Ադրբեջանը և Ուզբեկստանը կհյուրընկալեն ֆուտբոլի մինչև 20 տարեկանների աշխարհի առաջնությունը 2027 թվականին, հայտնում է Ֆուտբոլի միջազգային ֆեդերացիայի (ՖԻՖԱ) պաշտոնական կայքը։
Այս որոշումն ընդունվել է ՖԻՖԱ-ի խորհրդի նիստում, որը տեղի է ունեցել այսօր՝ հոկտեմբերի 2-ին, Շվեյցարիայի Ցյուրիխ քաղաքում։ Ներկայումս Չիլիում ընթանում է ֆուտբոլի երիտասարդական աշխարհի առաջնությունը, որը մեկնարկել է սեպտեմբերի 27-ին, իսկ եզրափակիչը նախատեսված է հոկտեմբերի 19-ին։
«Վերջին տարիներին մեր երկիրը մեծ փորձ է կուտակել խոշոր միջազգային մրցաշարեր կազմակերպելու գործում։ 2027 թվականին աշխարհի ամենատաղանդավոր երիտասարդ ֆուտբոլիստները կհավաքվեն Ուզբեկստանում և Ադրբեջանում՝ մասնակցելու մինչև 20 տարեկանների աշխարհի առաջնությանը։ Մեր երկիրը, ինչպես միշտ, պատրաստ է գրավել աշխարհը իր հյուրընկալությամբ, պրոֆեսիոնալիզմով, ֆուտբոլի նկատմամբ նվիրվածությամբ և երկրպագուների սիրով»,- նշված է Ուզբեկստանի ֆուտբոլի ասոցիացիայի հայտարարությունում։
