Ուղիղ մեկ տարի առաջ՝ 2024 թվականի մարտի 19-ին, կյանքից հեռացավ սպորտային մեկնաբան Վասիլի Ուտկինը։ Նա ընդամենը 52 տարեկան էր:
Վասիլի Ուտկինն աշխատել է «НТВ» և «НТВ-Плюс» հեռուստաընկերություններում։ 2010-2015 թթ. եղել է «НТВ-Плюс»-ի սպորտային ալիքների գլխավոր խմբագիրը։ 2015 թ. նոյեմբերի 1-ից 2016 թ. փետրվար 5-ն աշխատել է «Матч ТВ» հեռուստաընկերությունում։ Նա նաև ա հիմնադրել էր «Էգրիսի» սիրողական ֆուտբոլային ակումբը:
Ուտկինը, միանշանակ, դարձել է ռուսական հեռուստատեսության խորհրդանիշներից մեկը 90-ականների և 2000-ականների սկզբին: Պայծառ, արտասովոր, հետաքրքիր կերպարով՝ նա փոխել է ֆուտբոլային մեկնաբանության ոճն ու լեզուն։
«Մեր ամբողջ կյանքը խաղ է». Անկասկած, «Լենինգրադ» երգի առաջին տողերը ֆուտբոլասերների շրջանում առանձնահատուկ հիշողություններ է արթնացնում՝ ասոցացվելով հենց Ուտկինի հետ:
Հայտնի էր, որ Ուտկինը տառապում էր սրտանոթային լուրջ հիվանդությամբ, իսկ 2023 թվականի հոկտեմբերին նրա մոտ աթերոսկլերոզ էր ախտորոշվել։ Այդ ժամանակ մեկնաբանի քաշը գերազանցում էր 200 կիլոգրամը. ավելորդ քաշի պատճառով սրվել էին սրտանոթային խնդիրները։
Ուտկինի մահը վրա էր հասել անոթներում արյան շրջանառության կանգի պատճառով։ Բժիշկները մեկնաբանին վերակենդանացրել են 16 րոպե և կարողացել են վերականգնել արյան հոսքը, սակայն կանգը կրկնվել էր, ինչից հետո արձանագրվել էր մահը։
