«Լոկոմոտիվի» և Հայաստանի հավաքականի ֆուտբոլիստ Նայր Թիկնիզյանը Metaratings.ru-ի հետ զրույցում գնահատել է ազգային թիմի ելույթն Ազգերի լիգայում։
– Ինչպե՞ս կգնահատեք Հայաստանի հավաքականի ելույթն Ազգերի լիգայում:
– Հաշվի առնելով, թե ինչպես էր փոխվում մեր մրցաշարային դիրքը երկու ամսվա ընթացքում, կարելի է ասել՝ վատ չէր։ Մենք արժանի արդյունքի հասանք։ Առջևում մեզ սպասում են փլեյ-օֆֆի հանդիպումները, կպատրաստվենք դրանց։
– Ի՞նչ էր կատարվում Հայաստանի հավաքականի հանդերձարանում Ֆարերյան կղզիներից պարտվելուց հետո:
– Հիասթափություն։ Բոլորը շատ վշտացած էին արդյունքից։ Սակայն թիմը պայքարում է յուրաքանչյուր խաղում և տալիս է իր առավելագույնը, ինչը շատ կարևոր է։ Պարզ է, որ գլխավոր նպատակը արդյունքն է։ Ուզում եմ շնորհակալություն հայտնել մեր երկրպագուներին, որոնք մշտապես «լցնում են» մարզադաշտը։ Երկրորդ տեղն արդյունք է այն բանի, որ մենք միավորվեցինք ամենադժվար պահին և տվեցինք մեր լավագույնը։ Մենք ճիշտ ճանապարհի վրա ենք։
– Ինչո՞ւ է հավաքականն անկայուն խաղ ցուցադրում:
– Ավելի կայուն ու լավ խաղ ցուցադրելու համար մեզ կառուցված համակարգ է հարկավոր։ Պետք է լինեն պահանջներ և այդ պահանջները կատարողներ։ Վստահ եմ, որ ընտրական խաղերում մենք կհասնենք դրան՝ նոր, մշտական մարզչական շտաբի գլխավորությամբ։ Դրանից հետո մեր արդյունքները, տա Աստված, կբարելավվեն։
Դեռ հստակություն չկա մարզչական շտաբի վերաբերյալ։ Անչափ դժվար է խաղից երկու օր առաջ վերակառուցվել։ Ես հիմա խոսում եմ նոյեմբերյան հավաքի մասին։ Անհրաժեշտ է ձեռք բերել կայունություն մարզչի, համակարգի և պահանջների առումով։
– Ֆարերյան կղզիների շատ ֆուտբոլիստներ պրոֆեսիոնալներ չեն։ Ինչո՞ւ չկարողացաք նրանց գոլ խփել տնային խաղում:
– Կարող եք բացել այդ խաղի վիճակագրությունը և տեսնել։ Մեզ չհաջողվեց, քանի որ իրացման առումով խնդիրներ ունեինք։ Չնայած բոլոր խոսակցություններին, թե բոլորը պարտավոր են հաղթել նրանց, կարող եք նայել նրանց արդյունքներին։ Մի քանի տարի առաջ նրանք հաղթել էին Թուրքիային և չէին պարտվել Հյուսիսային Մակեդոնիային։ Նրանք մեզ ոչնչով չզարմացրին։ Ավելի շուտ, մենք պետք է առաջին 20 րոպեները խաղայինք այնպես, ինչպես խաղացինք հանդիպման վերջում։ Պարզապես իրացումը մեզ անհաջողության մատնեց։
