-ամյա հայ կիսապաշտպանն արժանի է Ռուսաստանի Պրեմիեր լիգայի ընթացիկ խաղարկության լավագույն խաղացողի կոչմանը։
«Էդիկն աճել է որպես ֆուտբոլիստ, և կարծում եմ, որ նա իզուր չէր նախկինում ևս ճանաչվել լավագույնը։ Արդեն երկրորդ կամ երրորդ մրցաշրջանն է, ինչ նա կայուն լավ խաղ է ցուցադրում և աչքի ընկնում արդյունավետ գործողություններով։ Ցանկացած ակումբ ուզում է պահպանել իր առաջատարներին, հատկապես հաշվի առնելով, որ Սպերցյանն ակումբի սան է։ Բայց եթե ինչ-որ լուծում գտնվի, և ինքը՝ ֆուտբոլիստը, ցանկանա գնալ մակարդակի բարձրացման ու պայմանավորվել ակումբի հետ, ապա ինչո՞ւ ոչ։ Ինձ թվում է, որ նա պետք է տեղափոխվի Եվրոպա», — Գազինսկիի խոսքերն է մեջբերում Metaratings-ը։
Նշենք, որ ընթացիկ մրցաշրջանում Սպերցյանը կրկնել է Ռուսաստանի Պրեմիեր լիգայի ռեկորդը գոլային փոխանցումների քանակով՝ կատարելով 16 ասիստ, որոնց գումարել է նաև 12 գոլ Ռուսաստանի առաջնության շրջանակում: Ընդհանուր առմամբ, բոլոր մրցաշարերում «ցուլերի» ավագը մասնակցել է 40 հանդիպման՝ դառնալով 13 գոլի և 18 արդյունավետ փոխանցման հեղինակ։
