Մադրիդի «Ռեալի» նախագահ Ֆլորենտինո Պերեսը մամուլի ասուլիսի ժամանակ հեռախոսով կարդացել է իր մասին տարածված ֆեյք լուրերն ու խիստ քննադատության ենթարկել իսպանական մամուլին։
Այսօր իսպանական ABC թերթում տեղեկություն էր հայտնվել, թե իբր Պերեսը տնօրենների խորհրդի նիստից առաջ իր մտերիմներին ասել է, որ «շատ հոգնած է»։
«ABC թերթն ինձ շատ է սիրում. «Նիստից առաջ Ֆլորենտինոն ասել է՝ ես շատ հոգնած եմ»,- մեջբերել է Պերեսը հրապարակումն ու շարունակել. «Բայց դուք կարծում եք, որ ես աշխատանքից առաջ նման բան կասե՞մ։ Դավի՛դ Սանչես դե Կաստրո, դու այստե՞ղ ես։ Ուզում էի բարևել և իմանալ, թե ինչու ես դա հրապարակել։ Ես արթնանում եմ վաղ առավոտյան և քնում եմ բոլորից ուշ, ես աշխատում եմ եզան պես»։
Այնուհետև Մադրիդի «Ռեալի» նախագահն անդրադարձել է լրատվամիջոցների ֆինանսավորմանն ու նպատակներին.
«ABC-ն պատկանում է Vocento-ին: Նրանք ստեղծեցին Relevo-ն, գիտեք, թե դա ինչ է, այնպես չէ՞: Լա Լիգայի հետ համաձայնությամբ նրանք ստեղծեցին թվային պարբերական, որն իր գոյության ընթացքում 25 միլիոն եվրո է կորցրել։ Եվ երբ Լա Լիգան դադարեց վճարել, նրանք դիմեցին Telefónica-ին և Telecinco-ին՝ պարզելու, թե արդյոք վերջիններս պատրաստ են հովանավոր դառնալ: Նրանց միակ նպատակը Մադրիդի «Ռեալի» և նրա նախագահի վրա հարձակվելն էր։
Ինձ համար ցավալի է, քանի որ հայրս կարդում էր ABC և տարիներ առաջ ինձ համար բաժանորդագրություն էր ձևակերպել։ Բայց հիմա ես որոշել եմ չեղարկել իմ բաժանորդագրությունն այս թերթին՝ ի հարգանք հորս, նա դա կգնահատեր: Ինչպե՞ս կարող է ABC-ն նման բան անել: Այսպիսով, պաշտոնապես հայտարարում եմ, որ հրաժարվում եմ իմ բաժանորդագրությունից: Այդպես ես ավելի շատ կհարգեմ հորս հիշատակը»,- ասել է Պերեսը:
