Կրիշտիանու Ռոնալդուն օրերս 213-րդ հանդիպումն անցկացրեց Պորտուգալիայի հավաքականի կազմում Խորվաթիայի դեմ խաղում։ Այդ ցուցանիշով նա լավագույնն է ֆուտբոլի պատմության մեջ և դեռ կշարունակի բարելավել իր ցուցանիշը։
Հետաքրքիր է, որ վերը նշված խաղում Խորվաթիայի հավաքականի կազմում իր 179-րդ հանդիպումն անցկացրեց Լուկա Մոդրիչը։ Այսպիսով, Լուկան այդ ցուցանիշով մտավ լավագույն տասնյակ՝ եզրափակելով այն։ Լավագույն հնգյակում ընդգրկվելուն մնացել են հաշված հանդիպումներ, այնպես որ, Մոդրիչը լավ հնարավորություն ունի բարելավելու իր ցուցանիշը։
Իր ցուցանիշը կշարունակի բարելավել նաև Լիոնել Մեսսին, ով այս պահին 4-րդն է վարկանիշում՝ անցկացնելով Արգենտինայի հավաքականի կազմում 187 հանդիպում։
Քուվեյթի հավաքականի լեգենդ, հարձակվող Բադեր Ալ Մուտավան, ճիշտ է, դեռ շարունակում է կարիերան, սակայն հավաքականում հանդես չի գալիս 2022 թվականից։ Երրորդ տեղում գտնվող մալայզիացի Չին Ան Հոն վաղուց արդեն ավարտել է կարիերան (1989 թվականին)։ Անդրես Գուարդադոն (Մեքսիկա) 2022 թվականի ԱԱ-ից հետո ավարտել է միջազգային կարիերան, չնայած ակումբային ֆուտբոլում շարունակում է իր ելույթները։ Այնպես որ, Մեսսին, ինչու ոչ՝ նաև Մոդրիչը, շուտով կարող են Ռոնալդուի հետ միասին կազմել լավագույն եռյակը՝ «Հավաքականների կազմում ամենաշատ հանդիպումներ անցկացրած ֆուտբոլիստների» վարկանիշում։
Ազգային հավաքականների կազմում ամենաշատ հանդիպումներ անցկացրած ֆուտբոլիստները․
1․ Կրիշտիանու Ռոնալդու․ Պորտուգալիա / Ալ Նասր — 213 հանդիպում
2․ Բադեր Ալ Մուտավա․ Քուվեյթ / Ալ Քադասիա — 196 հանդիպում
3․ Չին Ան Սոհ ․ Մալայզիա / ավարտել է կարիերան — 195 հանդիպում
4․ Լիոնել Մեսսի․ Արգենտինա / Ինտեր Մայամի — 187 հանդիպում
5․ Ահմեդ Հասսան․ Եգիպտոս / ավարտել է կարիերան — 184 հանդիպում
6․ Ահմեդ Կանո․ Օման / ավարտել է կարիերան — 182 հանդիպում
7-8․ Անդրես Գուարդադո․ Մեքսիկա / Լեոն — 181 հանդիպում
7-8․ Մայնոր Ֆիգուերոա․ Հոնդուրաս / ավարտել է կարիերան — 181 հանդիպում
9․ Սերխիո Ռամոս․ Իսպանիա / առանց ակումբ — 180 հանդիպում
10․ Լուկա Մոդրիչ․ Խորվաթիա / Ռեալ Մադրիդ — 179 հանդիպում
